ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୫ ମାର୍ଚ୍ଚ ୨୨ରୁ ଆରମ୍ଭ ହେଉଛି । ପ୍ରଥମ ମ୍ୟାଚରେ ମୁହାଁମୁହିଁ ହେବେ ଡିଫେଣ୍ଡିଂ ଚାମ୍ପିଅନ କୋଲକାତା ନାଇଟ୍ ରାଇଡର୍ସ ଓ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ଏଥର ମଧ୍ୟ ଅନେକ ଦଳ ନିଜର ପ୍ରମୁଖ ଖେଳାଳିଙ୍କ ବିନା ମଇଦାନକୁ ଓହ୍ଲାଇବେ । କିଛି ମ୍ୟାଚରେ ଅନେକ ଦଳର ଖେଳାଳି ଆହତ କିମ୍ବା ବ୍ୟକ୍ତିଗତ କାରଣ ପାଇଁ ଖେଳି ପାରିବେ ନାହିଁ । ଦ୍ରୁତ ବୋଲର ଯଶପ୍ରୀତ ବୁମରା, ଏନରିକ ନର୍ଖିଆ ଓ ମୟଙ୍କ ଯାଦବଙ୍କ ପରି ବୋଲର ଅଲଗା ଅଲଗା ସମସ୍ୟା କାରଣରୁ ପ୍ରାରମ୍ଭିକ କିଛି ମ୍ୟାଚରୁ ବାଦ୍ ପଡି ପାରନ୍ତି ।
Also read: ଟିମ୍ ଇଣ୍ଡିଆ ଟେଷ୍ଟକୁ ମିଳିବ ନୂଆ କ୍ୟାପଟେନ୍, ରୋହିତ ଶର୍ମାଙ୍କୁ ନେଇ ଆସିଲା ବଡ଼ ଅପଡେଟ୍
ମୁମ୍ବାଇ ଇଣ୍ଡିଆନ୍ସର ଦ୍ରୁତ ବୋଲର ଯଶପ୍ରୀତ ବୁମରା ଏବେ ବି ପିଠିର ନିମ୍ନ ଭାଗରେ ଆହତ କାରଣରୁ ପ୍ରତିଯୋଗିତାମୂଳକ କ୍ରିକେଟରୁ ବାହାରେ ଅଛନ୍ତି । ଆହତ କାରଣରୁ ବୁମରା ଚାମ୍ପିଅନ୍ସ ଟ୍ରଫି ଖେଳି ପାରି ନ ଥିଲେ । ଅଷ୍ଟ୍ରେଲିଆ ବିପକ୍ଷ ବର୍ଡର ଗାଭାସ୍କର ଟ୍ରଫିର ଶେଷ ମ୍ୟାଚରେ ବୁମରାଙ୍କୁ ଆଘାତ ଲାଗିଥିଲା । ଫଳରେ ସେ ଦ୍ୱିତୀୟ ଇନିଂସରେ ବୋଲିଂ କରି ପାରି ନ ଥିଲେ ।
ଏହିପରି କୋଲକାତା ନାଇଟ୍ ରାଇଡର୍ସର ଦ୍ରୁତ ବୋଲର ଏନରିକ ନର୍ଖିଆ ଫିଟନେସକୁ ନେଇ ଚିନ୍ତାରେ ଅଛନ୍ତି । ଏନରିକ ମଧ୍ୟ ପିଠି ଯନ୍ତ୍ରଣା ସମସ୍ୟା ଦେଇ ଗତି କରୁଛନ୍ତି । ସେ ବି ବୁମରାଙ୍କ ପରି ଚାମ୍ପିଅନ୍ସ ଟ୍ରଫି ଖେଳି ପାରି ନ ଥିଲେ । ଲଖନଉ ସୁପର ଜାଏଣ୍ଟସର ମିଚେଲ୍ ମାର୍ଶ ଓ ମୟଙ୍କ ଯାଦବଙ୍କୁ ନେଇ ମଧ୍ୟ ସଂଶୟ ଲାଗି ରହିଛି । ଆରସିବି ପାଇଁ ଜୋଶ ହେଜେଲଉଡ ଓ ଜ୍ୟାକବ ବେଥେଲଙ୍କ ଖେଳିବା ନେଇ ମଧ୍ୟ ଆଶଙ୍କା ରହିଛି ।
ସନରାଇଜର୍ସ ହାଇଦ୍ରାବାଦର ଅଧିନାୟକ ପାଟ୍ କମିନ୍ସ ମଧ୍ୟ ପ୍ରାରମ୍ଭିକ କିଛି ମ୍ୟାଚ୍ ଖେଳିବା ନେଇ ସଂଶୟ ଦେଖା ଦେଇଛି । ଆହତ କାରଣରୁ ସେ ଚାମ୍ପିଅନ୍ସ ଟ୍ରଫିରୁ ବାଦ୍ ପଡିଥିଲେ । ହାର୍ଦ୍ଦିକ ପାଣ୍ଡ୍ୟା ମୁମ୍ବାଇ ପାଇଁ ପ୍ରଥମ ମ୍ୟାଚ୍ ଖେଳି ପାରିବେ ନାହିଁ, କାରଣ ତାଙ୍କ ଉପରେ ଗୋଟିଏ ମ୍ୟାଚର କଟକଣା ଲାଗିଛି ।
ପଞ୍ଜାବ କିଙ୍ଗ୍ସର ଲୋକି ଫର୍ଗ୍ୟୁସନ ମଧ୍ୟ କିଛି ମ୍ୟାଚରୁ ବାଦ୍ ପଡି ପାରନ୍ତି । ହ୍ୟାରି ବ୍ରୁକ ସିଜିନ ଆରମ୍ଭ ହେବା ପୂର୍ବରୁ ନିଜର ନାଁ ଫେରାଇ ନେବାରୁ ତାଙ୍କ ଉପରେ ଦୁଇ ବର୍ଷର କଟକଣା ଲଗାଇଛି ବିସିସିଆଇ । ଏହିପରି ଚଳିତ ସିଜିନରେ ଅନେକ ଧଳ ନିଜ ନିଜ ପ୍ରମୁଖ ଖେଳାଳିଙ୍କ ବିନା ଅଭିଯାନ ଆରମ୍ଭ କରିବେ ।
