ଲଣ୍ଡନ: ଧନୀମାନଙ୍କ ପାଇଁ ଏକଦା ବିଶ୍ୱର ଆକର୍ଷଣୀୟ କେନ୍ଦ୍ର ପାଲଟିଥିବା ଲଣ୍ଡନର ଚମକ୍ ଏବେ ଫିକା ପଡ଼ିବାରେ ଲାଗିଛି। ଯେଉଁଠି ଦିନେ ଧନୀମାନେ ରହିବାକୁ ଅଧିକ ପସନ୍ଦ କରୁଥିଲେ ଏବେ ସେହି ସହର ସେମାନଙ୍କୁ ଭଲ ଲାଗୁନି। କାରଣ ୨୦୨୪ରେ ବହୁ ସଂଖ୍ୟାରେ କୋଟିପତି ଲଣ୍ଡନ ଛାଡ଼ି ପଳାଇଛନ୍ତି। ଏନଇ ହେନଲି ଆଣ୍ଡ ପାର୍ଟନର୍ସ ନାମକ ଏକ ସଂସ୍ଥା ରିପୋର୍ଟ ଦେଇଛି।
ସଂସ୍ଥାର ନୂଆ ରିପୋର୍ଟ ଅନୁଯାୟୀ, ଜାନୁଆରୀରୁ ଡିସେମ୍ବର ମଧ୍ୟରେ ୧୧,୦୦୦ ରୁ ଅଧିକ କୋଟିପତି ବ୍ରିଟିଶ ରାଜଧାନୀ ଛାଡି ଚାଲି ଯାଇଛନ୍ତି। ତେବେ ଯେଉଁ ଧନୀମାନେ ଲଣ୍ଡନ ଛାଡ଼ିଛନ୍ତି ସେମାନଙ୍କ ମଧ୍ୟରୁ ଅଧିକାଂଶ ଏସିଆ ଏବଂ ଆମେରିକାକୁ ସେମାନଙ୍କର ନୂଆ ଘର ଭାବରେ ବାଛିଛନ୍ତି। ବର୍ଦ୍ଧିତ ଟିକସ, ଆର୍ଥିକ ଅନିଶ୍ଚିତତା ଏବଂ ବ୍ରେକ୍ସିଟର ପରବର୍ତ୍ତୀ ଝଟକାକୁ ଯୋଗୁ ଆରବପତିଙ୍କ ପଳାୟନ ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି।
କୋଟିପତିଙ୍କର ଏଭଳି ପଳାୟନ ଧାରା ଯଦିଓ ନୂଆ ନୁହେଁ, ତେବେ ଗତ ବର୍ଷ ଏଥିରେ ଅଧିକ ବୃଦ୍ଧି ଦେଖିବାକୁ ମିଳିଛି। ବାରମ୍ବାର କୋଟିପତିଙ୍କର ଏଭଳି ପଳାୟନ ଓ ଏହି ଧାରାରେ ବୃଦ୍ଧି ଲଣ୍ଡନ ବୈଭବକୁ ଫିକା କରିଦେଇପାରେ। ବିଶ୍ୱରେ ଧନୀ ରାଜଧାନୀ ନାଁରେ ଲଣ୍ଡନ ଯେଉଁ କ୍ଷାତି ଅର୍ଜନ କରିଛି ଏହା ପ୍ରତି ବିପଦ ସୃଷ୍ଟି ହୋଇପାରେ ବୋଲି ବିଶେଷଜ୍ଞମାନେ ଆକଳନ କରିଛନ୍ତି।
ଲଣ୍ଡନର ଧନୀ ସଂଖ୍ୟାରେ ହ୍ରାସ
ଦଶନ୍ଧୀ ଧରି ଲଣ୍ଡନ ବିଶ୍ୱର କୋଟିପତିଙ୍କ ସହର ଭାବରେ ପ୍ରତିଷ୍ଠା ଅର୍ଜନ କରିଥିଲା। ବିଶ୍ୱର ସବୁଠାରୁ ଧନୀ ସହର ରିପୋର୍ଟ ଅନୁସାରେ, ଲଣ୍ଡନ କେବଳ ୨୦୨୪ରେ ୧୧,୩୦୦ କୋଟିପତଙ୍କୁ ହରାଇଛି। ଏହି ସଂଖ୍ୟା ୟୁରୋପରେ ସର୍ବାଧିକ କୋଟିପତିଙ୍କ ପଳାୟନକୁ ଦର୍ଶାଉଛି। ହେଲେ ବିବାଦ ସତ୍ତ୍ୱେ ବି ମସ୍କୋ ୧ ହଜାର କୋଟିପତିଙ୍କ ପଳାୟନ ସହିତ ଲଣ୍ଡନ ପଛରେ ରହିଛି। ଗୋଟିଏ ବର୍ଷ ମଧ୍ୟରେ ଲଣ୍ଡନରେ ମୋଟ କୋଟିପତିଙ୍କ ସଂଖ୍ୟା ୨୨୭,୦୦୦ ରୁ ୨୧୫,୭୦୦ କୁ ହ୍ରାସ ପାଇଛି। ଫଳସ୍ୱରୂପ, ଦଶନ୍ଧି ପରେ ପ୍ରଥମ ଥର ପାଇଁ ଏହି ସହର ବିଶ୍ୱର 'ଶ୍ରେଷ୍ଠ ୫ ଧନୀ ସହର' ତାଲିକାରୁ ବାଦ ପଡ଼ିଛି।
ହେନଲି ଆଣ୍ଡ ପାର୍ଟନର୍ସ ଏବଂ ନ୍ୟୁ ୱାର୍ଲ୍ଡ ୱେଲଥ୍ ଦ୍ୱାରା ମିଳିତ ଭାବରେ ପ୍ରକାଶିତ ରିପୋର୍ଟ ଅନୁଯାୟୀ, ଲସ୍ ଆଞ୍ଜେଲସ୍ ଲଣ୍ଡନକୁ ପଛରେ ପକାଇ ବିଶ୍ୱର ଧନୀ ସହର ତାଲିକାରେ ଶ୍ରେଷ୍ଠ ୫ରେ ପହଞ୍ଚିଛି। ଦଶନ୍ଧୀ ହେଲା ଲଣ୍ଡନରେ କୋଟିପତିଙ୍କ ପଳାୟନ ଜାରି ରହିଛି, ଯାହା ବିଶ୍ୱ ଦରବାରରେ ଏହି ସହର ଚମକକୁ ଫିକା ପକାଇଛି ବୋଲି ବୋଲି ରିପୋର୍ଟରେ ଉଲ୍ଲେଖ କରାଯାଇଛି। ୨୦୧୪ ପରଠାରୁ ଲଣ୍ଡନ ୧୨ ପ୍ରତିଶତ ଧନୀଙ୍କ ପଳାୟନ ହୋଇଛି ବୋଲି ରିପୋର୍ଟ କହିଛି।
କୋଟିପତିଙ୍କୁ ଟାଣୁଛି ଏସିଆ ଓ ଆମେରିକା
ଉକ୍ତ ରିପୋର୍ଟରେ ଆହୁରି କୁହାଯାଇଛି ଯେ ସର୍ବାଧିକ କୋଟିପତି ଥିବା ଶ୍ରେଷ୍ଠ ୧୦ ସହର ମଧ୍ୟରୁ ୭ଟି ଏସିଆ ଏବଂ ଆମେରିକାରେ ରହିଛି। ସାନ ଫ୍ରାନ୍ସିସ୍କୋର ଉପକୂଳ ବର୍ତ୍ତି ଏରିଆରେ ଗତ ଦଶନ୍ଧି ମଧ୍ୟରେ କୋଟିପତିଙ୍କ ସଂଖ୍ୟାରେ ୯୮% ବୃଦ୍ଧି ସହିତ ୧ ନମ୍ବର ସ୍ଥାନରେ ରହିଥିବା ବେଳେ ତା’ ପଛକୁ ରହିଛି ସିଙ୍ଗାପୁର। ଏଠାରେ କୋଟିପତିଙ୍କ ସଂଖ୍ୟାରେ ୬୨% ବୃଦ୍ଧି ଘଟିଛି।
ନ୍ୟୁୟର୍କ ସିଟି ୩୮୪,୫୦୦ କୋଟିପତିଙ୍କ ସହିତ ବିଶ୍ୱ ତାଲିକାର ଶୀର୍ଷରେ ରହିଥିବା ବେଳେ ଲସ୍ ଆଞ୍ଜେଲସ୍, ଚିକାଗୋ ଏବଂ ଆମେରିକା ଉପକୂଳବର୍ତ୍ତି ଏରିଆ ଶ୍ରେଷ୍ଠ ୧୦ ଧନୀ ସହର ତାଲିକାରେ ସ୍ଥାନ ପାଇଛନ୍ତି। ସେହିପରି ଏସିଆରେ, ଟୋକିଓ, ସିଙ୍ଗାପୁର ଏବଂ ହଂକଂ କୋଟିପତିଙ୍କ କେନ୍ଦ୍ର ପାଲଟିଛନ୍ତି।
ଦୁବାଇ, ଟୋକିଓ ଏବଂ ଲସ୍ ଆଞ୍ଜେଲସ୍ ଭଳି ସହରଗୁଡ଼ିକରେ କୋଟିପତିଙ୍କ ସଂଖ୍ୟାରେ ନିରନ୍ତର ବୃଦ୍ଧି ଦେଖିବାକୁ ମିଳିଛି। ଏହିସହରଗୁଡ଼ିକର ଗତିଶୀଳ ଅର୍ଥନୀତି, ଅନୁକୂଳ ଟିକସ ବ୍ୟବସ୍ଥା ଏବଂ ପ୍ରଗତିଶୀଳ ଟେକ୍ନୋଲୋଜି ଧନୀ ବ୍ୟକ୍ତିମାନଙ୍କୁ ଆକର୍ଷିତ କରୁଛି।
କୋଟିପତିଙ୍କ ପଳାୟନର ଧାରା ଜାରି ରହିଥିବା ସତ୍ତ୍ୱେ, ଲଣ୍ଡନରେ ଏବେ ବି କୋଟିପତିଙ୍କ ସଂଖ୍ୟା ଉଲ୍ଲେଖନୀୟ ରହିଛି। ୨୦୨୪ ଶେଷ ସୁଦ୍ଧା ସହରରେ ୨୧୫,୭୦୦ କୋଟିପତି ରହିଛନ୍ତି। ସେହିପରି ନିକଟରେ ପ୍ରକାଶ ପାଇଥିବା ହୁରୁନ ଗ୍ଲୋବାଲ ରିଚ ଲିଷ୍ଟରେ ଆରବପତିଙ୍କ ତାଲିକାରେ ଲଣ୍ଡନ ଦ୍ୱିତୀୟ ସ୍ଥାନରେ ରହିଥିଲା। ଲଣ୍ଡନରେ ରହିଛନ୍ତି ୯୭ ଜଣ ବିଲେନିୟର ଥିବା ବେଳେ ୧୨୯ ଜଣ ବିଲେନିୟରଙ୍କ ସହି ନ୍ୟୁୟର୍କ ପ୍ରଥମ ସ୍ଥାନରେ ରହିଥିଲା।
