ନୂଆଦିଲ୍ଲୀ: ଯେଉଁ ଟିଭିରୁ ଦର୍ଶକ ଦିନେ ମନ ଫେରାଇ ନେଇଥିଲେ, ଭାରତ ପାକିସ୍ତାନ ଚାମ୍ପିୟନ ଟ୍ରଫି ମୁକାବିଲା ପାଇଁ ପୁଣିଥରେ ସେହି ଟିଭିକୁ ଫେରିଲେ। ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଚାମ୍ପିୟନ ଟ୍ରଫି ୨୦୨୫ରେ ହୋଇଥିବା ଭାରତ ପାକିସ୍ତାନ ମୁକାବିଲାକୁ ଟେଭିରେ ଦେଖିଛନ୍ତି ରେକର୍ଡ ସଂଖ୍ୟକ ଦର୍ଶକ। ଯାହା ଏକ ରେକର୍ଡ ହୋଇଛି। ଫେବ୍ରୁଆରୀ ୨୩ ତାରିଖରେ ଦୁଇ ଦଳ ମଧ୍ୟରେ ଦୁବାଇରେ ମୁକାବିଲା ହୋଇଥିଲା। ସେତେବେଳେ ୨୦.୬ କୋଟି ଲୋକ ଏହି ମ୍ୟାଚ୍କୁ ଟିଭିରେ ଦେଖିଛନ୍ତି। ବିଶ୍ୱକପ୍ ମ୍ୟାଚ୍ ବାଦ ଦେଲେ ବ୍ରଡକାଷ୍ଟ ଅଡିଆନ୍ସ ରିସର୍ଚ୍ଚ କାଉନସିଲ୍ (BARC) ଇତିହାସରେ ଏହା ଦ୍ୱିତୀୟ ସର୍ବାଧିକ ଦେଖାଯାଇଥିବା କ୍ରିକେଟ୍ ମ୍ୟାଚ୍ ହୋଇଛି।
ଟିଭିରେ ଯେତିକି ଦର୍ଶକ ଭାରତ ପାକିସ୍ତାନ ଚାମ୍ପିୟନ ଟ୍ରଫି ୨୦୨୫ ମୁକାବିଲା ଦେଖିଲେ ସେତିକି ୨୦୨୩ ଦିନିକିଆ ବିଶ୍ୱକପ୍ରେ ବି ଦେଖି ନଥିଲେ। ୨୦୨୩ରେ ଅହମଦାବାଦରେ ଖେଳାଯାଇଥିବା ଭାରତ-ପାକିସ୍ତାନ ବିଶ୍ୱକପ୍ ମୁକାବିଲା ଠାରୁ ୧୧ ପ୍ରତିଶତ ଅଧିକ ଦର୍ଶକ ଚଳିତ ଚାମ୍ପିୟନ ଟ୍ରଫି ମୁକାବିଲା ଦେଖିଥିବା ଜିଓହଟଷ୍ଟାର କହିଛି। ଏହି ପ୍ରତିଯୋଗିତାରେ ବିରାଟ କୋହଲି ୧୪,୦୦୦ ଏକଦିବସୀୟ ରନ୍ ପୂରଣ କରିବାରେ ଦ୍ରୁତତମ ଖେଳାଳି ହୋଇଥିଲେ। ଏହାକୁ ଟିଭିରେ ମୋଟ ୨,୬୦୯ କୋଟି ମିନିଟ୍ ଦେଖା ଯାଇଥିଲା।
ପଢନ୍ତୁ- ବିରାଟ କୋହଲି ନାଁ ରୋହିତ ଶର୍ମା-ICC ଟୁର୍ଣ୍ଣାମେଣ୍ଟ ଫାଇନାଲରେ କିଏ ଟିମ୍ ପାଇଁ କିଏ ସର୍ବୋତ୍ତମ ?
ଏହି ମ୍ୟାଚ୍ରେ ଭାରତ ପାକିସ୍ତାନକୁ ୬ ୱିକେଟରେ ପରାସ୍ତ କରି ପଡ଼ୋଶୀଙ୍କୁ ପୂରା ଚାମ୍ପିୟନ ଟ୍ରଫିରୁ ବିଦା କରି ଦେଇଥିଲା। ଅନ୍ୟପଟେ ଭାରତ ସେମିଫାଇନାଲ୍ରେ ଅଷ୍ଟ୍ରେଲିଆକୁ ମଧ୍ୟ ପରାସ୍ତ କରି ନ୍ୟୁଜିଲାଣ୍ଡ ସହିତ ଫାଇନାଲ୍ ଖେଳିବାକୁ ପ୍ରସ୍ତୁତ ହେଉଛି। ରବିବାର ମାର୍ଚ୍ଚ ୯ ତାରିଖରେ ଦୁବାଇରେ ଉଭୟଙ୍କ ମଧ୍ୟରେ ଏହି ହାଇଭୋଲ୍ଟେଜ୍ ମୁକାବିଲା ହେବ। ସେପଟେ ଚାମ୍ପିୟନ ଟ୍ରଫିରୁ ବିଦା ହେବା ପରେ ପାକିସ୍ତାନୀ ଖେଳାଳି ଘରକୁ ଫେରି ଯାଇଛନ୍ତି।
ଏହା ପୂର୍ବରୁ ଗ୍ରୁପ୍ ଷ୍ଟେଜ୍ ମ୍ୟାଚ୍ରେ ଭାରତ ନ୍ୟୁଜିଲାଣ୍ଡକୁ ପରାସ୍ତ କରିଥିଲା। ଏଥିରେ ବରୁଣ ଚକ୍ରବର୍ତ୍ତୀ ୫ଟି ୱିକେଟ୍ ନେଇ ନାୟକ ସାଜିଥିଲେ। ତେଣୁ ଟିମ୍ର ମନୋବଳ ଦୃଢ଼ ରହିଛି। ଭାରତ ଏଥର ନ୍ୟୁଜିଲାଣ୍ଡକୁ ହରାଇ ଆଇସିସି ଚାମ୍ପିୟନ ହେବା ଲକ୍ଷ୍ୟରେ ରହିଛି।
