ନୂଆଦିଲ୍ଲୀ: ଭାରତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ବରେ ତୃତୀୟ ଥର ଏନଡିଏ ସରକାର ଗଠନ କରିଛି। ଆଉ ସରକାର ଗଠନ ପରେ ପରେ ଏବେ ସରକାର ଅରୁଣାଚଳ ପ୍ରଦେଶରେ ଚୀନ୍ ଗତିବିଧିର ଜବାବ ଦେବାକୁ ଯାଉଛି। ପ୍ରକୃତରେ ଭାରତ ତିବ୍ବତରେ ଅନେକ ସ୍ଥାନର ନାମ ବଦଳାଇବାକୁ ନିଷ୍ପତ୍ତି ନେଇଛନ୍ତି।
ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଭାରତ ସରକାର ତିବ୍ବତରେ ୩୦ ସ୍ଥାନର ନାଁ ପରିବର୍ତ୍ତନ ଉପରେ ମୋହର ମାରିଛନ୍ତି। ଏହି ନାଁ ଐତିହାସିକ ଗବେଷଣା ଏବଂ ତିବ୍ବତ କ୍ଷେତ୍ର ଆଧାରରେ ହିଁ ରଖାଯିବ। ସୂଚନା ଅନୁଯାୟୀ, ସେନା ଏହି ନାଁ ଜାରି କରିବ ଏବଂ ବାସ୍ତବିକ ନିୟନ୍ତ୍ରଣ ରେଖା ଅର୍ଥାତ୍ ଏଲଏସିର ମ୍ୟାପ୍ରେ ଏହି ନାଁକୁ ଅପଡେଟ୍ କରାଯିବ। ବଡ଼ କଥା ହେଉଛି ସରକାରଙ୍କ ତରଫରୁ ଏହି ପଦକ୍ଷେପ ଏଭଳି ସମୟରେ ଉଠାଯାଉଛି, ଯେତେବେଳେ ଚୀନ୍ ଏପ୍ରିଲ୍ରେ ଅରୁଣାଚଳ ପ୍ରଦେଶର ୩୦ ନାଁକୁ ବଦଳାଇଥିଲା। ଏହି ନିଷ୍ପତ୍ତିରେ ଭାରତ ତରଫରୁ ମଧ୍ୟ କଡ଼ା ବିରୋଧ କରାଯାଇଥିଲା। ରିପୋର୍ଟ ଅନୁଯାୟୀ, ନାଁ ତାଲିକାରେ ୧୧ ଆବାସିକ ଅଞ୍ଚଳ, ୧୨ ପାହାଡ଼, ୪ ନଦୀ, ଗୋଟିଏ ହ୍ରଦ, ୧ମାଉଣ୍ଟେନ୍ ପାସ୍ ଆଉ ଏକ ଭୂଖଣ୍ଡ ରହିଛି। ଚୀନ୍ ତରଫରୁ ବାରମ୍ବାର ଏହି ଦାବି କରାଯିବା ପରେ ବି ଭାରତ ସ୍ପଷ୍ଟ କରିଆସୁଛି ଯେ, ଅରୁଣାଚଳ ପ୍ରଦେଶ ଦେଶର ଅଭିନ୍ନ ଅଂଙ୍ଗ।
ସୂଚନାଥାଉକି, ମଙ୍ଗଳବାର ଏସ୍ ଜୟଶଙ୍କର ବିଦେଶ ମନ୍ତ୍ରୀ ପଦ ସମ୍ଭାଳିଛନ୍ତି। ଆଉ ଏହି ଅବସରରେ ସେ ଚୀନ ସହ ଜାରି ସୀମା ବିବାଦକୁ ସମାଧାନ ଉପରେ ଧ୍ୟାନ ଦେବା କଥା କହିଛନ୍ତି। ଜୟଶଙ୍କର କହିଛନ୍ତି ଭାରତ, ଚୀନ୍ ସହ ସୀମାରେ ଥିବା ପ୍ରସଙ୍ଗ ସମାଧାନ କରିବା ଉପରେ ଧ୍ୟାନ ଦେବେ। ପୂର୍ବ ଲଦାଖରେ ଚାରି ବର୍ଷରୁ ଅଧିକ ସମୟ ଧରି ଜାରି ରହିଥିବା ସୀମା ବିବାଦ କାରଣ ଉଭୟ ଦେଶର ଦ୍ବିପାକ୍ଷିକ ସମ୍ବନ୍ଧରେ ବେଶ୍ ତିକ୍ତତା ଆସିଛି।
