ନୂଆଦିଲ୍ଲୀ ୧୪।୦୩: ହୋଲି ପାଇଁ ବଜାରରେ ମେଲିଛି ରଙ୍ଗର ପସରା । ଏହା ଦେଖିବାକୁ ଯେତିକି ସୁନ୍ଦର ଲାଗୁଛି, ସେତିକି ବିପଦପୂର୍ଣ୍ଣ । ଏଗୁଡ଼ିକ ଦୃଷ୍ଟିଶକ୍ତି ହରାଇବା ଠାରୁ ଆରମ୍ଭ କରି କର୍କଟ ରୋଗ ପର୍ଯ୍ୟନ୍ତ ବିପଦ ସୃଷ୍ଟି କରେ । କେବଳ ଏତିକି ନୁହେଁ, ଏହି ରଙ୍ଗଗୁଡ଼ିକ ମୃତ୍ୟୁର କାରଣ ମଧ୍ୟ ହୋଇପାରେ । ଜାଣି ଆଶ୍ଚର୍ଯ୍ୟ ହେବେ ବଜାରରେ ଉପଲବ୍ଧ ହର୍ବାଲ ରଙ୍ଗର ପ୍ୟାକେଜିଂରେ ମଧ୍ୟ ଅପମିଶ୍ରିତ ହେଉଛି । ଯାହା ବିପଦକୁ ଆହୁରି ବଢାଉଛି । ଏହି ତିନୋଟି ରଙ୍ଗ ସିଧାସଳଖ ମୃତ୍ୟୁକୁ ନିମନ୍ତ୍ରଣ କରୁଛି। ଆସନ୍ତୁ ଜାଣିବା ଏହି ରଙ୍ଗଗୁଡ଼ିକ ବିଷୟରେ...
୧. ସିଲଭର କଲର୍ । ଏହାକୁ ସବୁଠାରୁ ବିପଦଜନକ ରଙ୍ଗ ବିବେଚନା କରାଯାଏ। ଏହା ଏକ ଗାଢ଼ ରଙ୍ଗ। ଏହି ରଙ୍ଗକୁ ଚମକଦାର ଏବଂ ସ୍ଥାୟୀ କରିବା ପାଇଁ ଏଥିରେ ଆଲୁମିନିୟମ ବ୍ରୋମାଇଡ୍ ମିଶାଯାଏ । ଯାହା ସିଧାସଳଖ ଚର୍ମ କର୍କଟ ରୋଗର କାରଣ ହୋଇପାରେ । ତେଣୁ ଏହି ରଙ୍ଗଠାରୁ ନିଜକୁ ଏବଂ ପ୍ରିୟଜନଙ୍କୁ ଦୂରେଇବାକୁ ଚେଷ୍ଟା କରନ୍ତୁ।
୨. ଉଜ୍ଜ୍ୱଳ ରଙ୍ଗ । ଏଗୁଡିକ ଆକର୍ଷଣୀୟ ଦେଖାଯାଇଥାଏ । କିନ୍ତୁ ଏଥିରେ ହୋଲି ଖେଳିବା ଉଚିତ୍ ନୁହେଁ । ଏହି ପ୍ରକାରର ରଙ୍ଗରେ କାଚ ମିଶ୍ରିତ ହୋଇଥାଏ । ଯାହା ଚର୍ମ ଆଲର୍ଜିର ଆଶଙ୍କା ବଢ଼ାଇଥାଏ। ଏହି କାରଣରୁ ୮୦ ପ୍ରତିଶତ ପର୍ଯ୍ୟନ୍ତ ଆଲର୍ଜି ହେବାର ଆଶଙ୍କା ରହିଛି।
୩. ଯଦି ଆପଣ ହୋଲି ଖେଳିବାକୁ ଯାଉଛନ୍ତି, ତେବେ ଗାଢ଼ ସବୁଜ ରଙ୍ଗକୁ ମଧ୍ୟ ଏଡାନ୍ତୁ । ଏହି ରଙ୍ଗ ବଜାରରେ ବହୁତ ବିକ୍ରି ହୁଏ । ଏହି ରଙ୍ଗର ଗୁଲାଲ ମଧ୍ୟ ବହୁ ପରିମାଣରେ କିଣାଯାଏ। ଏହା ଦେଖିବାକୁ ସୁନ୍ଦର ସେଥିପାଇଁ ଲୋକମାନେ ଏହା ପ୍ରତି ଅଧିକ ଆକର୍ଷିତ ହୁଅନ୍ତି। ଏହି ରଙ୍ଗରେ କପର ସଲଫେଟ୍ ମିଶାଯାଏ, ଯାହା ଆଖି ରୋଗର କାରଣ ହୋଇପାରେ । ଯଦି ଏହି ରଙ୍ଗ ଆଖିରେ ପଶିଯାଏ ତେବେ ଏହା ଦୃଷ୍ଟିଶକ୍ତିକୁ ମଧ୍ୟ ପ୍ରଭାବିତ କରିପାରେ ।
ଏବେ ପ୍ରଶ୍ନ ଆସୁଛି, ବିପଦପୂର୍ଣ୍ଣ ହୋଲି ରଙ୍ଗକୁ କେମିତି ଚିହ୍ନିବେ ? ଉଜ୍ଜ୍ୱଳ ରଙ୍ଗ କିଣିବା ଠାରୁ ଦୂରେଇ ରୁହନ୍ତୁ । ଗାଢ଼ ରଙ୍ଗ ବଦଳରେ ହାଲୁକା ରଙ୍ଗ ବ୍ୟବହାର କରନ୍ତୁ । କାରଣ ରଙ୍ଗକୁ ଘନ କରିବା ପାଇଁ ଅଧିକ ରାସାୟନିକ ପଦାର୍ଥ ମିଶାଯାଇଥାଏ।
ଅଳ୍ପ ପାଣି ନେଇ ରଙ୍ଗକୁ ଚିହ୍ନଟ କରିପାରିବ । ଯଦି ରଙ୍ଗରେ ରାସାୟନିକ ପଦାର୍ଥ କିମ୍ବା ସୀସା ଥାଏ, ତେବେ ଏହା ପାଣିରେ ଦ୍ରବୀଭୂତ ହେବନି ।
ଯଦି ରଙ୍ଗ କିମ୍ବା ଗୁଲାଲରୁ ପେଟ୍ରୋଲ କିମ୍ବା ରାସାୟନିକ ପଦାର୍ଥ ପରି ଗନ୍ଧ ଆସେ, ତେବେ ବୁଝିଯାଆନ୍ତୁ ଯେ ଏହା ସ୍ୱାସ୍ଥ୍ୟ ପାଇଁ ବିପଦପୂର୍ଣ୍ଣ ହୋଇପାରେ।
