ଉତୁରିଗଲା ବୟକଟ୍ ନିଶା, କଲମ୍ବୋ ପାଇଁ ପ୍ଲାଇଟ୍ ବୁକ୍ କଲା ପାକିସ୍ତାନ !

ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପ୍ ପାଇଁ ପାକିସ୍ତାନ କଲମ୍ବୋ ପାଇଁ ଏକ ବିମାନ ବୁକ୍ କରିଛି। ଭାରତ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେବାକୁ ଥିବା ବିଶ୍ୱକପ୍ ବର୍ଜନ କରିବାକୁ ଧମକ ଦେଇଥିଲା ପାକିସ୍ତାନ । ବାଂଲାଦେଶ ସମର୍ଥନରେ ବାହାରି ବଡ଼ ବଡ଼ କଥା କହିଥିଲା ପାକିସ୍ତାନ । କିନ୍ତୁ ଏବେ ୟୁ-ଟର୍ଣ୍ଣ ମାରିଛି ପାକିସ୍ତାନ ଟିମ । ଏସିଆ ସ୍ପୋର୍ଟର ଏକ ରିପୋର୍ଟ ଅନୁଯାୟୀ, ସଲମାନ ଅଲି ଆଗାଙ୍କ ନେତୃତ୍ୱରେ ଦଳ ଅଷ୍ଟ୍ରେଲିଆ ଦଳ ସହିତ କଲମ୍ବୋ ଯାତ୍ରା କରିବ।

ବାଂଲାଦେଶ ଟୁର୍ଣ୍ଣାମେଣ୍ଟରୁ ବାଦ ପଡ଼ିବା ପରେ, ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ମୁଖ୍ୟ ମୋହସିନ୍ ନକଭି ଟି-୨୦ ବିଶ୍ୱକପ୍ ବର୍ଜନ କରିବାକୁ ଧମକ ଦେଇଥିଲେ। ସୁରକ୍ଷା ଚିନ୍ତାକୁ ପ୍ରସଙ୍ଗ କରି, ବାଂଲାଦେଶ ନିଜ ମ୍ୟାଚ୍ର ସ୍ଥାନ ପରିବର୍ତ୍ତନ କରି ଭାରତରୁ କଲମ୍ବୋ କରିବାକୁ ଦାବି କରିଥିଲା। କିନ୍ତୁ ଆଇସିସି ଏହି ଦାବିକୁ ପ୍ରତ୍ୟାଖ୍ୟାନ କରିଥିଲା। ଆଇସିସି ଏହି ପ୍ରସଙ୍ଗରେ ଏକ ଭୋଟ୍ କରିଥିଲା। ସଦସ୍ୟ ଦେଶ ଭୋଟିଂରେ ୧୪-୨ ନିଷ୍ପତ୍ତି ପରେ, ବାଂଲାଦେଶକୁ ଭାରତ ଯାତ୍ରା କରିବାକୁ ଏକ ଅଲଟିମେଟମ୍ ଜାରି କରାଯାଇଥିଲା । କିନ୍ତୁ ବାଂଲାଦେଶ ଜିଦ ଧରିବାରୁ ଆଇସିସି ବାଂଲାଦେଶ ବଦଳରେ ସ୍କଟଲାଣ୍ଡକୁ ବିଶ୍ୱକପ୍ରେ ସାମିଲ କରିଥିଲା ।

ନକଭି କହିଥିଲେ ଯେ, ସେ ପାକିସ୍ତାନ ସରକାରଙ୍କ ସହିତ ପରାମର୍ଶ କରିବେ ଏବଂ ତା’ପରେ ନିଷ୍ପତ୍ତି ନେବେ। ପରେ ନକଭି ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଭେଟିଥିଲେ। ପାକିସ୍ତାନ ପ୍ରଧାନମନ୍ତ୍ରୀ ବାଂଲାଦେଶକୁ ସମର୍ଥନ କରିବା ନେଇ ପିସିବିର ମତକୁ ସମର୍ଥନ କରିଥିଲେ । କିନ୍ତୁ ଆର୍ଥିକ କ୍ଷତିକୁ ଦୃଷ୍ଟିରେ ରଖି ପାକିସ୍ତାନ ଟୁର୍ଣ୍ଣାମେଣ୍ଟକୁ ବର୍ଜନ କରୁ ବୋଲି ଶାହବାଜ ଚାହୁଁନାହାନ୍ତି । ଏହା ବ୍ୟତୀତ, ନକଭି ରାଷ୍ଟ୍ରପତି ଆସିଫ ଜର୍ଦ୍ଦାରୀ, ପୂର୍ବତନ ପିସିବି ଅଧ୍ୟକ୍ଷ ନଜାମ ସେଟ୍ଟି ଏବଂ ରମିଜ ରାଜାଙ୍କ ପରାମର୍ଶ ଲୋଡ଼ିଥିଲେ । ସେମାନେ ସମସ୍ତେ ଚାହୁଁଛନ୍ତି ଯେ, ପାକିସ୍ତାନ ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରୁ। ଭାରତ ବିପକ୍ଷରେ ଗ୍ରୁପ-ଷ୍ଟେଜ ମ୍ୟାଚ୍ ବର୍ଜନ ନକରିବାକୁ ମଧ୍ୟ ସେମାନଙ୍କୁ ପରାମର୍ଶ ଦିଆଯାଇଛି ।

ନକଭି ପାକିସ୍ତାନ ପ୍ରଧାନମନ୍ତ୍ରୀଙ୍କ ସହ ତାଙ୍କର ସାକ୍ଷାତ ବିଷୟରେ ସୋସିଆଲ ମିଡିଆରେ ଏକ ପୋଷ୍ଟ ମଧ୍ୟ ସେୟାର କରିଥିଲେ । ସେପଟେ ଟି-୨୦ ବିଶ୍ବକପ୍ ପୂର୍ବରୁ ପାକିସ୍ତାନ ଟିମ୍ ଜାନୁଆରୀ ୨୯ରୁ ଅଷ୍ଟ୍ରେଲିଆ ବିପକ୍ଷରେ ଟି-୨୦ ସିରିଜ୍ ଖେଳୁଛି । ଏବେ ସୁଦ୍ଧା ଦୁଇଟି ମ୍ୟାଚ୍ ଜିତି ସିରିଜ୍ କବଜା କରିଛି ପାକିସ୍ତାନ । ରିପୋର୍ଟରୁ ଜଣାପଡ଼ିଛି ଯେ, ଟୁର୍ଣ୍ଣାମେଣ୍ଟ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିବାକୁ ଟିମ୍ ମ୍ୟାନେଜମେଣ୍ଟକୁ କୁହାଯାଇଛି।