US ସଂସଦରେ ମୋଦି-ପୁଟିନଙ୍କ ଫର୍ଚ୍ୟୁନର ସେଲଫି, ସାଂସଦ ପଚାରିଲେ- କ’ଣ ଏମିତି ଜିତିବ ନୋବେଲ?

ୱାସିଂଟନ ୧୧।୧୨: ନିକଟରେ ଚର୍ଚ୍ଚାକୁ ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ଫର୍ଚ୍ୟୁନର ସେଲଫି ଆମେରିକା କଂଗ୍ରେସ ପର୍ଯ୍ୟନ୍ତ ପହଞ୍ଚିଛି। ଆମେରିକୀୟ ସାଂସଦ କ୍ୟମଲେଗର-ଡୋଭ ବିଦେଶ ନୀତି ଉପରେ ଚର୍ଚ୍ଚା କାଳରେ ଏହି ଫଟୋକୁ ପୋଷ୍ଟର କରି ସଦନରେ ଦେଖାଇଛନ୍ତି। ସେ କହିଛନ୍ତି ଯେ ଏବେକା ଆମେରିକା ନୀତି ଭାରତକୁ ଋଷିଆର ନିକଟତମ କରିଛି ଓ ଏହି ପରିସ୍ଥିତି ପାଇଁ ଭାରତ ନୁହେଁ ନିଜେ ଆମେରିକା ଦାୟୀ।

ଅଧିବେଶନ କାଳରେ କ୍ୟମଲେଗର-ଡୋଭ କହିଛନ୍ତି ଯେ ‘ଟ୍ରମ୍ପ ପ୍ରଶାସନର ଭାରତ ନୀତି ଏପରି ଯାହା ନିଜର କ୍ଷତି କରୁଛି। ଏହି ରଣନୀତି ଯୋଗୁ ଦୁଇ ଦେଶଙ୍କ ମଧ୍ୟରେ ରଣନୈତିକ ଭରସା ଓ ବୋଧକୁ ଝଟକା ଲାଗିଛି’।ପୋଷ୍ଟର ଆଡକୁ ଇସାରା କରି ସେ କହିଛନ୍ତି ଯେ ଏହି ଫଟୋଟି କେବଳ ହଜାରେ ଶବ୍ଦ ସହ ସମାନ। ଆପଣ ଆପଣଙ୍କ ରଣନୈତିକ ପାର୍ଟନରଙ୍କୁ ବିରୋଧୀଙ୍କ ଆଡକୁ ଧକ୍କା ଦେଇ ନୋବେଲ ଶାନ୍ତି ପୁରସ୍କାର ଜିତି ପାରିବେ ନାହିଁ। ସେ କହିଛନ୍ତି ଯେ ଆମେରିକାକୁ ଏହା ବୁଝିବାକୁ ପଡିବ ଚାପ ପକାଇ ଭାଗିଦାର କରିବାର ବି ଏକ ମୂଲ୍ୟ ରହିଛି ଓ ଏହି ନୀତି ଉପରେ ଗୁରୁତର ପୁନର୍ବିଚାରର ଆବଶ୍ୟକତା ରହିଛି।

କ୍ୟମଲେଗର-ଡୋଭ ସାଂସଦଙ୍କୁ ଆହ୍ୱାନ ଦେଇ କହିଛନ୍ତି ଯେ ସେମାନେ ଅତ୍ୟନ୍ତ ତତ୍ପରତାର ସହ ଭାରତ-ଆମେରିକା ସମ୍ପର୍କକୁ ପୁଣି ଥରେ ଧାରଣାକୁ ଆଣିବାକୁ କାମ କରନ୍ତୁ। ସେ କହିଛନ୍ତି ଯେ ଏହି ପ୍ରସଙ୍ଗ ଦ୍ୱିଦଳୀୟ ସହମତିର ଓ ଆଜି ଏହାକୁ ରେକର୍ଡ କରିଥିବାରୁ ମୁଁ ଚେୟାରକୁ ଧନ୍ୟବାଦ ଜଣାଉଛି।

ଉଲ୍ଲେଖଯୋଗ୍ୟ ଯେ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନ ଗତ ସପ୍ତାହରେ ଦୁଇ ଦିବସୀୟ ଭାରତ ଗସ୍ତରେ ଆସିଥିଲେ। ପାଲାମ ବାୟୁସେନା ଘାଟିରେ ରେଡ କାର୍ପେଟ ସ୍ୱାଗତ ପରେ ପୁଟିନ ପ୍ରଧାନମନ୍ତ୍ରୀ ମୋଦିଙ୍କ ଫର୍ଚ୍ୟୁନର ଗାଡିରେ ବସି ଡିନର ଲାଗି ପ୍ରଧାନମନ୍ତ୍ରୀଙ୍କ ବାସଭବନକୁ ପହଞ୍ଚିଥିଲେ। ଦୁଇ ନେତାଙ୍କ ‘କାର ରାଇଡ’କୁ ଭାରତ ଓ ଋଷିଆ ବ୍ୟକ୍ତିଗତ ବନ୍ଧୁତାର ବାର୍ତ୍ତା ବୋଲି କହିଥିଲେ। ତେବେ ପୁଟିନ ‘ଇଣ୍ଡିଆ ଟୁଡେ’କୁ ଦେଇଥିବା ସାକ୍ଷାତକାରରେ କହିଛନ୍ତି ଯେ ମୋଦିଙ୍କ କାରରେ ଏକାଠି ଯିବା ମୋ ଆଇଡିଆ ଥିଲା। ଏହା ଆମର ବନ୍ଧୁତ୍ୱର ପ୍ରତୀକ ଥିଲା।

ଏହା ପୂର୍ବରୁ ଦୁଇ ନେତା ସାଂଘାଇ ସହଯୋଗ ସଂଗଠନ (ଏସସିଓ) ସମ୍ମିଳନୀରେ ଏକ ସଙ୍ଗରେ ଋଷୀୟ ‘ଅରସ ସେଡାନ’ରେ ଯାତ୍ରା କରିଥିଲେ,ଯାହାକୁ ସେମାନଙ୍କ ନିକଟତାର ସ୍ପଷ୍ଟ ସଂକେତ ମନେ କରାଯାଇଥିଲା। ଉଲ୍ଲେଖଯୋଗ୍ୟ ଯେ ୨୦୨୨ରେ ୟୁକ୍ରେନ ଉପରେ ଋଷିଆର ଆକ୍ରମଣ ପରେ ପୁଟିନଙ୍କ ଏକ ପ୍ରଥମ ଅଧିକାରୀକ ଭାରତ ଗସ୍ତ ଥିଲା। ଏହା ବୈଶ୍ୱିକ କୁଟନୀତିରେ ଭାରତ-ଋଷିଆ ସମୀକରଣକୁ ପୁଣି ଥରେ ଚର୍ଚ୍ଚାକୁ ଆଣିଥିଲା।