ହଂକଂ ଓ ମାଲେସିୟା ଭଳି ଦେଶଙ୍କୁ ପଛରେ ପକାଇଲା ଭାରତ, କରରୁ ଅଧିକ ହେଲା GDP ଅନୁପାତ

ନୂଆଦିଲ୍ଲୀ ୨୫।୧: ଭାରତର କର (ଟ୍ୟାକ୍ସ)ରୁ ଜିଡିପି ଅନୁପାତ ବଢି ୧୯.୬% ହୋଇଯାଇଛି। ଏହା ଅନ୍ୟ ପ୍ରଗତିଶୀଳ ବଜାର ହଂକଂ, ଇଣ୍ଡୋନେସିଆ ଓ ମାଲେସିୟା ଠାରୁ ଯଥେଷ୍ଟ ଅଧିକ। ଏହି ସୂଚନା ବ୍ୟାଙ୍କ ଅଫ ବରୋଦାର ଏକ ରିପୋର୍ଟରେ ଦିଆଯାଇଛି। ଅଧିକ କରରୁ ଜିଡିପି ଅନୁପାତ ଦେଶର କର ଦକ୍ଷତା ବଢୁଥିବା ଓ କର ସଂଗ୍ରହ ସୁଧାର ହେଉଥିବାର ଦର୍ଶାଉଛି। ଏଥିରେ କେନ୍ଦ୍ର ଓ ରାଜ୍ୟ ସରକାର ପକ୍ଷରୁ କର ସଂଗ୍ରହ ମଧ୍ୟ ସାମିଲ।

ରିପୋର୍ଟରେ କୁହାଯାଇଛି ଯେହେତୁ ଭାରତର କେନ୍ଦ୍ରୀୟ ସକଳ କର ରାଜସ୍ୱ ଜିଡିପିର ୧୧.୭%ରୁ କମ, ହେଲେ ସମଗ୍ର ସମନ୍ୱିତ ତଥ୍ୟ ରାଜ୍ୟମାନଙ୍କର ଦୃଢ ଭାଗିଦାରୀ ଓ ପୁରା ସିଷ୍ଟମରେ ଉଲ୍ଲେଖନୀୟ ଅନୁପାଳନକୁ ଦର୍ଶାଉଛି। ହେଲେ ଏବେବି ଭାରତର କରରୁ ଜିଡିପି ଅନୁପାତ ଜର୍ମାନର ୩୮% ଓ ଆମେରିକାର ୨୫.୬%ରୁ ମଧ୍ୟ ଢେର ପଛରେ ରହିଛି। ବ୍ୟାଙ୍କ ଅଫ ବରୋଦା କହିଛି ଯେ ବିଶେଷ ରୂପେ ଦେଶର ଅନୁକୁଳ ଜନସାଂଖିକୀୟ ସ୍ଥିତିରୁ ଦେଖିଲେ ଏହି ଅନ୍ତର ଭାରତ ନିମନ୍ତେ ଏକ ବଡ଼ ନୀତିଗତ ଅବସର ପ୍ରସ୍ତୁତ କରୁଛି।

ରିପୋର୍ଟରେ କୁହାଯାଇଛି ଯେ ସରକାର ସରଳିକରଣ, ସଂଯୁକ୍ତିକରଣ ଓ ଡିଜିଟାଲକରଣ ଉଦ୍ଦେଶ୍ୟରେ ବ୍ୟାପକ କର ସଂଶୋଧନ ଉପରେ ଧ୍ୟାନ କେନ୍ଦ୍ରିତ କରୁଛନ୍ତି। ଏହି ଉଦ୍ୟମ ଯୋଗୁ ଆଗାମୀ ବର୍ଷମାନଙ୍କରେ କରରୁ ଜିଡିପି ଅନୁପାତ ବୃଦ୍ଧି ହେବାର ଆଶା କରାଯାଉଛି। ଆୟକର ଅଧିନିୟମ ୨୦୨୫ର ପ୍ରାରମ୍ଭ ଓ କର୍ପୋରେଟ କରର ସଂରଚନା ସରଳିକରଣ ସହିତ ପ୍ରମୁଖ ନିୟାମକୀୟ ପଦକ୍ଷେପ ଯୋଗୁ ପାରଦର୍ଶିତାରେ ସୁଧାର ଓ ଅନୁପାଳନ ସହଜ ହେବ ବୋଲି ଅନୁମାନ କରାଯାଉଛି। ନୂଆ ଆୟକର ଅଧିନିୟମ ଯାହା ୧ ଏପ୍ରିଲ ୨୦୨୬ରୁ କାର୍ଯ୍ୟକାରୀ ହେବ ତାହା ଅନୌପଚାରିକ ଅର୍ଥବ୍ୟବସ୍ଥାର ଅଧିକାଂଶ ଭାଗକୁ ଔପଚାରିକ ପ୍ରଣାଳୀକୁ ଆଣି କର ଆଧାରକୁ ବ୍ୟାପକ କରିପାରେ।

ରିପୋର୍ଟରେ କୁହାଯାଇଛି ଯେ ଐତିହାସିକ ବିଶ୍ଲେଷଣରୁ ଜଣାପଡୁଛି ଯେ ସମୟ ସହିତ କର ସଂଗ୍ରହ ଓ ନୋମିନାଲ ଜିଡିପିରେ ନିକଟତା ବଢିବାକୁ ଲାଗିଛି। ରିପୋର୍ଟରେ କୁହାଯାଇଛି ଆୟକର ସଂଗ୍ରହର ନୋମିନାଲ ଜିଡିପି ଓ ପ୍ରତିବ୍ୟକ୍ତି ଆୟ ଉଭୟ ସହିତ ମଜଭୁତ ସହବନ୍ଧନ ଦେଖାଉଛି। ଯାହା ବର୍ଦ୍ଧିତ ଆୟ ଓ ଉନ୍ନତ ଅନୁପାଳନକୁ ଦର୍ଶାଉଛି। କମ୍ପାନୀଙ୍କୁ ଅଧିକ ଲାଭ ମିଳୁଥିବାରୁ କର୍ପୋରେଟ କର ସଂଗ୍ରହରେ ମଧ୍ୟ ଲାଭ ହୋଇଛି।