ମୁମ୍ଵାଇ ୧୮।୦୪: ବ୍ୟସ୍ତବହୁଳ ଜୀବନଶୈଳୀ ମଧ୍ୟରେ କାମରୁ ଟିକେ ବିରତି ପାଇଲେ ମନ ଶାନ୍ତି ଖୋଜିଥାଏ । କିଛି ଲୋକେ ଏଥିଲାଗି ଯୋଗ, ଧ୍ୟାନ ପ୍ରଭୃତି କରୁଥିବାବେଳେ ଆଉ କିଛି ପାର୍କ ତଥା ପ୍ରାକୃତିକ ପରିବେଶପୂର୍ଣ୍ଣ ସ୍ଥାନକୁ ବୁଲିଯିବାକୁ ପସନ୍ଦ କରନ୍ତି । ଏହି ପରିପ୍ରେକ୍ଷୀରେ ଦେଶର ଆଇଟି ହବ୍ ବେଙ୍ଗାଲୁରୁରୁ ଏକ ଅଜବ ଖବର ସାମ୍ନାକୁ ଆସିଛି । ଜଣେ ସୋସିଆଲ ମିଡିଆ ୟୁଜର ତାକୁ ନିଜର ଏକ୍ସ ଆକାଉଣ୍ଟରେ ସେୟାର କରିଛନ୍ତି । ସେ ଅନୁସାରେ, ମାନସିକ ଚାପ ହ୍ରାସ ଲାଗି ସହରର ଏକ ପାର୍କରେ ଏକ କଂପାନି ପକ୍ଷରୁ ‘ଫରେଷ୍ଟ ବାଥିଂ’(ବନ ସ୍ନାନ) ର ବ୍ୟବସ୍ଥା କରାଯାଇଛି । ସେଥିରେ ଗଛକୁ ଆଲିଙ୍ଗନ କରିବା ଓ ଅନ୍ୟ କିଛି କାର୍ଯ୍ୟକ୍ରମ ଅନ୍ତର୍ଭୁକ୍ତ ରହିଛି । ତେବେ ଏହି କାର୍ଯ୍ୟକ୍ରମରେ ସାମିଲ ହେବାକୁ ବ୍ୟକ୍ତି ପିଛା ଟିକଟର ପରିମାଣ ଯେତିକି ଟଙ୍କା ଧାର୍ଯ୍ୟ କରାଯାଇଛି ତାହା ଶୁଣିଲେ ଆପଣମାନେ ଆଶ୍ଚର୍ଯ୍ୟ ହୋଇଯିବେ ।
ସେଥିଲାଗି ଟିକଟର ଦାମ୍ ରହିଛି ୧୫୦୦ ଟଙ୍କା । ବେଙ୍ଗାଲୁରର କୁବ୍ୱନ ପାର୍କରେ ସେହି କାର୍ଯ୍ୟକ୍ରମର ବ୍ୟବସ୍ଥା ହୋଇଛି । ତାହା ଆସନ୍ତା ୨୮ ତାରିଖ ସକାଳ ୧୦.୩୦ରେ ଆୟୋଜିତ ହେବ । ସୋସିଆଲ ମିଡିଆରେ ଏହି ଖବର ଏବେ ଖୁବ୍ ଭାଇରାଲ ହେଉଥିବାବେଳେ ଏଥିଲାଗି ସ୍ଥିରୀକୃତ ହୋଇଥିବା ଟିକଟ ପରିମାଣକୁ କିନ୍ତୁ ଅନେକ ସମାଲୋଚନା କରୁଛନ୍ତି । ସୂଚନାଥାଉକି, ‘ଫରେଷ୍ଟ୍ ବାଥିଂ’ ବା ବନ ସ୍ନାନ ଜାପାନରେ ପ୍ରଚଳିତ ଏକ ଅଭ୍ୟାସ । ସେ ଅନୁସାରେ, ପ୍ରକୃତି ମଧ୍ୟରେ ଯଥାସମ୍ଭବ ଆରାମ କରିବାକୁ ଉଦ୍ୟମ କରାଯାଇଥାଏ ।
ଲୋକମାନେ ଶାନ୍ତ ମନରେ ଗଛମୂଳରେ ବସି ଦୀର୍ଘଶ୍ୱାସ ନେଇଥାନ୍ତି । ନ ହେଲେ ନିରବରେ ବସି ଗଛଲତାକୁ ଅବଲୋକନ କରିଥାନ୍ତି । ଏହାଦ୍ୱାରା ମାନସିକ ଚାପ ବହୁ ପରିମାଣରେ କମିଯାଇଥାଏ ବୋଲି ବିଶ୍ୱାସ ରହିଛି । ସାଧାରଣତଃ ଏଭଳି ଗତିବିଧି ୧୫ ମିନିଟ୍ରୁ ନେଇ କିଛି ଘଣ୍ଟା ଯାଏ କରାଯାଇଥାଏ । ସ୍ଥଳ ବିଶେଷରେ ଏହା ଗୋଟିଏ ଦିନରୁ ନେଇ କିଛି ସପ୍ତାହବ୍ୟାପୀ ବି ଜାରି ରହେ । ଏହି ସମୟରେ କୌଣସି ପ୍ରକାର ଗ୍ୟାଜେଟ୍ ବ୍ୟବହାର କରିବାରୁ ବିରତ ରହିଥାନ୍ତି ଲୋକେ ।