ନୂଆଦିଲ୍ଲୀ: ଭାରତର ଆମ୍ବକୁ ନେଲାନି ଆମେରିକା। ଫେରାଇଦେଲା ୧୫ଟି ଆମ୍ବ ଭର୍ତ୍ତି ଟ୍ରିପ୍। ୫ ଲକ୍ଷ ଡଲାର କ୍ଷତି ସହିବ ଭାରତୀୟ ରପ୍ତାନୀକାରୀ। ଭାରତ-ଆମେରିକା ମଧ୍ୟରେ ରହିଛି ଉତ୍ତମ ସମ୍ପର୍କ। ବାଣିଜ୍ୟ ବ୍ୟବସାୟରେ ଉଭୟ ଦେଶ ହାତ ମିଳାଇଛନ୍ତି। ହେଲେ ଏମିତି କଣ ଘଟିଲା ଯେ ଭାରତର ଏହି ଫଳ ନେବାକୁ ଅରାଜି ହେଲା ଆମେରିକା। ଜାଣନ୍ତୁ ଏହି ରିପୋର୍ଟରେ…
ଆମେରିକା କର୍ତ୍ତୃପକ୍ଷ ଭାରତରୁ ଅତି କମରେ ୧୫ଟି ଆମ୍ବ ଟ୍ରିପକୁ ଗ୍ରହଣ କରିବାକୁ ମନା କରିଦେଇଛନ୍ତି। ରିପୋର୍ଟ ଅନୁଯାୟୀ, ଏହି ସମସ୍ତ ସାମଗ୍ରୀ ଆକାଶ ମାର୍ଗରେ ଆମେରିକାକୁ ପଠାଯାଇଥିଲା। ଆମେରିକା କର୍ତ୍ତୃପକ୍ଷ ରପ୍ତାନିକାରୀମାନଙ୍କୁ ଏହି କନସାଇନମେଣ୍ଟକୁ ଆମେରିକାରେ ନଷ୍ଟ କରିବାକୁ କିମ୍ବା ଏହାକୁ ପୁଣି ଥରେ ଭାରତକୁ ରପ୍ତାନି କରିବାକୁ ନିର୍ଦ୍ଦେଶ ଦେଇଛନ୍ତି। ଯେହେତୁ ଆମ୍ବ ଅଧିକ ଦିନ ରହିପାରିବନି, ଏହାକୁ ଫେରାଇ ଆଣିବା ପାଇଁ ବହୁତ ଖର୍ଚ୍ଚ ହେବ, ତେଣୁ ସମସ୍ତ ରପ୍ତାନିକାରୀ ଏହାକୁ ଆମେରିକାରେ ହିଁ ନଷ୍ଟ କରିବାକୁ ନିଷ୍ପତ୍ତି ନେଇଛନ୍ତି।
ଆମେରିକୀୟ ଅଧିକାରୀମାନେ କହିଛନ୍ତି ଯେ ଏରାଡିଏସନ ବା ବିକିରଣ ସମ୍ବନ୍ଧୀୟ ଡକ୍ୟୁମେଣ୍ଟେସନ୍ ପ୍ରକ୍ରିୟାରେ ତ୍ରୁଟି ଥିଲା। ଫଳ ମଧ୍ୟରେ ଥିବା କୀଟପତଙ୍ଗକୁ ମାରିବା ଏବଂ ଏହାର ସେଲଫ ଲାଇଫ୍ ବୃଦ୍ଧି କରିବା ପାଇଁ ବିକିରଣ ଏକ ଆବଶ୍ୟକୀୟ ପ୍ରକ୍ରିୟା। ଏନେଇ ରପ୍ତାନୀକାରୀ କମ୍ପାନି କୁହନ୍ତି ଯେ ଏହି ଆମ୍ବଗୁଡ଼ିକୁ ମେ ୮ ଏବଂ ୯ ତାରିଖରେ ମୁମ୍ବାଇରେ ବିକିରଣ ପ୍ରକ୍ରିୟାରେ ପରିଣତ କରାଯାଇଥିଲା। ଏହା ସତ୍ତ୍ୱେ, ଆମେରିକାର ଲସ୍ ଆଞ୍ଜେଲସ୍, ସାନ୍ ଫ୍ରାନ୍ସିସ୍କୋ ଏବଂ ଆଟଲାଣ୍ଟା ଭଳି ବିମାନବନ୍ଦରରେ ପଠାଯାଇଥିବା ସାମଗ୍ରୀକୁ ଅଟକା କରାଯାଇଥିଲା।
ରପ୍ତାନିକାରୀମାନଙ୍କ କହିବା କଥା ହେଲା ଏହି ଆମ୍ବଗୁଡ଼ିକରେ କୌଣସି କୀଟପତଙ୍ଗ କିମ୍ବା ରୋଗ ନଥିଲା, କିନ୍ତୁ କାଗଜପତ୍ରରେ ବୈଷୟିକ ତ୍ରୁଟି ଯୋଗୁଁ ଏହି ସମସ୍ୟା ଦେଖାଦେଇଛି। ଅର୍ଥାତ୍, ପ୍ରକୃତ ସମସ୍ୟା ଆମ୍ବଗୁଡ଼ିକର ଗୁଣବତ୍ତା ନୁହେଁ, ବରଂ ଏହାର ବିକିରଣ ସମ୍ପର୍କିତ କାଗଜପତ୍ରରେ ଏକ ଅସଙ୍ଗତି ଥିଲା।
ଆମେରିକା କୃଷି ବିଭାଗ ଦ୍ୱାରା ଜାରି କରାଯାଇଥିବା ଏକ ବିଜ୍ଞପ୍ତି ଅନୁଯାୟୀ, PPQ203 ଫର୍ମ ଭୁଲ ଭାବରେ ଜାରି କରାଯାଇଥିବାରୁ ଏହି ଆମ୍ବ ଚାଲାଣକୁ ଆମେରିକୀୟ କଷ୍ଟମ୍ସ ଏବଂ ସୀମା ସୁରକ୍ଷା ଦ୍ୱାରା ପ୍ରତ୍ୟାଖ୍ୟାନ କରାଯାଇଥିଲା। ନୋଟିସରେ ଏହା ମଧ୍ୟ କୁହାଯାଇଛି ଯେ ଏହି ସାମଗ୍ରୀକୁ ଫେରାଇ ପଠାଯାଉ ନଚେତ୍ ନଷ୍ଟ କରିଦିଆଯାଉ। ଆମେରିକା ସରକାର ଏହି କ୍ଷତି ପାଇଁ କୌଣସି ଦାୟିତ୍ୱ ନେବ ନାହିଁ କିମ୍ବା କୌଣସି ପଦକ୍ଷେପ ନେବ ନାହିଁ। ଭୁଲଟି ବିକିରଣ କେନ୍ଦ୍ର ଦ୍ୱାରା କରାଯାଇଥିଲା, କିନ୍ତୁ ଆମେ ଦଣ୍ଡ ପାଇଲେ ରପ୍ତାନିକାରୀ। ଭାରତୀୟ ରପ୍ତାନିକାରୀମାନେ $500,000 ପର୍ଯ୍ୟନ୍ତ କ୍ଷତି ସହିପାରନ୍ତି।
