ନୂଆଦିଲ୍ଲୀ ୫।୫: କେରଳସ୍ଥିତ ହିନ୍ଦୁ ସଙ୍ଗଠନ ଶ୍ରୀ ନାରାୟଣ ମାନବଧର୍ମମ ଟ୍ରଷ୍ଟ ୱାକଫ(ସଂଶୋଧନ) ଅଧିନିୟମ ୨୦୨୫କୁ ଚ୍ୟାଲେଞ୍ଜ କରି ସୁପ୍ରିମକୋର୍ଟକୁ ପହଞ୍ଚିଛି। ଋଷି ତଥା ଦାର୍ଶନିକ ଶ୍ରୀ ନାରାୟଣ ଗୁରୁଙ୍କ ଆଦର୍ଶ ଓ ଶିକ୍ଷାର ଅଧ୍ୟୟନ ତଥା ପ୍ରସାର ନିମନ୍ତେ ୨୦୨୩ରେ ସ୍ଥାପିତ ଟ୍ରଷ୍ଟ ସଂଶୋଧିତ ୱାକଫ ଆଇନର ପ୍ରାବଧାନକୁ ଚ୍ୟାଲେଞ୍ଜ କରୁଥିବା ପିଟିସନ ସମୂହରେ ହସ୍ତକ୍ଷେପ କରିବାକୁ ଦାବି କରିଛି। ଟ୍ରଷ୍ଟ ତର୍କରେ କହିଛି ଯେ ଏହି ଆଇନ ଭାରତରେ ମୁସଲମାନ ସମୂଦାୟର ଅସ୍ତିତ୍ୱକୁ ବିପଦରେ ପକାଉଛି।
ଟ୍ରଷ୍ଟପକ୍ଷରୁ ଶୀର୍ଷ ନ୍ୟାୟାଳୟଙ୍କୁ କୁହାଯାଇଛି ଯେ ଭାରତର ମୁସଲମାନ ସମୂଦାୟ ଓ ଆମ ଦେଶର ସାମାଜିକ ନ୍ୟାୟ ଉପରେ ସମଗ୍ର ରୂପେ ଥୋପି ଦିଆଯାଇଥିବା ଅଧିନିୟମର ବିନାଶକାରୀ ପ୍ରଭାବକୁ ‘ଶ୍ରୀ ନାରାୟଣ ମାନବ ଧର୍ମ ଟ୍ରଷ୍ଟ’ ମୁକ ଦର୍ଶକ ଭାବେ ଦେଖି ପାରିବ ନାହିଁ। ତେବେ ସୁପ୍ରିମକୋର୍ଟ ମାମଲାରେ ଆଉ ଅଧିକ ପିଟିସନ ରୁଜୁ କରିବା ଉପରେ ରୋକ ଲଗାଇଛନ୍ତି ଓ କହିଛନ୍ତି ଆଇନକୁ ଚ୍ୟାଲେଞ୍ଜ କରୁଥିବା ଲୋକେ ମହଜୁଦ ଆବେଦନକାରୀଙ୍କ ତର୍କରେ ହସ୍ତକ୍ଷେପ ଆବେଦନ ସଂଯୁକ୍ତ କରିପାରିବେ।
ସେହି ଅନୁସାରେ ହସ୍ତକ୍ଷେପ ଆବେଦନରେ ଟ୍ରଷ୍ଟ କହିଛି ଯେ ଏହି ଆଇନ ଭାରତରେ ୱାକଫକୁ ସମାପ୍ତ କରିଦେଉଛି। ଆବେଦନରେ କୁହାଯାଇଛି ଯେ ‘ଉଲ୍ଲେଖିତ ଅଧିନିୟମ ସ୍ପଷ୍ଟ ରୂପେ କିନ୍ତୁ ତ୍ରୁଟିପୂର୍ଣ୍ଣ ଉପାୟରେ ୱାକଫ ତନ୍ତ୍ରକୁ ଏକ ଅଣଧାର୍ମିକ ସଂସ୍ଥା ରୂପେ ଦେଖୁଛି, ଏହି ପ୍ରକାର ୱାକଫର ମୂଳ ଆଇନ ଇସ୍ଲାମୀ ଆଇନ ଢାଞ୍ଚାକୁ ସମ୍ପୂର୍ଣ୍ଣ ରୂପେ ହଟାଇ ଦେଉଛି। ଉଲ୍ଲେଖିତ ଅଧିନିୟମ ନିର୍ଦ୍ଧାରିତ ଆଇନ ଦ୍ୱାରା ଇସ୍ଲାମୀ ଆଇନକୁ ବଦଳାଇ ଦେଉଛି’।
ଏଥିରେ କୁହାଯାଇଛି ଯେ ସଂଶୋଧିତ ଆଇନ ଦେଶରେ ସମଗ୍ର ମୁସଲମାନ ସମୂଦାୟ ଉପରେ ମୁସଲମାନମାନଙ୍କ ଦ୍ୱାରା ଧର୍ମାର୍ଥ ଦାନକୁ ନିୟନ୍ତ୍ରିତ କରିବା ପାଇଁ ଏକ ରାଜ୍ୟ ନିର୍ମିତ ଓ ରାଜ୍ୟ ଦ୍ୱାରା ଲାଗୁ ଏକ ଅସାମ୍ବିଧାନିକ ଯୋଜନା କାର୍ଯ୍ୟକାରୀ କରୁଛି। ଆବେଦନରେ କୁହାଯାଇଛି ଯେ ଉଲ୍ଲେଖିତ ଅଧିନିୟମ ଆଇନ ପରିସରରୁ ବାହାରେ, କାରଣ ସଂସଦ ନିକଟରେ ଲୋକଙ୍କ କୌଣସି ବର୍ଗ ଉପରେ ଏପରି ଯୋଜନା ଲାଗୁ କରିବାର କୌଣସି ଅଧିକାର ନାହିଁ। ଏହା ସମ୍ବିଧାନ ସହିତ ଏକ ଧୋକା। ରାଜ୍ୟ ଦ୍ୱାରା ଡିଜାଇନ କରାଯାଇଥିବା ଓ ରାଜ୍ୟ ଦ୍ୱାରା ଲାଗୁ ହେଉଥିବା ଏହି ଆଇନର ଅନୁଚ୍ଛେଦ ୨୧,୨୫,୨୬ ଓ ୨୯ (୧)ଧାରାରେ ମୁସଲମାନ ସମୂଦାୟଙ୍କ ସାମ୍ବିଧାନିକ ଅଧିକାରକୁ ଉଲ୍ଲଂଘନ କରୁଛି।
ଏଥିରେ ଏହା ବି ତର୍କ ଦିଆଯାଇଛି ଯେ ୱାକଫ ତନ୍ତ୍ରର ସରକାରୀ ଅଧିଗ୍ରହଣର ପରିଣାମ ରୂପେ ମୁସଲମାନ ସମୂଦାୟ ନିଜର ଧର୍ମ ପାଳନ ନିମନ୍ତେ ଆର୍ଥିକ ଓ ବିତ୍ତିୟ ସାଧନରୁ ବଞ୍ଚିତ ହୋଇଯିବ। ଏହି ପ୍ରକାରେ ୱାକଫ ସଂଶୋଧନ ଅଧିନିୟମ ଭାରତରେ ମୁସଲମାନ ସମୂଦାୟର ଅସ୍ତିତ୍ୱକୁ ବିପଦରେ ପକାଉଛି, ଯାହା ନିଜର ଅସ୍ତିତ୍ୱ ଲାଗି ୱାକଫ ତନ୍ତ୍ର ଉପରେ ନିର୍ଭର କରୁଛି। ଏହା ଶହଶହ ବର୍ଷରୁ ଭାରତରେ ଇସ୍ଲାମର ପାଳନ ଓ ଅସ୍ତିତ୍ୱ ନିମନ୍ତେ ଆବଶ୍ୟକ ଆର୍ଥିକ ଓ ବିତ୍ତିୟ ସଂସାଧନର ସବୁଠୁ ଗୁରୁତ୍ୱପୂର୍ଣ୍ଣ ସ୍ରୋତ ରହି ଆସିଛି ଓ ଆଜି ବି ସ୍ରୋତ ହୋଇ ରହିଛି।
ଆବେଦନରେ କୁହାଯାଇଛି ଯେ ଉଲ୍ଲେଖିତ ଅଧିନିୟମ ମୁସଲମାନ ସମୂଦାୟର ଆର୍ଥିକ ଓ ବିତ୍ତିୟ ନିଅଁକୁ ସମାପ୍ତ କରିଦେବ। ଆଡଭୋକେଟ୍ ବୈଭବ ଚୌଧୁରୀଙ୍କ ମାଧ୍ୟମରେ ରୁଜୁ ପିଟିସନକୁ ଆଜଡଭୋକେଟ ଡ. ଜୀ ମହୋନ ଗୋପାଲ ପ୍ରସ୍ତୁତ କରିବା ସହ ଉପସ୍ଥାପନ କରିଛନ୍ତି।
