ଆଶାରାମ ବାପୁଙ୍କୁ ୬ ମାସ ଅନ୍ତରୀଣ ଜାମିନ, ସ୍ୱାସ୍ଥ୍ୟ ଆଧାରରେ ମିଳିଲା ଆଶ୍ୱସ୍ତି

ଯୋଧପୁର ୨୯।୧୦: ରାଜସ୍ଥାନ ହାଇକୋର୍ଟ ୨୯ ଅକ୍ଟୋବର ବୁଧବାର ନାବାଳିକା ଦୁଷ୍କର୍ମ ଦୋଷୀ ଆଶାରାମ ବାପୁଙ୍କୁ ସ୍ୱାସ୍ଥ୍ୟ ଆଧାରରେ ୬ ମାସ ଅନ୍ତରୀଣ ଜାମିନ ମଞ୍ଜୁର କରିଛନ୍ତି। ୨୦୧୮ ମସିହାରୁ ଯୋଧପୁର ସେଣ୍ଟ୍ରାଲ ଜେଲରେ ଆଜୀବନ କାରାଦଣ୍ଡ ଭୋଗୁଥିବା ୮୪ ବର୍ଷ ବୟଷ୍କ ଆଶାରାମ ଏବେ ପ୍ରାଇଭେଟ ହସ୍ପିଟାଲରେ ତାଙ୍କର ଚିକିତ୍ସା କରାଇ ପାରିବେ। ଶରଳ ଶବ୍ଦରେ କୋର୍ଟ ତାଙ୍କ ମେଡିକାଲ ରିପୋର୍ଟ ସମୀକ୍ଷା କରିବା ପରେ ଏହି ନିଷ୍ପତ୍ତି ନେଇଛନ୍ତି। କାରଣ ଜେଲରେ ତାଙ୍କ ଚିକିତ୍ସା ପାଇଁ ପର୍ଯ୍ୟାପ୍ତ ସୁବିଧା ନାହିଁ।

କାର୍ଯ୍ୟକାରୀ ମୁଖ୍ୟ ବିଚାରପତି ଜଷ୍ଟିସ୍ ସଞ୍ଜୀବ ପ୍ରକାଶ ଶର୍ମା ଓ ଜଷ୍ଟିସ୍ ସଙ୍ଗିତା ଶର୍ମାଙ୍କ ଡିଭିଜନ ବେଞ୍ଚଙ୍କ ଶୁଣାଣିରେ ଆଶାରାମଙ୍କୁ ଜାମିନ ମଞ୍ଜୁର କରାଯାଇଛି। ୧୨ ବର୍ଷ ହେଲା ଜେଲଦଣ୍ଡ ଭୋଗୁଥିବା ଆଶାରାମ ଜେଲରୁ ବାହାରିବାର ଏହା ତୃତୀୟ ଘଟଣା। ଜାମିନ ମିଳିଯାଇଥିବାରୁ ଏବେ ଆଶାରାମଙ୍କୁ ସୁପ୍ରିଭାଇଜଡ ମେଡିକାଲ କେୟାରରେ ରଖାଯିବ। ଏହା ପୂର୍ବରୁ ଆଶାରାମଙ୍କୁ ୩ ଥର ଅନ୍ତରୀଣ ଜାମିନ ମିଳିଲାଣି। ତେବେ ଆଶାରାମଙ୍କ ପକ୍ଷରୁ ତାଙ୍କ ଦଣ୍ଡ ନିଲମ୍ବନ ଓ ନିୟମିତ ଜାମିନ ନିମନ୍ତେ ଅନୁରୋଧ କରାଯାଇଥିଲା।

ଆଶାରାମଙ୍କ ଓକିଲ ଦେବଦତ୍ତ କାମତ୍ ତର୍କ ରଖିଥିଲେ ଯେ ତାଙ୍କ ମହକିଲ ଦୀର୍ଘ ଦିନରୁ ଅସୁସ୍ଥ ଅଛନ୍ତି ଓ ଜେଲରେ ତାଙ୍କର ଉଚିତ ଚିକିତ୍ସା ସମ୍ଭବ ନୁହେଁ। ଏଣୁ ତାଙ୍କୁ ବିନା ଅଟକରେ ଜାମିନ ଦେଲେ ତାଙ୍କ ଚିକିତ୍ସା ସହଜ ହୋଇ ପାରିବ। ଅପରପଟେ ଅତିରିକ୍ତ ମହାଧିବକ୍ତା ଦୀପକ ଚୌଧୁରୀ ତଥା ପୀଡ଼ିତାଙ୍କ ଓକିଲ ପି.ସି. ସୋଲଙ୍କୀ ଜାମିନ ନିବେଦନକୁ ବିରୋଧ କରିଥିଲେ। ଉଭୟପକ୍ଷର ତର୍କ ଶୁଣିବା ପରେ ଖଣ୍ଡପୀଠ ଆଶାରାମଙ୍କୁ ୬ ମାସ ଅନ୍ତରୀଣ ଜାମିନ ମଞ୍ଜୁର କରିଛନ୍ତି।

ପାଖାପାଖି ୧୨ ବର୍ଷ ଜେଲରେ ବିତାଇବା ପରେ ଆଶାରାମଙ୍କୁ ପ୍ରଥମ ଥର ୭ ଜାନୁୟାରୀ ୨୦୨୫ରେ ଚିକିତ୍ସା ଆଧାରରେ ଅନ୍ତରୀଣ ଜାମିନ ମଞ୍ଜୁର କରାଯାଇଥିଲା। ଯାହାକୁ ପରେ ଜୁଲାଇ ଓ ଅଗଷ୍ଟରେ ସମ୍ପ୍ରସାରଣ କରାଯାଇଥିଲା। ବିଚାରପତି ଜଷ୍ଟିସ୍ ଦିନେଶ ମେହେଟ୍ଟା ଓ ଜଷ୍ଟିସ୍ ଭିନିତ କୁମାର ମାଥୁରଙ୍କ ପୀଠ ଅଗଷ୍ଟ ୨୭ରେ ଅନ୍ତରୀଣ ଜାମିନ ଅବଧି ବଢାଇବାକୁ ମନା କରିଦେଇଥିଲେ ଓ ଆଶାରାମଙ୍କ ଆବେଦନ ଅଗ୍ରାହ୍ୟ କରିଦେଇଥିଲେ। ଏଣୁ ଅଗଷ୍ଟ ୩୦ ତାରିଖରେ ଆଶାରାମ ଆତ୍ମସମର୍ପଣ କରିଦେଇଥିଲେ।