ନୂଆଦିଲ୍ଲୀ ୭।୩: ଭାରତ ଶୁକ୍ରବାର ବାଂଲାଦେଶରେ ଚରମପନ୍ଥୀ ବନ୍ଦୀଙ୍କ ମୁକ୍ତିକୁ ନେଇ ଚିନ୍ତା ପ୍ରକଟ କରିଛି। ଏହା ସହିତ ଏହି କଥାକୁ ବି ରେଖାଙ୍କିତ କରିଛି ଯେ ଅନ୍ତରୀଣ ସରକାରଙ୍କର ଏହା ମଧ୍ୟ ଦାୟିତ୍ୱ ଯେ ଦେଶରେ ହିନ୍ଦୁଙ୍କ ସମେତ ଅନ୍ୟ ସଂଖ୍ୟାଲଘୁଙ୍କ ଧାର୍ମିକ ଅନୁଷ୍ଠାନକୁ ରକ୍ଷା କରିବା। ନୂଆଦିଲ୍ଲୀ ଏହା ମଧ୍ୟ କହିଛି ଯେ ସେ ସ୍ଥିର, ଶାନ୍ତିପୂର୍ଣ୍ଣ, ସମାବେଶୀ ଓ ପ୍ରଗତିଶୀଳ ବାଂଲାଦେଶକୁ ସମର୍ଥନ କରେ, ଯେଉଁଠି ସବୁ ପ୍ରସଙ୍ଗର ସମାଧାନ ଗଣତାନ୍ତ୍ରିକ ଉପାୟରେ ଓ ଭାଗିଦାରୀପୂର୍ଣ୍ଣ ନିର୍ବାଚନରେ କରାଯାଏ।
ବିଦେଶମନ୍ତ୍ରାଳୟ ମୁଖପାତ୍ର ରଣଧୀର ଜୟସ୍ୱାଲ ଶୁକ୍ରବାର ସାପ୍ତାହିକ ବ୍ରିଫିଙ୍ଗରେ ଆମେ ବାଂଲାଦେଶର ବିଗୁଡୁଥିବା ଆଇନଶୃଙ୍ଖଳାକୁ ନେଇ ଚିନ୍ତିତ ବୋଲି କହିଛନ୍ତି । ଏହି ସ୍ଥିତି ଗୁରୁତର ଅପରାଧରେ ଦଣ଼୍ଡ ପାଉଥିବା ହିଂସକ ଚରମପନ୍ଥୀଙ୍କ ମୁକ୍ତିରେ ଆହୁରି ବିଗିଡି ଯାଇଛି। ସେ କହିଛନ୍ତି ଯେ ୫ ଅଗଷ୍ଟ ୨୦୨୪ରୁ ୧୬ ଫେବୃଆରୀ ୨୦୨୫ ସୁଦ୍ଧା ରୁଜୁ ହୋଇଥିବା ୨,୩୭୪ ମାମଲାରୁ ମାତ୍ର ୧,୨୫୪ଟି ମାମଲା ପୋଲିସ ପୁଷ୍ଟି କରିଛି। ଏହି ୧୨୫୪ଟି ଘଟଣାରୁ ୯୮ ପ୍ରତିଶତ ରାଜନୈତିକ ପ୍ରକୃତିର ବୋଲି ଜଣାପଡିଛି।
ଜୟସ୍ୱାଲ କହିଛନ୍ତି ଯେ ‘ଆମେ ଆଶା କରୁଛୁ ବାଂଲାଦେଶ ପୁରା ଯାଞ୍ଚ କରିବ ଓ ହତ୍ୟା, ହିଂସା ଏବଂ ଅଗ୍ନିକାଣ୍ଡରେ ଲିପ୍ତ ସବୁ ଅପରାଧୀଙ୍କୁ ବିନା ପାତର ଅନ୍ତରରେ ନ୍ୟାୟର କାଠଗଡ଼ାକୁ ଆଣିବ’। ଏହି ସାପ୍ତାହିକ ବ୍ରିଫିଙ୍ଗରେ ଜୟସ୍ୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମରିସସ ଯାତ୍ରା ସମ୍ପର୍କରେ ମଧ୍ୟ ସୂଚନା ଦେଇଛନ୍ତି। କହିଛନ୍ତି ପ୍ରଧାନମନ୍ତ୍ରୀ ମୋଦି ମାର୍ଚ୍ଚ ୧୧ ତାରିଖରୁ ଦୁଇ ଦିବସୀୟ ମରିସସ ଗସ୍ତରେ ଯିବେ ଓ ସେଠାକାର ଜାତୀୟ ଦିବସ କାର୍ଯ୍ୟକ୍ରମରେ ମୁଖ୍ୟ ଅତିଥି ରୂପେ ଯୋଗ ଦେବେ ବୋଲି କହିଛନ୍ତି ।
