ରୁଷ ଓ ୟୁକ୍ରେନ ମଧ୍ୟରେ ଯୁଦ୍ଧବିରତି ପାଇଁ ହେଲା ଭୋଟିଂ, ୧୦୭ ଦେଶର ମିଳିଲା ସମର୍ଥନ; ଭାରତ କ’ଣ କଲା ?

ନୂଆଦିଲ୍ଲୀ: ରୁଷ ଓ ୟୁକ୍ରେନ ମଧ୍ୟରେ ଯୁଦ୍ଧବିରତି ପାଇଁ ଜାତିସଂଘ ମହାସଭାରେ ଏକ ପ୍ରସ୍ତାବ ଉପରେ ଭୋଟିଂ ହୋଇଛି । ଏହାକୁ ୧୦୭ ଦେଶର ସମର୍ଥନ ମିଳିଛି । ଅନ୍ୟପଟେ ୧୨ ଦେଶ ଏହା ବିରୋଧରେ ମତଦାନ ଦେଇଥିଲେ । ତେବେ ପୂର୍ବଥର ପରି ଏଥର ବି ଭାରତ ନିଜର ଅଭିମୁଖ୍ୟରେ ପରିବର୍ତ୍ତନ କରିନାହିଁ । ଭାରତ ଏହି ପ୍ରସ୍ତାବ ଉପରେ ମତଦାନରେ ଭାଗ ନେଇ ନଥିଲା । ଏହି ପ୍ରସ୍ତାବରେ ରୁଷ ଓ ୟୁକ୍ରେନ ମଧ୍ୟରେ ତତ୍କାଳ, ପୂର୍ଣ୍ଣ ଓ ବିନା ସର୍ତ୍ତରେ ଯୁଦ୍ଧବିରତି ଦାବି କରାଯାଇଛି ।

ୟୁକ୍ରେନ ଦ୍ୱାରା ଅଣାଯାଇଥିବା ପ୍ରସ୍ତାବ ଉପରେ ମତଦାନ କରିନଥିବା ୫୧ ଦେଶ ମଧ୍ୟରେ ଭାରତ ବ୍ୟତୀତ ଅନ୍ୟ ପ୍ରମୁଖ ରାଷ୍ଟ୍ର ମଧ୍ୟ ସାମିଲ ଅଛନ୍ତି । ଏମାନଙ୍କ ମଧ୍ୟରେ ଆମେରିକା, ଚୀନ, ବ୍ରାଜିଲ୍, ଦକ୍ଷିଣ ଆଫ୍ରିକା, ୟୁଇଏ, ବାଂଲାଦେଶ, ଶ୍ରୀଲଙ୍କା, ବାହାରିନ ସାମିଲ ଅଛନ୍ତି ।

I am grateful to each of the 107 countries that stood with Ukraine today in defense of life at the @UN.

The General Assembly adopted our resolution in support of a lasting peace, with clear calls for a full ceasefire and the return of our people.

These are the right and… pic.twitter.com/s5tmD1Bymm

— Volodymyr Zelenskyy / Володимир Зеленський (@ZelenskyyUa) February 24, 2026

ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ପ୍ରସ୍ତାବର ସମର୍ଥନ କରିଥିବା ୧୦୭ ଦେଶକୁ କୃତଜ୍ଞତା ଜଣାଇଛନ୍ତି । ସେ ଏହାକୁ ସ୍ଥାୟୀ ଶାନ୍ତି, ପୂର୍ଣ୍ଣ ଯୁଦ୍ଧବିରତି ଓ ୟୁକ୍ରେନ ନାଗରିକଙ୍କ ପ୍ରତ୍ୟାବର୍ତ୍ତନ ପାଇଁ ଏକ ଜରୁରୀ ପଦକ୍ଷେପ ବୋଲି କହିଛନ୍ତି । ସେ ଏକ୍ସରେ ଲେଖିଛନ୍ତି, 'ମୁଁ ସେଇ ୧୦୭ ଦେଶ ମଧ୍ୟରୁ ପ୍ରତ୍ୟେକଙ୍କ ପ୍ରତି କୃତଜ୍ଞତା ଜଣାଉଛି, ଯେଉଁମାନେ ଆଜି ଜାତିସଂଘରେ ଜୀବନର ରକ୍ଷା ପାଇଁ ୟୁକ୍ରେନ ସହ ଛିଡ଼ା ହୋଇଛନ୍ତି । ମହାସଭାରେ ସ୍ଥାୟୀ ଶାନ୍ତିର ସମର୍ଥନରେ ଆମର ପ୍ରସ୍ତାବକୁ ଗ୍ରହଣ କରିଛନ୍ତି, ଯେଉଁଥିରେ ପୂର୍ଣ୍ଣ ଯୁଦ୍ଧବିରତି ଓ ଆମ ଲୋକଙ୍କ ପ୍ରତ୍ୟାବର୍ତ୍ତନର ସ୍ପଷ୍ଟ ଆହ୍ୱାନ କରାଯାଇଛି ।'