ନୂଆଦିଲ୍ଲୀ: ପ୍ୟାରିସ୍ ଅଲିମ୍ପିକ୍ସ ୨୦୨୪ରେ ଦମଦାର ପ୍ରଦର୍ଶନ କରି ଇତିହାସ ରଚିଥିବା ଜାଭଲିନ ଫିଙ୍ଗାଳି ଅର୍ଶଦ ନଦୀମଙ୍କୁ  ପାକିସ୍ତାନର ଦ୍ଵିତୀୟ ସର୍ବୋଚ୍ଚ ପୁରସ୍କାର ହିଲାଲ-ଏ-ଇମତିୟାଜରେ ସମ୍ମାନିତ କରାଯିବ। ଶନିବାର ଏହାର ଘୋଷଣା କରିଛନ୍ତି ପାକିସ୍ତାନ ସରକାର। ସରକାର ଆଗାମୀ ସପ୍ତାହରେ ୭୭ତମ ସ୍ଵାଧୀନତା ଦିବସ ଉପଲକ୍ଷେ ‘ଅଜମ-ଏ-ଇସ୍ତେହକମ’ ନାମରେ ଏକ ସ୍ମାରକ ଡାକ ଟିକଟ୍ ଜାରି କରିବାକୁ ନିର୍ଦ୍ଦେଶ ଦେଇଛନ୍ତି।

୨୭ ବର୍ଷୀୟ ଅର୍ଶଦ ଗୁରୁବାର ପ୍ୟାରିସରେ ୯୨.୯୭ ମିଟର ଜାଭଲିନ ଫିଙ୍ଗି ଅଲିମ୍ପିକ୍ସରେ ଇତିହାସ ରଚିଛନ୍ତି। ସେ ସ୍ଵର୍ଣ୍ଣ ପଦକ ଜିତିବା ସହ ୨୦୦୮ରେ ବେଜିଂ ଅଲିମ୍ପିକ୍ସରେ ରେକର୍ଡ ୯୦.୭୫ ମିଟରର ଅଲିମ୍ପିକ୍ସ ରେକର୍ଡ ଭାଙ୍ଗିଛନ୍ତି। ଏହା ପାକିସ୍ତାନ ପାଇଁ ଗତ ୩୬ ବର୍ଷରେ ପ୍ରଥମ ବ୍ୟକ୍ତିଗତ ପଦକ ଏବଂ ପ୍ରଥମ ବ୍ୟକ୍ତିଗତ ସ୍ଵର୍ଣ୍ଣ ପଦକ। ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀଙ୍କ ନିର୍ଦ୍ଦେଶ ପରେ ଅର୍ଶଦଙ୍କୁ ଏହି ପୁରସ୍କାର ମିଳିବାକୁ ଯାଉଛି।

Also read: ନୀରଜ ଚୋପ୍ରାଙ୍କ ବଡ଼ ଟିପ୍ପଣୀ, କହିଲେ- ପଦକ ଜିତି ପାରୁ ନ ଥିବା ଆଥଲେଟ୍‌ଙ୍କୁ ଲୋକେ...

ନଦୀମଙ୍କ ବିଜୟ ପୂର୍ବରୁ ପାକିସ୍ତାନ କେବେ ବି ଅଲିମ୍ପିକ୍ସରେ ବ୍ୟକ୍ତିଗତ ସ୍ଵର୍ଣ୍ଣ ପଦକ ଜିତି ନ ଥିଲା। ଏହା ପୂର୍ବରୁ କେବଳ ଦୁଇ ପାକିସ୍ତାନୀ ଆଥଲେଟ୍‌ କାଂସ୍ୟ ପଦକ ଜିତିଥିଲେ। ଏଥିରେ ୧୯୬୦ରେ ମହମ୍ମଦ ବଶିର କୁସ୍ତିରେ କାଂସ୍ୟ ପଦକ ଜିତିଥିଲେ। ସେହିପରି ୧୯୮୮ରେ ହୁସୈନ ଶାହ ବକ୍ସିଂରେ  କାଂସ୍ୟ ପଦକ ଜିତିଥିଲେ। ପ୍ୟାରିସରେ ନିଜର ଐତିହାସିକ ଉପଲବ୍ଧି ପରେ ଅର୍ଶଦ ନଦୀମଙ୍କୁ ପଞ୍ଜାବ, ତାଙ୍କ ଗୃହ ରାଜ୍ୟ ଓ ଅନ୍ୟ ରାଜ୍ୟ ସରକାର ଏବଂ ସଂଗଠନ ଦ୍ଵାରା ନଗଦ ପୁରସ୍କାରରେ ସମ୍ମାନିତ କରାଯାଇଛି।