ନୂଆଦିଲ୍ଲୀ: ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନ ଦେଶକୁ ସମ୍ୱୋଧନ କରି ଏକ ବଡ଼ ବୟାନ ଦେଇଛନ୍ତି । ତାଙ୍କର ଏହି ବୟାନକୁ ୟୁରୋପରେ ବଢୁଥିବା ସାମାଜିକ ଅସୁରକ୍ଷା ସହ ଯୋଡ଼ି ଦେଖାଯାଉଛି । ଫ୍ରାନ୍ସ ରାଷ୍ଟ୍ରୀୟ ଦିବସ ପୂର୍ବ ସଂଧ୍ୟାରେ ଦେଶକୁ ସମ୍ୱୋଧିତ କରି ମାକ୍ରୋନ କହିଛନ୍ତି ଯେ ଦ୍ୱିତୀୟ ବିଶ୍ୱ ଯୁଦ୍ଧ ପରେ ଆଜିର ସମୟରେ ୟୁରୋପର ସ୍ୱୀଧାନତା ପାଇଁ ସବୁଠୁ ବଡ଼ ବିପଦ ରହିଛି ।
ଏହି ଅବସରରେ ସେ ଯେଉଁ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି, ତାହା ହେଉଛି ଆଗାମୀ ଦୁଇ ବର୍ଷରେ ଫ୍ରାନ୍ସ ବଜେଟକୁ ଦ୍ୱିଗୁଣ କରିବା । ରାଷ୍ଟ୍ରପତି ମାକ୍ରୋନ କହିଛନ୍ତି, 'ଏହି ଦୁନିଆରେ ସ୍ୱାଧୀନ ରହିବା ପାଇଁ ଆପଣଙ୍କୁ ଡର ସୃଷ୍ଟି କରିବାକୁ ପଡ଼ିବ । ଭୟ ସୃଷ୍ଟି କରିବା ପାଇଁ ଆପଣଙ୍କୁ ଶକ୍ତିଶାଳୀ ହେବାକୁ ପଡ଼ିବ ।'
ଉଲ୍ଲେଖଯୋଗ୍ୟ, ଫ୍ରାନ୍ସ ୨୦୩୦ ସୁଦ୍ଧା ନିଜର ପ୍ରତିରକ୍ଷା ବଜେଟକୁ ଦ୍ୱିଗୁଣ କରିବା ପାଇଁ ଯୋଜନା କରିଥିଲା । କିନ୍ତୁ ଏବେ ଏହାକୁ ଆଗାମୀ ଦୁଇ ବର୍ଷରେ ହାସଲ କରିବା ପାଇଁ ଲକ୍ଷ୍ୟ ରଖାଯାଇଛି । ମାକ୍ରୋନ ଆସନ୍ତା ବର୍ଷ ଫ୍ରାନ୍ସ ପ୍ରତିରକ୍ଷା ବଜେଟରେ ୩.୫ ବିଲିୟନ ୟୁରୋ ଯୋଡ଼ିବା ଓ ୨୦୨୭ରେ ଏହାକୁ ୩ ବିଲିୟନ ୟୁରୋ ଯାଏ ବଢାଇବା ଲାଗି ଆହ୍ୱାନ କରିଛନ୍ତି । ଏବେ ସଂସଦରେ ଏହି ପ୍ରସ୍ତାବକୁ ପାରିତ କରାଯିବ ।
ଫ୍ରାନ୍ସ ରାଷ୍ଟ୍ରପତି ରୁଷଠାରୁ ବିପଦର ଉଲ୍ଲେଖ କରି ମସ୍କୋର ସାମ୍ରାଜ୍ୟବାଦୀ ନୀତି ଓ ବିସ୍ତାରବାଦୀ ନିଜକୁ ନିନ୍ଦା କରିଛନ୍ତି । ଉଲ୍ଲେଖଯୋଗ୍ୟ ଯେ ଶୁକ୍ରବାର ଫ୍ରାନ୍ସିସି ସେନା ମୁଖ୍ୟ ଥିଏରି ୱର୍କହାର୍ଡ କହିଥିଲେ ରୁଷ ୟୁରୋପରେ ଫ୍ରାନ୍ସକୁ ନିଜ ମୁଖ୍ୟ ବିରୋଧୀ ଭାବୁଛି । ସେ ଆହୁରି କହିଥିଲେ ଯେ ୟୁରୋପର ସୁରକ୍ଷା ପାଇଁ ରୁଷ ଏକ ସ୍ଥାୟୀ ବିପଦ । ଆଗାମୀ ଦିନରେ ୟୁରୋପୀୟ ଦେଶ ୟୁକ୍ରେନର ସମଦଶା ଭୋଗି ପାରନ୍ତି ।
