ନୂଆଦିଲ୍ଲୀ: ପାକିସ୍ତାନର ଆଉ ଏକ ବଡ଼ ଆକ୍ରମଣ ବିଫଳ । ଫତେହ-୧ କ୍ଷେପଣାସ୍ତ୍ର ସାହାଯ୍ୟରେ ଭାରତ ଉପରେ ଆକ୍ରମଣ କରିଛି ପାକିସ୍ତାନ । ତେବେ ଭାରତର ବାୟୁ ପ୍ରତିରକ୍ଷା ପ୍ରଣାଳୀ ପାକିସ୍ତାନୀ କ୍ଷେପଣାସ୍ତ୍ରକୁ ଆକାଶରେ ହିଁ ଧ୍ୱଂସ କରିଛି । ଫତେହ-୧ ଏକ ବାଲିଷ୍ଟିକ୍ ମିସାଇଲ୍ ଓ ଏହା ଅତ୍ୟନ୍ତ ଘାତକ ବୋଲି କୁହାଯାଏ ।
ପାକିସ୍ତାନର ଫତେହ-୧ ହେଉଛି ଏକ ଗାଇଡେଡ୍ ମଲ୍ଟିପଲ୍ ଲଞ୍ଚ ରକେଟ୍ ସିଷ୍ଟମ । ଏହି କ୍ଷେପଣାସ୍ତ୍ରର ଲକ୍ଷ୍ୟଭେଦ କ୍ଷମତା ପ୍ରାୟ ୧୪୦ କିଲୋମିଟର । ଫତେହ-୧ ବିଭିନ୍ନ ପ୍ରକାରର ଯୁଦ୍ଧାସ୍ତ୍ର ବହନ କରିବାକୁ ମଧ୍ୟ ସକ୍ଷମ। ଏହି କ୍ଷେପଣାସ୍ତ୍ରକୁ ଟ୍ରକ୍-ଆଧାରିତ ଲଞ୍ଚରରୁ ଲଞ୍ଚ୍ କରାଯାଇଥାଏ ।
ପାକିସ୍ତାନର ଡ୍ରୋନ୍ ଓ ମିସାଇଲ୍ ଆଟାକର କଡ଼ା ଜବାବ ଦେଇଛି ଭାରତ । ପାଲଟା ଜବାବରେ ପାକିସ୍ତାନର ଅନେକ ସହରରେ ହମଲା କରାଯାଇଛି । ପାକିସ୍ତାନର ରାଜଧାନୀ ଇସଲାମାବାଦ, ଲାହୋର ଓ ରାୱଲପିଣ୍ଡି ପରି ସହରରେ ବିସ୍ଫୋରଣ ହୋଇଛି । ରାୱଲପିଣ୍ଡି ସ୍ଥିତ ନୂର ଖାନ ଏୟାରବେସରେ ଶନିବାର ବିଳମ୍ୱିତ ରାତିରେ ବିସ୍ଫୋଣର ଶବ୍ଦ ଶୁଣିବାକୁ ମିଳିଛି । ଏଠାରେ ହିଁ ପାକିସ୍ତାନ ଏୟାରଫୋର୍ସର ଗୁରୁତ୍ୱପୂର୍ଣ୍ଣ ବେସ୍ ଓ ପାକ୍ ଆର୍ମି ମୁଖ୍ୟାଳୟ ଅଛି । ଏହା ବ୍ୟତୀତ ଲାହୋରର ରଫିକି ଏୟାରବେସ୍ ନିକଟରେ ବି ବିସ୍ଫୋରଣ ସୂଚନା ମିଳିଛି । ତେବେ ଭାରତ ପକ୍ଷରୁ ଆନୁଷ୍ଠାନିକ ଭାବେ କୌଣସି ସୂଚନା ଦିଆଯାଇ ନାହିଁ ।
ଏୟାରବେସରେ ବିସ୍ଫୋରଣକୁ ପାକିସ୍ତାନ ସେନା ମଧ୍ୟ ସ୍ୱୀକାର କରିଛି । ଶନିବାର ଭୋର ୩.୩୦ରେ ପାକିସ୍ତାନ ସେନା ସାମ୍ୱାଦିକ ସମ୍ମିଳନୀ କରି ଦାବି କରିଛି ଯେ ଭାରତ ପାକିସ୍ତାନ ବାୟୁସେନାର ନୁର ଖାନ (ରାୱଲପିଣ୍ଡି), ମୁରିଦ (ଚକୱାଲ) ଏବଂ ରଫିକି (ଶୋରକୋଟ) ବାୟୁସେନା ଘାଟିକୁ ଟାର୍ଗେଟ କରିଛି ।
