ରାଜନୀତି ଛାଡ଼ି ଦେବି ଯଦି...ନୀତୀଶ କୁମାରଙ୍କୁ ପୁଣି ଏକ ନୂଆ ଚ୍ୟାଲେଞ୍ଜ ଦେଲେ ପ୍ରଶାନ୍ତ କିଶୋର

ନୂଆଦିଲ୍ଲୀ: ନିର୍ବାଚନ ରଣନୀତିକାରରୁ ରାଜନେତା ପାଲଟିଥିବା ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି ବିହାର ନିର୍ବାଚନରେ ଶୋଚନୀୟ ପରାଜୟ ଦେଖିଥିଲା । ନିର୍ବାଚନ ହାରିଲେ ଏବଂ ଏନଡିଏସ୍ ସରକାର ଗଢିଲେ ରାଜନୀତିରୁ ସନ୍ନ୍ୟାସ ନେବେ ବୋଲି ଘୋଷଣା ବି କରିଥିଲେ । ଏହାରି ଭିତରେ ସେ ପୁଣି ଥରେ ସେ ଜେଡିୟୁ ମୁଖ୍ୟ ଏବଂ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ୱାଧୀନ ସରକାର ପାଇଁ ଏକ ନୂତନ ଚ୍ୟାଲେଞ୍ଜ ଦେଇଛନ୍ତି ।

ପ୍ରଥମ ନିର୍ବାଚନରେ ପାର୍ଟିର ବିପର୍ଯ୍ୟୟ ପରେ ପ୍ରଥମ ପ୍ରତିକ୍ରିୟା ଦେଇ ପରାଜୟକୁ ନିଜ ମୁଣ୍ଡକୁ ନେଇଛନ୍ତି । ତାଙ୍କ ଦଳ ବିହରରେ ରାଜନୀତିକ ପରିବର୍ତ୍ତନ ଆଣିପାରିଲା ନାହିଁ ବୋଲି ସେ ସ୍ୱୀକାର କରିଛନ୍ତି । ସେ ନୀତୀଶଙ୍କ ସରକାରକୁ ଏକ ନୂତନ ଚ୍ୟାଲେଞ୍ଜ ଦେଇ କହିଛନ୍ତି, ଯଦି ସେ ରାଜ୍ୟର ୧.୫ କୋଟି ମହିଳାଙ୍କୁ 2 ଲକ୍ଷ ଟଙ୍କା ଦେବାର ପ୍ରତିଶ୍ରୁତି ପୂରଣ କରନ୍ତି ତେବେ ନିଶ୍ଚିତ ଭାବରେ ରାଜନୀତି ଛାଡିଦେବେ ।

ପ୍ରଶାନ୍ତ କିଶୋର କହିଛନ୍ତି, "ଲୋକେ ଜେଡିୟୁ ୨୫ଟି ଆସନ ଜିତିବା ନେଇ ମୋର ମନ୍ତବ୍ୟ ଉପରେ ଅନେକ କଥାବାର୍ତ୍ତା କରୁଛନ୍ତି - ମୁଁ ଏବେ ବି ଏଥିରେ ଅଟଳ । ଯଦି ନୀତିଶ କୁମାର ୧.୫ କୋଟି ମହିଳାଙ୍କୁ ପ୍ରତିଶ୍ରୁତି ଦେଇଥିବା ୨ ଲକ୍ଷ ଟଙ୍କା ଦିଅନ୍ତି କରନ୍ତି ଏବଂ ପ୍ରମାଣ କରନ୍ତି ଯେ ସେ ଭୋଟ କିଣି ଜିତି ନାହାନ୍ତି, ତେବେ ମୁଁ ନିଶ୍ଚିତ ଭାବରେ ବିନା କୌଣସି ଯଦି ଏବଂ କିନ୍ତୁରେ ରାଜନୀତି ଛାଡିଦେବି ।" 

ଉଲ୍ଲେଖଯୋଗ୍ୟ ଯେ ପ୍ରଶାନ୍ତ କିଶୋର ବିହାର ନିର୍ବାଚନ ପୂର୍ବରୁ ନୀତୀଶ କୁମାରଙ୍କ ଜେଡିୟୁ ନେଇ ଏକ ବଡ଼ ଚ୍ୟାଲେଞ୍ଜ ଦେଇଥିଲେ । ସେ କହିଥିଲେ, ଯଦି ଜେଡିୟୁ ୨୫ରୁ ଅଧିକ ଆସନ ଜିତିଥାଏ ତେବେ ସେ ରାଜନୀତିରୁ ସନ୍ନ୍ୟାସ ନେବେ । ଜନ ସୁରାଜ ଦଳ ମୁଖ୍ୟ ଅଭିଯୋଗ କରିଛନ୍ତି, ଯଦି ଜେଡିୟୁ ପ୍ରତ୍ୟେକ ନିର୍ବାଚନମଣ୍ଡଳୀର ୬୦,୦୦୦ରୁ ଅଧିକ ହିତାଧିକାରୀଙ୍କୁ ୧୦,୦୦୦ ଦେଇ ନଥାନ୍ତା, ତେବେ କେବଳ ୨୫ଟି ଆସନରେ ସୀମିତ ହୋଇଥାନ୍ତା ।

ପ୍ରଶାନ୍ତ କିଶୋରଙ୍କ ସର୍ଭେର ବିପରୀତରେ, ନୀତୀଶ କୁମାରଙ୍କ ଜେଡିୟୁ ୧୦୧ଟି ଆସନରୁ ୮୫ଟି ଆସନ ଜିତିଥିଲା । ଏହାର ସବୁଠାରୁ ବଡ଼ ସହଯୋଗୀ ବିଜେପି ୮୯ଟି ଆସନ ଜିତିଥିଲା । ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି ପ୍ରାର୍ଥୀ ଦେଇଥିବା ୨୪୩ଟି ଆସନ ମଧ୍ୟରୁ ଗୋଟିଏରେ ବିଜୟୀ ହୋଇପାରିନଥିଲା ।