ନୂଆଦିଲ୍ଲୀ ୦୨।୦୨: ଭାରତ ଓ ଇଂଲଣ୍ଡ ମଧ୍ୟରେ ରବିବାର ଖେଳାଯିବ ଟି-୨୦ ସିରିଜ୍ର ଶେଷ ତଥା ପଞ୍ଚମ ମ୍ୟାଚ୍ । ଉଭୟ ଟିମ୍ ୱାଙ୍ଖଡ଼େ ଷ୍ଟାଡ଼ିୟମ୍ରେ ମୁହାଁମୁହିଁ ହେବେ । ଟିମ୍ ଇଣ୍ଡିଆ ପ୍ରଥମରୁ ହିଁ ସିରିଜ୍ ନିଜ ନାଁରେ କରିସାରିଛି । ଭାରତୀୟ ଟିମ୍ ପ୍ରଥମ, ଦ୍ବିତୀୟ ଏବଂ ଚତୁର୍ଥ ଟି-୨୦ ଜିତି ସିରିଜ୍ ନିଜ ନାଁରେ କରିଛି ।
ଚତୁର୍ଥ ଟି-୨୦ ବିଷୟରେ କହିବାକୁ ଗଲେ, ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଭାରତ ମାତ୍ର ୧୨ ରନ୍ରେ ହରାଇଥିଲା ୩ଟି ଗୁରୁତ୍ୱପୂର୍ଣ୍ଣ ୱିକେଟ୍ । ଏହାପରେ ୭୯ ରନରେ ପଡ଼ିଥିଲା ୫ଟି ୱିକେଟ । ପରେ ପଡିଆକୁ ଓହ୍ଲାଇଥିଲେ ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ।
ଏମାନେ ଅର୍ଦ୍ଧଶତକ ହାସଲ କରି ସ୍କୋରକୁ ୧୮୧ରେ ପହଞ୍ଚାଇଥିଲେ । ଇଂଲଣ୍ଡ ବ୍ୟାଟିଂରେ ମଧ୍ୟ ଏକ ଭଲ ଆରମ୍ଭ କରିଥିଲା। ପାୱାର ପ୍ଲେରେ ଫିଲ୍ ସଲ୍ଟ ଏବଂ ବେନ୍ ଡକେଟ୍ ୬୨ ରନ୍ କରିଥିଲେ । ତଥାପି ଶେଷରେ ଇଂଲଣ୍ଡକୁ ୧୫ ରନରେ ପରାଜୟର ସାମ୍ନା କରିବାକୁ ପଡିଥିଲା।
ମୁମ୍ବାଇର ୱାଙ୍ଖଡେ ଷ୍ଟାଡିୟମ ପିଚ୍ ବ୍ୟାଟରଙ୍କ ପାଇଁ ହେବ ସହାୟକ । ଯଦି ଅନୁମାନ କରାଯାଏ ତେବେ ରବିବାର ଦେଖିବାକୁ ମିଳିବ ଏକ ହାଇ ସ୍କୋରିଂ ମ୍ୟାଚ୍ । ମୁମ୍ବାଇରେ କାକରର ବିଶେଷ ପ୍ରଭାବ ପଡ଼ିବନି । ତଥାପି ଟସ୍ ଜିତିଥିବା ଟିମ୍ ଟାର୍ଗେଟକୁ ପିଛା କରିବାକୁ ନେଇପାରନ୍ତି ନିଷ୍ପତ୍ତି ।
ମ୍ୟାଚ୍ ପୂର୍ବାନୁମାନ ଅନୁଯାୟୀ ଭାରତ ଏବଂ ଇଂଲଣ୍ଡ ମଧ୍ୟରେ ପଞ୍ଚମ ଟି-୨୦ରେ ଜୋରଦାର ଟକ୍କର ଦେଖିବାକୁ ମିଳିବ । ରବିବାର ଟିମ୍ ଇଣ୍ଡିଆ ପ୍ଲେଇଙ୍ଗ ଇଲେଭେନ୍ରେ ପରିବର୍ତ୍ତନ କରିପାରେ । ରବିବାର ନିଜର ଭାରତୀୟ ଟିମ୍ ଷ୍ଟାର ଖେଳାଳିଙ୍କୁ ବିଶ୍ରାମ ଦେଇପାରେ । ଅର୍ଶଦୀପ ସିଂହ ଏବଂ ହାର୍ଦ୍ଦିକ ପାଣ୍ଡ୍ୟା ବିଶ୍ରାମ ନେଇପାରନ୍ତି ।
ଦିନିକିଆ ସିରିଜ ପୂର୍ବରୁ ମହମ୍ମଦ ସାମିଙ୍କୁ ଖେଳିବାକୁ ସୁଯୋଗ ମିଳିପାରେ । ତେବେ ଶିବମ ଦୁବେ ଖେଳିବା ସମ୍ଭାବନା ନାହିଁ । ତାଙ୍କ ସ୍ଥାନରେ ରମଣଦୀପ ସିଂହ କିମ୍ବା ହର୍ଷିତ ରାଣାଙ୍କୁ ଏକାଦଶରେ ସ୍ଥାନ ମିଳିବ । ଭାରତର ଦୁଇ ଓପନର ଅଭିଷେକ ଶର୍ମା ଓ ସଞ୍ଜୁ ସାମସନଙ୍କ ଉପରେ ନଜର ରହିବ ।
