ଦୁବାଇ, ୯/୩: ଆଇସିସି ଚାମ୍ପିଅନ୍ସ ଟ୍ରଫି ଫାଇନାଲ ଫାଇଟ୍ । ଚାମ୍ପିଅନ ହେବାକୁ ଚାମ୍ପିଅନ୍ସ ଟିମ୍ ମଧ୍ୟରେ ଲଢେଇ । ରବିବାର ଦିନ ୨ଟା ୩୦ ମିନିଟରେ ଦୁବାଇ ଆନ୍ତର୍ଜାତିକ ଷ୍ଟାଡିୟମରେ ଟାଇଟଲ୍ ଟକ୍କର । ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ତୃତୀୟ ଟାଇଟଲ ପାଇଁ ଟିମ୍ ଇଣ୍ଡିଆ ଓ ଦ୍ୱିତୀୟ ଟ୍ରଫି ପାଇଁ ନ୍ୟୁଜିଲାଣ୍ଡ ମଇଦାନରେ ସବୁ ଶକ୍ତି ଖଟାଇବ । ୨୫ ବର୍ଷ ପରେ କୌଣସି ଆଇସିସି ସୀମିତ ଓଭର ଟ୍ରଫି ଜିତିବା ପାଇଁ ନ୍ୟୁଜିଲାଣ୍ଡ ଲକ୍ଷ୍ୟ ରଖିଛି । ରୋହିତ ଶର୍ମା ମଧ୍ୟ କ୍ରମାନ୍ୱୟରେ ୨ଟି ଆଇସିସି ଟ୍ରଫି ଜିତି ଅନନ୍ୟ ରେକର୍ଡ କରିବାକୁ ସ୍ୱପ୍ନ ଦେଖୁଛନ୍ତି ।
ନ୍ୟୁଜିଲାଣ୍ଡ ୨୦୦୦ ମସିହାରେ ଚାମ୍ପିଅନ୍ସ ଟ୍ରଫି ଜିତିଥିଲା । ଏହାପରେ ଭାରତ ୨୦୦୨ ଓ ୨୦୧୩ରେ ଚାମ୍ପିଅନ୍ ହୋଇଥିଲା । ୨୦୧୭ରେ ମଧ୍ୟ ଭାରତ ଫାଇନାଲ୍ ଖେଳିଥିଲା ହେଲେ ପାକିସ୍ତାନ ଠାରୁ ପରାଜିତ ହୋଇଥିଲା । ରୋହିତଙ୍କ ନେତୃତ୍ୱରେ ଭାରତୀୟ ଦଳ କ୍ରମାନ୍ୱୟରେ ୪ଟି ଆଇସିସି ଟୁର୍ଣ୍ଣାମେଣ୍ଟ ଫାଇନାଲ୍ ଖେଳିଛି । ଗତ ବର୍ଷ ଭାରତ ଟି-ଟ୍ୱେଣ୍ଟି ବିଶ୍ୱକପ୍ ଜିତିଥିଲା । ମାତ୍ର ଏହା ପୂର୍ବରୁ ଦଳ ୨୦୨୩ ଦିନିକିଆ ବିଶ୍ୱକପ୍ ଫାଇନାଲ୍ ଓ ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ୍ରେ ପରାଜିତ ହୋଇଥିଲା । ଆଜି ବିଜୟ ସହ ରୋହିତ ଆଉ ଏକ ଆଇସିସି ଟ୍ରଫିରେ ନିଜ ନାମ ଯୋଡ଼ିବାକୁ ଲକ୍ଷ୍ୟ ରଖିଛନ୍ତି ।
ଦଳ ମଧ୍ୟ ପ୍ରସ୍ତୁତ ରହିଛି । ପ୍ରାୟତଃ ସବୁ ଖେଳାଳି ଫର୍ମରେ ରହିଛନ୍ତି । ତଥାପି ନ୍ୟୁଜିଲାଣ୍ଡ ଭଳି ଏକ ଶୃଙ୍ଖଳିତ ଶକ୍ତିଶାଳୀ ଦଳକୁ ହରାଇବାକୁ ହେଲେ ଦଳଗତ ପ୍ରଦର୍ଶନକୁ ପ୍ରାଥମିକତା ଦେବା ଜରୁରି । ନ୍ୟୁଜିଲାଣ୍ଡ ମଧ୍ୟ ଭାରତକୁ ଉଚିତ ଜବାବ ଦେବାକୁ ପ୍ରସ୍ତୁତ । ଲିଗ୍ ପର୍ଯ୍ୟାୟର ପରାଜୟରୁ ଉପଯୁକ୍ତ ଶିକ୍ଷା ପାଇଥିବା ନ୍ୟୁଜିଲାଣ୍ଡ ଆସନ୍ତାକାଲି କୌଣସି ତ୍ରୁଟି ନକରିବାକୁ ପ୍ରସ୍ତୁତ । ଫାଇନାଲ୍ ମ୍ୟାଚ୍ ପାଇଁ ପ୍ରସ୍ତୁତ କରାଯାଇଥିବା ପିଚ୍ ସ୍ପିନରଙ୍କୁ ସହାୟତା କରିବା ନିଶ୍ଚିତ । ତଥାପି ପ୍ରଥମାର୍ଦ୍ଧରେ ବ୍ୟାଟରମାନେ ମଧ୍ୟ ପିଚ୍ର ଫାଇଦା ଉଠାଇ ପାରିବେ । ଟସ୍ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।
ଭାରତ: ରୋହିତ ଶର୍ମା (ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର, ଅକ୍ଷର ପଟେଲ, କେଏଲ ରାହୁଲ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡ଼େଜା, କୁଲଦୀପ ଯାଦବ/ୱାସିଂଟନ ସୁନ୍ଦର, ମହମ୍ମଦ ସାମି, ବରୁଣ ଚକ୍ରବର୍ତ୍ତୀ ।
ନ୍ୟୁଜିଲାଣ୍ଡ: ୱିଲ ୟଙ୍ଗ, ରଚିନ ରବିନ୍ଦ୍ର, କେନ ୱିଲିୟମସନ, ଡାରିଲ ମିଚେଲ, ଟମ ଲାଥମ, ଗ୍ଲେନ ଫିଲିପ୍ସ, ମାଇକେଲ ବ୍ରେସୱେଲ୍, ମିଚେଲ ସାଣ୍ଟନର (ଅଧିନାୟକ), କେଲି ଜାମିସନ, ମାଟ୍ ହେନରୀ/ଜାକବ ଡଫି/ନାଥାନ ସ୍ମିଥ୍, ୱିଲ ଓ’ରୁର୍କ ।
