ସାର୍ବଜନିକ ହେଲା ଏପଷ୍ଟାଇନ ଡକ୍ୟୁମେଣ୍ଟ, ଅଧାଅଧୁରା ଫାଇଲକୁ ନେଇ ଅସନ୍ତୋଷ

ୱାସିଂଟନ ୨୦।୧୨: ଆମେରିକା ନ୍ୟାୟ ବିଭାଗ କୁଖ୍ୟାତ ଫାଇନାନ୍ସର ତଥା ଯୌନ ଅପରାଧୀ ଜେଫ୍ରି ଏପଷ୍ଟାଇନଙ୍କ ସମ୍ପର୍କିତ କିଛି ସୀମିତ ଡକ୍ୟୁମେଣ୍ଟ ଜାରି କରିଛି। କଂଗ୍ରେସ ଆଦେଶରେ ଏହି ଡକ୍ୟୁମେଣ୍ଟ ଜାରି ହୋଇଥିବା ବେଳେ ଆରମ୍ଭରୁ ବିବାଦ ଉପୁଜିଛି। ଏହି ଫାଇଲକୁ ଅଧୁରା ବୋଲି କୁହାଯାଉଛି ଓ ଏଥିରେ ସୂଚନା ଲୁଚାଇବାକୁ ଚେଷ୍ଟା କରାଯାଇଛି। ଏଣୁ ଏହାକୁ ରେଡେକ୍ସନ ବୋଲି କୁହାଯାଉଛି। ଖାସ କଥା ହେଉଛି ଏହି ଡକ୍ୟୁମେଣ୍ଟରେ ପୂର୍ବତନ ରାଷ୍ଟ୍ରପତି ବିଲ୍ କ୍ଲିଣ୍ଟନଙ୍କ ରଙ୍ଗୀନ ମୁହୂର୍ତ୍ତ ସାମ୍ନାକୁ ଆସିଛି। ଏଥିରେ ତାଙ୍କୁ ମହିଳାଙ୍କ ସହିତ ନିକଟ ସମ୍ପର୍କରେ ଦେଖାଯାଇଛି।

ଦୀର୍ଘ ଅପେକ୍ଷା ପରେ ଖୋଲିଲା ଅଧୁରା ଫାଇଲ
ଆମେରିକାରେ ଏହି ଡକ୍ୟୁମେଣ୍ଟକୁ ଦୀର୍ଘ ସମୟରୁ ଅପେକ୍ଷା କରାଯାଉଥିଲା। ଏହାକୁ ସେଇ ଆଇନରେ ଜାରି କରାଯାଇଛି, ଯେଉଁଥିରେ ଗତ ମାସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସ୍ୱାକ୍ଷର କରିଥିଲେ। କୁହାଯାଉଥିବା ଏହି ଫାଇଲ ଏପଷ୍ଟାଇନଙ୍କ କ୍ଷମତାଶାଳୀ ଲୋକଙ୍କ ସହ ସମ୍ପର୍କ ଓ ତାଙ୍କ ଅପରାଧକୁ ନେଇ ହୋଇଥିବା ଯାଞ୍ଚର ଅନେକ ରହସ୍ୟ ସାମ୍ନାକୁ ଆଣିବ। ହେଲେ ଏବେ ଯେଉଁ ଫାଇଲ ସାମ୍ନାକୁ ଆସିଛି ତାହା ଲୋକଙ୍କ ଆଶା ପାଣି କରିଦେଇଛି।

The Justice Department released photos from the Epstein files which show Jeffery Epstein with Michael Jackson and former President Bill Clinton.

Follow: @AFpost pic.twitter.com/xs6jVgahP3

— AF Post (@AFpost) December 19, 2025

ଭାରତୀୟ ନେତାଙ୍କୁ ନେଇ ମିଳିଲା କଣ?
ଯେପରି କୁହାଯାଇଛି ସୂଚନା ଦବାଇ ଦିଆଯାଇଛି ବା ଫାଇଲ ଅଧୁରା ଏଣୁ ଭାରତରେ ବିରୋଧୀ ଦଳଙ୍କୁ ଝଟକା ଲାଗିଛି। ବିରୋଧୀ ଦଳ ଭାବୁଥିଲେ ଏପଷ୍ଟାଇନ ଫାଇଲରେ ଶାସକ ଦଳର ନେତା ଓ ବ୍ୟବସାୟୀଙ୍କ ନାମ ଆସିବ। ହେଲେ ଏପରି କିଛି ବି ହୋଇନି। ଏଣୁ ଭାରତ ଲାଗି ଏହି ଫାଇଲ ଖୋଲିବା ସେପରି କୌଣସି ଅସୁବିଧାଜନକ ସାବ୍ୟସ୍ତ ହୋଇ ନାହିଁ। ଆଗକୁ ମଧ୍ୟ ଏହି ଫାଇଲରୁ ସେପରି କିଛି ପଦାକୁ ଆସିବ ତାହା ମଧ୍ୟ ଆଶା କରାଯାଉନି।

ପାରଦର୍ଶିତା ଉପରେ ଉଠୁଛି ପ୍ରଶ୍ନ
ଏହି ଅଧାଅଧୁରା ରିଲିଜ ପରେ ସରକାରଙ୍କ ପାରଦର୍ଶିତା ଓ ଉତ୍ତରଦାୟିତ୍ୱ ଉପରେ ପ୍ରଶ୍ନ ଚିହ୍ନ ଲାଗିଛି। ସାଂସଦ, ବୁଦ୍ଧିଜୀବୀ ଏବଂ ଓକିଲ ଅଭିଯୋଗ କରିଛନ୍ତି ଯେ ଡିପାର୍ଟମେଣ୍ଟ ଅଫ ଜଷ୍ଟିସ୍ ଆଇନର ସଠିକ ପାଳନ କରି ନାହିଁ। ତେବେ ବିଭାଗ ଦାବି କରିଛି ଆଗାମୀ ସପ୍ତାହମାନଙ୍କରେ ଆହୁରି ଡକ୍ୟୁମେଣ୍ଟ ଜାରି ହେବ ଓ ବର୍ଷ ସରିବା ପୂର୍ବରୁ ସମ୍ପୂର୍ଣ୍ଣ ପ୍ରକ୍ରିୟା ପୁରା କରାଯିବ। ଆଇନ ଅନୁସାରେ ନ୍ୟାୟ ବିଭାଗଙ୍କ ନିକଟରେ ଅଧିକାଂଶ ରେକର୍ଡ ଜାରି ନିମନ୍ତେ ଶେଷ ତାରିଖ ୧୯ ଡିସେମ୍ବର ଥିଲା। ଡେପୁଟି ଆଟର୍ଣ୍ଣି ଜେନେରାଲ ଟଡ ବ୍ଲେଞ୍ଚ ସଂକେତ ଦେଇଥିଲେ ଯେ ଲକ୍ଷଲକ୍ଷ ଫାଇଲ ସାମ୍ନାକୁ ଆସି ପାରେ। ହେଲେ ବିଭାଗ ୱେବସାଇଟରେ ମାତ୍ର ୪ ହଜାର ଫାଇଲ ଦେଖାଇଛି ଓ ଏଥିରେ ଅଧିକାଂଶ ଫଟୋଚିତ୍ର ରହିଛି ଏବଂ ଏହା ଆଗରୁ ମଧ୍ୟ ସାର୍ବଜନିକ ହୋଇଥିଲା। ବ୍ଲେଞ୍ଚ କଂଗ୍ରେସକୁ ଲେଖିଥିବା ପତ୍ରରେ ଏହା ଏକ ଅଧୁରା ଫାଇଲ ବୋଲି କହିଛନ୍ତି।