ଅଟେଇ ସଂରକ୍ଷିତ ଜଙ୍ଗଲରେ ହରିଣର ଗଳିତ ମୃତଦେହ, ବାଘର ଗତିବିଧି ଜାଣିବାକୁ ଲାଗିଲା ଟ୍ରାପ୍ କ୍ୟାମେରା

କେନ୍ଦୁଝର ୧୯।୧୧: କେନ୍ଦୁଝର ଜିଲ୍ଲା ପାଟଣା ରେଞ୍ଜ ଅନ୍ତର୍ଗତ ବଣ ମହୁଲଡିହା ଗାଁ ନିକଟ ଅଟେଇ ସଂରକ୍ଷିତ ଜଙ୍ଗଲ ଭିତରେ ଏକ ହରିଣର ଗଳିତ ମୃତଦେହ ମିଳିଛି । ଏହାସହ ବାଘର ପାଦ ଚିହ୍ନ ଦେଖିବା ପରେ ବନ ବିଭାଗ ପକ୍ଷରୁ ତନାଘନା ଆରମ୍ଭ ହୋଇଛି । ବନ୍ୟ ଜୀବବିଜ୍ଞାନୀ ଘଟଣାସ୍ଥଳରେ ପହଞ୍ଚି ବାଘର ଗତିବିଧି ଉପରେ ନଜର ରଖିବା ପାଇଁ ଜଙ୍ଗଲ ଭିତରେ ଟ୍ରାପ କ୍ୟାମେରା ଲଗାଯାଇଛି ।

ବନ ବିଭାଗର ପାରା ଷ୍ଟାଫ ପାଟ୍ରୋଲିଂ କରୁଥିବା ସମୟରେ ଜଙ୍ଗଲ ଭିତରେ ଏକ ହରିଣର ଗଳିତ ମୃତଦେହ ଦେଖିବାକୁ ପାଇଥିଲେ । ଏନେଇ ବନ ବିଭାଗକୁ ଖବର ଦେବା ପରେ ବନ ବିଭାଗ ତନାଘନା ଆରମ୍ଭ କରିଛି । ତେବେ ଏହା କେଉଁ ବାଘର ପାଦ ଚିହ୍ନ ଜଣାପଡି ନଥିବା ବେଳେ ବାଘର ଫଟୋ ଉତ୍ତୋଳନ ପାଇଁ ଜଙ୍ଗଲରେ ବନ ବିଭାଗ ଟ୍ରାପ୍ କ୍ୟାମେରା ଲଗାଇଛି ।