ଅହମ୍ମଦାବାଦ : ବାଂଲାଦେଶ ହିଂସା ଏବେ ଗୁଜରାଟ ବେପାରୀଙ୍କ ଲାଗି ଚିନ୍ତାର କାରଣ ପାଲଟିଛି। ହିଂସା ପରେ ଭାରତ-ବାଂଲାଦେଶ ବେପାର ଠପ ପଡିଛି। ଫଳରେ ଗୁଜରାଟ ବେପାରୀଙ୍କ ୧୨ଶହ କୋଟି ଟଙ୍କା ବାଂଲାଦେଶ ବଜାରରେ ଫଶି ରହିଛି। ଏବେ ଦେଶରେ ଅନ୍ତରୀଣ ସରକାରର ଗଠନ ହୋଇସାରିଲାଣି। ଆଶା କରାଯାଉଛି ବାଂଲାଦେଶର ପରିସ୍ଥିତି ସ୍ୱଭାବିକ ହେବା ସହ ଦୁଇ ଦେଶଙ୍କ ବ୍ୟବସାୟ ବାଣିଜ୍ୟ ପୁଣି ଆରମ୍ଭ ହେବ।
ଗୁଜରାଟରୁ ବାଂଲାଦେଶକୁ ରିଆକ୍ଟିଭ ଡାଇଜ, କେମିକାଲ, ପିଗମେଣ୍ଟ ପେଷ୍ଟ, ହ୍ୟାଣ୍ଡଲୁମ ଉତ୍ପାଦ, ଏପିଆଇ, ଔଷଧ ଏବଂ ଟାଇଲ ରପ୍ତାନୀ ହୋଇଥାଏ। ଋଷିଆ-ୟୁକ୍ରେନ ଯୁଦ୍ଧ ଓ ୟୁରୋପ ମାନ୍ଦାବସ୍ଥା ପରେ ଡାଇଜ, କେମିକାଲସ ଓ ଇଣ୍ଟରମିଡିଏଟସ୍ ଭଳି ସାମଗ୍ରୀ ଲାଗି ବାଂଲାଦେଶ ଏକ ଉଦୟମାନ ବଜାର ପାଲଟିଥିଲା। ତେବେ ଦେଶରେ ଅଚାନକ ଦେଖାଦେଇଥିବା ହିଂସା ଓ କ୍ଷମତା ପରିବର୍ତ୍ତନ ବ୍ୟବସାୟରେ ଗ୍ରହଣ ଲଗାଇ ଦେଇଛି। ବାଂଲାଦେଶ ବ୍ୟାଙ୍କ ଦ୍ୱାରା ଜାରି ଲେଟର୍ସ ଅଫ କ୍ରେଡିଟକୁ ଏବେ ସମ୍ମାନୀତ କରାଯିବ କି ନା ସେନେଇ ଗୁଜରାଟ ବେପାରୀ ଚିନ୍ତାରେ ପଡିଯାଇଛନ୍ତି।
ଅହମଦାବାଦ ମିରରର ଏକ ରିପୋର୍ଟ ଅନୁସାରେ ଗୁଜରାଟ ଚାମ୍ବର ଅଫ କମର୍ସ ଏଣ୍ଡ ଇଣ୍ଡଷ୍ଟ୍ରିଜର ପୂର୍ବତନ ଅଧ୍ୟକ୍ଷ ଶୈଳେଶ ପଟବାରୀ କହିଛନ୍ତି ଯେ ଭାରତ ଓ ବାଂଲାଦେଶ ମଧ୍ୟରେ ୨୦୨୩ରେ ୧୪ ବିଲିୟନ ଡଲାରର କାରବାର ହୋଇଥିଲା। ଏଥିରେ ଭାରତ ୧୨.୨ ବିଲିୟନ ଡଲାରର ରପ୍ତାନୀ କରିଥିବା ବେଳେ ୧.୮ ବିଲିୟନ ଡଲାରର ଆମଦାନୀ ହୋଇଥିଲା। ଚଳିତବର୍ଷ ବ୍ୟାପାର ଆହୁରି ବଢିବାର ଆଶା କରାଯାଉଥିଲା, ହେଲେ ବାଂଲାଦେଶର ରାଜନୈତିକ ଉଠାପକା ଅବସ୍ଥା ଏବେ ବେପାର ଉପରେ ଗ୍ରହଣ ଲଗାଇ ଦେଇଛି।
ତେବେ କିଛି ବ୍ୟବସାୟୀ ପରିସ୍ଥିତିରେ ଅତିଶୀଘ୍ର ସୁଧାର ଆସିବ ବୋଲି ଆକଳନ କରୁଛନ୍ତି। ବ୍ୟବସାୟୀଙ୍କ କହିବା କଥା ହେଲା ବାଂଲାଦେଶ କମ୍ପାନୀମାନେ ସାଧାରଣତଃ ୧୫ ଦିନ ଲାଗି ଷ୍ଟକ ରଖନ୍ତି। ଏଣୁ ଦେଶରେ ଅନ୍ତରୀଣ ସରକାର ଗଠନ ହୋଇସାରିଥିବାରୁ ଭାରତ ଉପରେ ଅତ୍ୟଧିକ ନିର୍ଭରତା କାରଣରୁ ବାଂଲାଦେଶକୁ ଜଲଦି ବ୍ୟବସାୟ ଖୋଲିବାକୁ ପଡିପାରେ ବୋଲି ଆକଳନ କରାଯାଉଛି। ଏଥିରେ ବାଂଲାଦେଶ ପରିସ୍ଥିତି ଲାଗି ସବୁଠୁ ଅଧିକ ପ୍ରଭାବିତ ହୋଇଛନ୍ତି ସୁରଟର କପଡା ବ୍ୟବସାୟୀ। ପାଖାପାଖି ୫୦୦ କୋଟି ଟଙ୍କାର କପଡା କାରବାର ପ୍ରଭାବିତ ହୋଇଛି।
ଗତବର୍ଷ ସୁରଟରୁ ବାଂଲାଦେଶକୁ ୧୨ଶହ କୋଟି ଟଙ୍କାର କପଡା ରପ୍ତାନୀ ହୋଇଥିଲା। ସୁରଟରୁ ପ୍ରତି ମାସରେ ୫୦୦ କୋଟି ଟଙ୍କାର କପଡା କୋଲକାତା ଯାଇଥାଏ। ସେଥିରୁ ୫୦ ପ୍ରତିଶତ ଅର୍ଥାତ ୨୫୦ କୋଟି ଟଙ୍କାର କପଡା ବାଂଲାଦେଶ ଯାଇଥାଏ। ସୁରଟର ପାଖାପାଖି ୭୦୦ ବ୍ୟବସାୟୀ କୋଲକାତା ଭାୟା ବାଂଲାଦେଶ ବ୍ୟବସାୟ କରନ୍ତି। ଏହି ବ୍ୟବସାୟୀ ମାନଙ୍କର ପାଖାପାଖି ୧୦୦ କୋଟି ଟଙ୍କାରୁ ଅଧିକ ଟଙ୍କା ଏବେ ଅଟକି ଯାଇଛି।
