ନକଲି ଚାଷୀଙ୍କୁ ସରକାରଙ୍କ ନାଲି ଆଖି, ମିଥ୍ୟା ପ୍ଲଟ ଦର୍ଶାଇ ପଞ୍ଜୀକରଣ କରିଥିଲେ ହେବ ଆକ୍ସନ

ଭୁବନେଶ୍ବର: ରାଜ୍ୟରେ ଖରିଫ ଧାନ ଚାଷ ସମୟରେ ମିଥ୍ୟା ପ୍ଲଟ ଥିବା ଦର୍ଶାଇ ପଞ୍ଜିକରଣ କରିଥିବା ଚାଷୀଙ୍କୁ ପ୍ରଥମେ ଜାରି ହେବ କାରଣ ଦର୍ଶାଅ ନୋଟିସ । ତଦନ୍ତ ପରେ ଦୋଷୀ ସାବ୍ୟସ୍ତ ହେଲେ ସରକାର ନେବେ ଦୃଢ଼ କାର୍ଯ୍ୟାନୁଷ୍ଠାନ। ଏହି ସୂଚନା ଦେଇଛନ୍ତି ସମବାୟ ମନ୍ତ୍ରୀ ପ୍ରଦୀପ ବଳସାମନ୍ତ ।

ସୂଚନା ଅନୁଯାୟୀ, ରାଜ୍ୟରେ ୩୧୭ ତହସିଲର ଅଧୀନରେ ୪୧ ହଜାର ୨୫୫ ଗାଁରେ ଏବେ ସାଟେଲାଇଟ ସର୍ଭେ ଜାରି ରହିଛି । ଏଥିରେ ୨୬ ଲକ୍ଷ ୧୪ ହଜାର ୧୫୧ ସନ୍ଦେହ ଥିବା ପ୍ଲଟକୁ ମଧ୍ୟ ସର୍ଭେ କରାଯାଉଛି । ସବୁଠୁ ଅଧିକା ଗଞ୍ଜାମ ଜିଲ୍ଲାରେ ୨ ଲକ୍ଷ ୩୩ ହଜାର ୪୩୮ ସସପେକ୍ଟ ପ୍ଲଟର ସାଟେଲାଇଟ ସର୍ଭେ କରାଯାଉଛି । ସାଟେଲାଇଟ ସର୍ଭେ ସହ ଅଧିକାରୀମାନେ ଫିଲ୍ଡକୁ ଯାଇ ଫିଜିକାଲ ଭେରିଫିକେସନ ମଧ୍ୟ କରୁଛନ୍ତି । ଯେଉଁ ଚାଷୀଙ୍କର ଚାଷ ଜମି ନଥାଇ ମିଛ ପଞ୍ଜିକରଣ କରିଥିବେ ସେମାନଙ୍କୁ ପ୍ରଥମେ କାରଣ ଦର୍ଶାଅ ନୋଟିସ ଜାରି କରିବ ପ୍ରଶାସନ ।ତାପରେ ହେବ କାର୍ଯ୍ୟାନୁଷ୍ଠାନ ।

ପୂର୍ବ ବର୍ଷ ମଧ୍ୟ ନକଲି ଚାଷୀଙ୍କୁ ଧରିବା ପାଇଁ ଅଣ୍ଟା ଭିଡ଼ିଥିଲେ ସରକାର । ଗତ ଥର ୧ ଲକ୍ଷ ୧୪ ହଜାର ପ୍ଲଟ ନକଲି ଥିବା ସର୍ଭେରୁ ଜଣାପଡିଥିଲା । କିନ୍ତୁ କାର୍ଯ୍ୟାନୁଷ୍ଠାନ ହୋଇନଥିଲା । ତେବେ ଚଳିତ ବର୍ଷ ନକଲି ଚାଷୀଙ୍କ ବିରୁଦ୍ଧରେ ସରକାର କାର୍ଯ୍ୟାନୁଷ୍ଠାନ ନେବାକୁ ସ୍ଥିର କରିଛନ୍ତି |

ସେପଟେ ଏନେଇ ସରକାରଙ୍କୁ ଟାର୍ଗେଟ କରିଛନ୍ତି ବିରୋଧୀ । ବିଜେଡି କହିଛି, ସରକାର ଧାନ ନ କିଣିବା ପାଇଁ ବିଭିନ୍ନ ବାହାନା ଦେଖାଇ ଚାଷୀଙ୍କୁ ପଛ ପଟୁ ଛୁରା ମାରିବାକୁ ଯୋଜନା କରୁଛନ୍ତି | କଂଗ୍ରେସ କହିଛି, ଏ ସରକାର ଚାଷୀ ବିରୋଧୀ ସରକାର । ମଣ୍ଡିରୁ ଧାନ ଉଠାଇ ପାରୁନାହାନ୍ତି । ତେଣୁ ଏଥିରୁ ନଜର ହଟାଇବା ପାଇଁ ଏଭଳି ଫନ୍ଦି ଫିକର କରୁଛନ୍ତି ।

ଉଲ୍ଲେଖଯୋଗ୍ୟ, ଚଳିତ ଖରିଫ ଋତୁ ପାଇଁ ଧାନ ବିକ୍ରି ପାଇଁ ୧୯ ଲକ୍ଷ ୬୭ ହଜାର ଚାଷୀ ପଞ୍ଜିକରଣ କରିଛନ୍ତି । ଗତବର୍ଷ ତୁଳନାରେ ଅଧିକ ଚାଷୀ ପଞ୍ଜିକରଣ କରିଥାବାରୁ ସେଥିରେ ଅଧିକ ସଂଖ୍ୟାରେ ନକଲି ଚାଷୀ ଥିବା ଅନୁମାନ କରାଯାଉଛି ।