ବସ୍ ଧକ୍କାରେ ତଳେ ପଡ଼ିଗଲେ ଶ୍ରମିକ, ମାଡ଼ି ଚାଲିଗଲା ଟ୍ରକ୍; ୬ ମୃତ

ଭାଗଲପୁର: ବିହାରର ଭାଗଲପୁର ଜିଲ୍ଲାରେ ମଙ୍ଗଳବାର ସନ୍ଧ୍ୟାରେ ଏକ ବଡ଼ ସଡ଼କ ଦୁର୍ଘଟଣା ଘଟିଛି। ଏଥିରେ ୬ ଜଣ ଶ୍ରମିକଙ୍କ ମୃତ୍ୟୁ ଘଟିଛି ଏବଂ ପ୍ରାୟ ୧୫ ଜଣ ଆହତ ହୋଇଛନ୍ତି। ରିପୋର୍ଟ ଅନୁସାରେ, ଝଣ୍ଡାପୁର ଥାନା ଅଞ୍ଚଳର NH-31 ରେ ଏହି ଦୁର୍ଘଟଣା ଘଟିଛି।

ଦୟାଲପୁର ଏବଂ ବାଗଡି ଓଭରବ୍ରିଜ୍ ମଧ୍ୟରେ ପ୍ରାୟ ୧୨ ଜଣ ଶ୍ରମିକ ଏକ ଗାଡ଼ିରେ ଯାତ୍ରା କରୁଥିଲେ। ସୂଚନା ଅନୁଯାୟୀ, ଶ୍ରମିକମାନଙ୍କ ଗାଡ଼ିଟି ପ୍ରଥମେ ଏକ ବସ୍ ସହିତ ଧକ୍କା ହୋଇଥିଲା ଏବଂ ଓଲଟି ପଡ଼ିଲା । ଏଥିରେ ବସିଥିବା ଶ୍ରମିକମାନେ ରାସ୍ତା ଉପରେ ପଡ଼ି ଯାଇଥିଲେ।

ଏହି ସମୟରେ, ପଛରୁ ଆସୁଥିବା ଏକ ଟ୍ରକ୍ ଏହି ଶ୍ରମିକମାନଙ୍କ ଉପରେ ଚଢ଼ିଯାଇଥିଲା । ଫଳରେ ଘଟଣାସ୍ଥଳରେ ୬ ଜଣଙ୍କର ମୃତ୍ୟୁ ହୋଇଛି । ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ, ପୋଲିସ ପହଞ୍ଚି ଆହତମାନଙ୍କୁ ଡାକ୍ତରଖାନା ନେବାକୁ ବ୍ୟବସ୍ଥା କରିଥିଲା। ଦୁର୍ଘଟଣା ପରେ ରାସ୍ତାରେ ଭିଡ଼ ଜମିଥିଲା । ପୋଲିସ ଟ୍ରାଫିକ୍ ଜାମକୁ ଏଡ଼ାଇବାକୁ ଚେଷ୍ଟା କରିଥିଲା । ମୃତ ଶ୍ରମିକଙ୍କ ମଧ୍ୟରୁ ୩ ଜଣ କଟିହାର ଅଞ୍ଚଳର ଏବଂ ଜଣେ ଶିଶୁ ଖଗାରିଆ ଜିଲ୍ଲାର ମାନସୀର ବୋଲି ଜଣାପଡିଛି ।

ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଥିଲା । ସ୍ଥାନୀୟ ବାସିନ୍ଦାଙ୍କଠାରୁ ସୂଚନା ପାଇବା ପରେ ପୋଲିସ ତୁରନ୍ତ ପହଞ୍ଚି ଗାଁ ଲୋକଙ୍କ ସହାୟତାରେ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଭଗ୍ନାବଶେଷ ତଳୁ ଆହତମାନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଥିଲା।

ପ୍ରାଥମିକ ଚିକିତ୍ସା ପରେ ଗୁରୁତର ଆହତ ତିନି ଜଣଙ୍କୁ ଅଧିକ ଚିକିତ୍ସା ପାଇଁ ଭାଗଲପୁରର ମାୟାଗଞ୍ଜ ହସ୍ପିଟାଲ (JLNMCH)କୁ ପଠାଯାଇଥିଲା। ପୋଲିସ କ୍ଷତିଗ୍ରସ୍ତ ଗାଡ଼ିଗୁଡ଼ିକୁ ଜବତ କରି ତଦନ୍ତ ଆରମ୍ଭ କରିଛି ଏବଂ ମୃତକଙ୍କୁ ଚିହ୍ନଟ କରିବା ପାଇଁ ପ୍ରୟାସ ଜାରି ରହିଛି।