ଚାଷୀଙ୍କ ଚିନ୍ତା ବଢ଼ାଇଛି ଜଙ୍ଗଲୀ ଜନ୍ତୁ, ମଞ୍ଚାରେ ବିତୁଛି ଚାଷୀଙ୍କ ଜୀବନ

କାମାକ୍ଷାନଗର ୯।୧୧: ଚାଷୀଙ୍କ ଚିନ୍ତା ବଢ଼ାଇଛି ଜଙ୍ଗଲୀ ଜନ୍ତୁ । ଠିକ୍ ଅମଳ ସମୟରେ ବର୍ଷକର ଫସଲରେ ଦାଉ ସାଜିଛନ୍ତି ଜଙ୍ଗଲୀ ଜନ୍ତୁ । ଧାର, କରଜ କରି ଧାନ ଚାଷ କରିଥିବା ଚାଷୀ ଋଣ କିପରି ସୁଝିବେ ସେନେଇ ଚିନ୍ତାରେ । ଜୀବନକୁ ବାଜି ଲଗାଇ ମଞ୍ଚାରେ ବିତୁଛି ଚାଷୀଙ୍କ ଜୀବନ । ଗୋଟିଏ ପଟେ ହାତୀ ଓ ବାରହାଙ୍କ ଉପଦ୍ରବର ଭୟଥିବା ବେଳେ ଅନ୍ୟପଟେ ବାଘ ଆତଙ୍କ ଚାଷୀଙ୍କ ମୁଣ୍ଡ ବିନ୍ଧାର କାରଣ ପାଲଟିଛି । ପରିବାର ମୁହଁରେ ବର୍ଷକର ଆହାର ଯୋଗାଇବାକୁ ଜଙ୍ଗଲୀ ଜନ୍ତୁଙ୍କ ମୁହଁରୁ ଆହାର ଛଡାଇବା ପାଇଁ  ରାତିରେ ଫସଲ ଜଗୁଛି ଚାଷୀ ଭାଇ ।

ଢେଙ୍କାନାଳ ଜିଲ୍ଲା ଏକ ଚାଷୀ ବହୁଳ ଜିଲ୍ଲା । ଯେଉଁଠି ଲୋକଙ୍କ ପ୍ରଧାନ ଜୀବିକା ହେଉଛି ଧାନ ଚାଷ । କଥାରେ ଅଛି ଚାଷ କାମ ଯାହାର, କେଡେ ସୁଖ ତାହାର । ହେଲେ ଏଠି ସମ୍ପୂର୍ଣ୍ଣ ଓଲଟା । ହଁ ଆଜ୍ଞା ଏଠି ଚାଷ ଅଛି ଯାହାର କେତେ ଦୁଃଖ ତାହାର । ଏଇ ଦେଖୁ ନାହାନ୍ତି ରାତିର ଅମା ଅନ୍ଧାରରେ କିଏ ଟାୟାରକୁ ଜାଳି ହାତରେ ଧରିଛି ତ, ଆଉ କାହା ହାତରେ ଥିବା ଟିଣକୁ ବାଡେଇ ଉଚ୍ଚ ଶବ୍ଦ ସୃଷ୍ଟି କରି ଚାଲିଛି । କେବଳ ସେତିକିରେ କଥା ସରୁନି ସୁନାର ଫସଲ ସୁରକ୍ଷା ପାଇଁ ଏଠି ଚାଷୀ ଘରଦ୍ୱାର ଛାଡି ଗଛ ଉପରେ ମଞ୍ଚା କରି ରାତି ଉଜାଗର ରହୁଛି ତ, ଆଉ କେଉଁଠି ଜଙ୍ଗଲୀ ଜନ୍ତୁ କ୍ଷେତରେ ପଶି ନଯିବା ପାଇଁ ଟର୍ଚ୍ଚ ଲାଇଟ୍ ପକାଇ ଦେଖୁଛି । ଫସଲ ଅମଳ ସମୟରେ ଏଠି ଚାଷୀଙ୍କୁ ଘାରିଛି ଜଙ୍ଗଲୀ ଜନ୍ତୁ ଭୟ । ବାରହା, ହାତୀ ଧାନ ଫସଲ ଖାଇ ଯାଉଥିବାରୁ ରାତି ଅନିଦ୍ରା ହୋଇ ନିଜ କ୍ଷେତକୁ ଜଗିଛନ୍ତି ଚାଷୀ । କାନପୁରା, ଶିବୁଳାପଶି, ବାଙ୍ଗୁରା, କଙ୍ଗେଇଲ ସହ ଆଖପାଖ ଅଞ୍ଚଳରେ ଶତାଧିକ ଚାଷୀଙ୍କ ପ୍ରାୟ ହଜାର ହଜାର ଏକର ଧାନ ଫସଲ ରହିଛି । ଠିକ୍ ଅମଳ ସମୟରେ ଏବେ ହାତୀ, ବାରହା, ମାଙ୍କଡ ପଶି ଏହି ସବୁ ଚାଷ ଯେତିକି ଖାଉଛନ୍ତି ତା ଠାରୁ ଅଧିକ ନଷ୍ଟଭ୍ରଷ୍ଟ କରୁଥିବା ଚାଷୀ ଅଭିଯୋଗ କରିଛନ୍ତି ।

ହାତୀ ବାରହା ସାଙ୍ଗକୁ କିଛି ଦିନ ହେବ କାମାକ୍ଷାନଗର ଓ ଏହାର ଆଖପାଖ ଅଞ୍ଚଳରେ ଏକ ବାଘ ବୁଲୁଥିବା ଜଣାପଡିଛି । ଯାହା ଚାଷୀଙ୍କ ପାଇଁ ମୁଣ୍ଡ ବିନ୍ଧାର ବଡ କାରଣ ପାଲଟିଛି । ଜୀବନକୁ ବାଜି ଲଗାଇ ନିଜ ଫସଲ ଜଗୁଥିବା ଚାଷୀ ଏବେ ଅନିଚ୍ଛା ସତ୍ତ୍ବେ ଗଛ ଉପରେ ମଞ୍ଚା କରି ଜଗି ରହୁଛି । ବନ ବିଭାଗକୁ ବାଘର ପାଦ ଚିହ୍ନ ଦେଖି ବାରମ୍ବାର ଜଣାଇବା ସତ୍ତ୍ବେ କୌଣସି ପଦକ୍ଷେପ ନେବା ତ ଦୂରର କଥା ହାତୀ, ବାରହା ଆଦି ଘଉଡାଇବାରେ ସହଯୋଗ କରୁନଥିବା ଚାଷୀ ଅଭିଯୋଗ କରିଛନ୍ତି ।

ଆଉ ଦିନ କେଇଟା ପରେ ଫସଲ ଅମଳ ହେବ। ତା ପୂର୍ବରୁ ଜଙ୍ଗଲୀ ଜନ୍ତୁ ଯଦି ଧାନ କ୍ଷେତରେ ପଶି ନଷ୍ଟ କରି ଦିଅନ୍ତି, ତେବେ ଚାଷୀଙ୍କର ବର୍ଷକର ଫସଲ ନଷ୍ଟ ହୋଇଯିବାର ସମ୍ଭାବନା ରହିଛି । ତେଣୁ ଏଭଳି ପରିସ୍ଥିତିରେ ଧାର କରଜ କରି ଚାଷ କରିଥିବା ଚାଷୀ କରିବ ତ କରିବ କ’ଣ ? ତେଣୁ ଏ ଦିଗରେ ବନ ବିଭାଗ ତୁରନ୍ତ ଆବଶ୍ୟକୀୟ ପଦକ୍ଷେପ ନେବାର ଯଥେଷ୍ଟ ଆବଶ୍ୟକତା ରହିଛି । ଯାହାକୁ ନେଇ ଢେଙ୍କାନାଳ ଡିଏଫଓ ସୁମିତ କର କହିଛନ୍ତି ହାତୀ ପଲଙ୍କ ଗତିବିଧି ଉପରେ ଆମର ଗଜସାଥୀ ଓ ପାଟ୍ରୋଲିଂ ଟିମ୍ ନଜର ରଖିଛନ୍ତି । ଏହାସହିତ ଅନୁକମ୍ପା ପୋର୍ଟାଲରେ ଆବେଦନ ପରେ କ୍ଷୟକ୍ଷତି ଆକଳନ କରାଯାଇ କ୍ଷତିପୂରଣ ମଧ୍ୟ ଯୋଗାଇ ଦିଆଯାଉଛି । ତା ଛଡା କିଛି ଦିନ ହେବ ବାଘର କୌଣସି ଗତିବିଧି ସେ ଅଞ୍ଚଳରେ ନଥିବା ସେ ପ୍ରକାଶ କରିଛନ୍ତି ।