ନୂଆଦିଲ୍ଲୀ: ଭାରତ-ପାକିସ୍ତାନ ସୀମାରେ ଉତ୍ତେଜନା ମଧ୍ୟରେ ସମସ୍ତଙ୍କ ନଜର ଭାରତର ଆକ୍ସନ ଉପରେ। ଏହାରି ଭତରେ ଶକ୍ତି ପ୍ରଦର୍ଶନ କରିଛି ଭାରତୀୟ ବାୟୁସେନା। ୟୁପିର ଶାହଜାହାନପୁରରେ ଭାରତୀୟ ବାୟୁସେନାର ଲଢ଼ୁଆ ବିମାନଗୁଡ଼ିକ ଗଙ୍ଗା ଏକ୍ସପ୍ରେସୱେରେ ନିର୍ମିତ ଏୟାରଷ୍ଟ୍ରିପରେ ଅଭ୍ୟାସ ଆରମ୍ଭ କରିଛନ୍ତି। ଆକାଶରେ ମିରାଜ, ରାଫେଲ, ସୁଖୋଇ ଏବଂ ଜାଗୁଆର ଭଳି ଯୁଦ୍ଧ ବିମାନର ଗର୍ଜନରେ ଶତ୍ରୁ ଦେଶଗୁଡ଼ିକ ଥରି ଉଠିଛନ୍ତି। ୩.୫ କିଲୋମିଟର ଲମ୍ବା ରନୱେରେ ଲଢ଼ୁଆ ବିମାନଗୁଡ଼ିକ ଅବତରଣ ଏବଂ ଉଡ଼ାଣ ଅଭ୍ୟାସ କରୁଛନ୍ତି।
ଗଙ୍ଗା ଏକ୍ସପ୍ରେସୱେ ହେଉଛି ୟୁପିର ଚତୁର୍ଥ ଏପରି ଏକ୍ସପ୍ରେସୱେ ଯାହାର ଏକ ଏୟାରଷ୍ଟ୍ରିପ୍ ଅଛି। ତଥାପି, ଏହା ଦେଶର ପ୍ରଥମ ଏକ୍ସପ୍ରେସୱେ ଯେଉଁଥିରେ ରାତିରେ ଅବତରଣ କରିବାର କ୍ଷମତା ରହିଛି। ଦେଶରେ ପ୍ରଥମ ଥର ପାଇଁ, ରାଜପଥରେ ଦିବା ଲ୍ୟାଣ୍ଡିଂ ପରୀକ୍ଷଣ ସହିତ ରାତିରେ ଲ୍ୟାଣ୍ଡିଂ ପରୀକ୍ଷଣ କରାଯିବ।
ଗୁରୁବାର ଗୃହମନ୍ତ୍ରୀ ଅମିତ ଶାହ କହିଥିଲେ ଯେ ପହଲଗାମ ଆକ୍ରମଣର ପ୍ରତିଶୋଧ ବାଛି ନିଆଯିବ। ଏହାକୁ ଦୃଷ୍ଟିରେ ରଖି, ଭାରତର ପ୍ରସ୍ତୁତି ଜୋରଦାର ହୋଇଛି। ଏବେ ବାୟୁସେନା ଗଙ୍ଗା ଏକ୍ସପ୍ରେସୱେରେ ରାଫେଲ, ସୁଖୋଇ, ଜାଗୁଆର ଲଢ଼ୁଆ ବିମାନ ସହିତ ଉଡ଼ାଣ(ଟେକ୍ ଅଫ୍) ଏବଂ ଅବତରଣ(ଲ୍ୟାଣ୍ଡିଂ) ଅଭ୍ୟାସ କରି ଏକ ଦୃଢ଼ ବାର୍ତ୍ତା ଦେଉଛି। ଅନ୍ୟପକ୍ଷରେ, ନୌସେନା ମଧ୍ୟ ଆରବ ସାଗରରେ ଯୁଦ୍ଧଜାହାଜ ସହିତ ଅଭ୍ୟାସ କରୁଛି।
