ମହିଳା କ୍ରିକେଟକୁ ବଡ଼ BCCIର ବଡ଼ ଭେଟି, ଘରୋଇ ମହିଳା ଖେଳାଳି ଓ ଅଧିକାରୀଙ୍କ ଫି’ରେ ଐତିହାସିକ ବୃଦ୍ଧି

ନୂଆଦିଲ୍ଲୀ: ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଘରୋଇ ମହିଳା କ୍ରିକେଟର ଏବଂ ମ୍ୟାଚ୍ ଅଧିକାରୀଙ୍କ ପାଇଁ ମ୍ୟାଚ୍ ଫି’ରେ ଏକ ଗୁରୁତ୍ୱପୂର୍ଣ୍ଣ ବୃଦ୍ଧିକୁ ଅନୁମୋଦନ କରିଛି । ପ୍ରଥମ ମହିଳା ଦିନିକିଆ ବିଶ୍ୱକପ୍ ବିଜୟ ପରେ ନିଆଯାଇଥିବା ଏହି ନିଷ୍ପତ୍ତିର ଲକ୍ଷ୍ୟ ହେଉଛି ଘରୋଇ କ୍ରିକେଟରେ ଏକ ସମାନ ଏବଂ ନ୍ୟାୟସଙ୍ଗତ ଦରମା ଢାଞ୍ଚା ସୃଷ୍ଟି କରିବା । ଏ ସଂକ୍ରାନ୍ତୀୟ ପ୍ରସ୍ତାବକୁ ବୋର୍ଡର ଆପେକ୍ସ ପରିଷଦ ଦ୍ୱାରା ଅନୁମୋଦନ କରାଯାଇଛି ।

ମହିଳା କ୍ରିକେଟରଙ୍କ ଫି’ଦୁଇଗୁଣରୁ ଅଧିକ ବୃଦ୍ଧି ପାଇଛି ।

ନୂଆ ଦରମା ଢାଞ୍ଚା ଅନୁଯାୟୀ, ସିନିୟର ମହିଳା ଘରୋଇ କ୍ରିକେଟରମାନେ ଏବେ ପ୍ରତିଦିନ ୫୦,୦୦୦ ପାଇବେ । ପୂର୍ବରୁ ଏହା ୨୦,୦୦୦ ଥିଲା । ରିଜର୍ଭ ଖେଳାଳିମାନେ ପ୍ରତିଦିନ ୨୫,୦୦୦ ପାଇବେ, ଯାହା ପୂର୍ବରୁ ୧୦,୦୦୦ ଟଙ୍କା ଥିଲା ।

ସିନିୟର ମହିଳା ଏକଦିବସୀୟ ଏବଂ ବହୁ-ଦିବସୀୟ ଟୁର୍ଣ୍ଣାମେଣ୍ଟ

• ପ୍ଲେଇଂ ଇଲେଭେନ୍: ପ୍ରତିଦିନ ୫୦,୦୦୦
•  ରିଜର୍ଭ ଖେଳାଳି: ପ୍ରତିଦିନ ୨୫,୦୦୦

ଜାତୀୟ ମହିଳା ଟି-୨୦ ଟୁର୍ଣ୍ଣାମେଣ୍ଟ

• ପ୍ଲେଇଂ ଇଲେଭେନ୍: ପ୍ରତି ମ୍ୟାଚ୍ ପାଇଁ ୨୫,୦୦୦
• ରିଜର୍ଭ ଖେଳାଳି: ପ୍ରତି ମ୍ୟାଚ୍ ପାଇଁ ୧୨,୫୦୦

ବିସିସିଆଇ ଅଧିକାରୀଙ୍କ ଅନୁଯାୟୀ, ଜଣେ ଶୀର୍ଷ ଘରୋଇ ମହିଳା କ୍ରିକେଟର ଯଦି ସମ୍ପୂର୍ଣ୍ଣ ସିଜିନ୍ ପାଇଁ ସମସ୍ତ ଫର୍ମାଟରେ ଖେଳିବେ ତେବେ ସେ ୧୨ରୁ ୧୪ ଲକ୍ଷ ଟଙ୍କା ରୋଜଗାର କରିପାରିବେ ।

ଜୁନିଅର ମହିଳା ଖେଳାଳିମାନେ ମଧ୍ୟ ଉପକୃତ ହେବେ

୨୩ ବର୍ଷରୁ କମ୍ ଏବଂ ୧୯ ବର୍ଷରୁ କମ୍ ବର୍ଗର ମହିଳା ଖେଳାଳିଙ୍କ ଫି’ ବୃଦ୍ଧି କରାଯାଇଛି ।

• ଖେଳୁଥିବା ଖେଳାଳି: ପ୍ରତିଦିନ ୨୫,୦୦୦
• ରିଜର୍ଭ ଖେଳାଳି: ପ୍ରତିଦିନ ୧୨,୫୦୦

ଏହି ନିଷ୍ପତ୍ତି ଦ୍ୱାରା ଅମ୍ପାୟାର ଏବଂ ମ୍ୟାଚ୍ ରେଫରିଙ୍କ ପରି ମ୍ୟାଚ୍ ଅଧିକାରୀମାନେ ମଧ୍ୟ ଲାଭବାନ ହେବେ ।

• ଘରୋଇ ଲିଗ୍ ମ୍ୟାଚ୍: ପ୍ରତିଦିନ ୪୦,୦୦୦
• ନକଆଉଟ୍ ମ୍ୟାଚ୍: ପ୍ରତିଦିନ ୫୦,୦୦୦ରୁ ୬୦,୦୦୦ (ମ୍ୟାଚର ଗୁରୁତ୍ୱ ଉପରେ ନିର୍ଭର କରିବ)

ଏହି କାରଣରୁ, ଅମ୍ପାୟାରମାନେ ଏଣିକି ରଣଜୀ ଟ୍ରଫିରେ ଲିଗ୍ ମ୍ୟାଚ୍ରେ ପ୍ରାୟ ୧.୬୦ ଲକ୍ଷ ଟଙ୍କା ରୋଜଗାର କରିବେ । ନକଆଉଟ୍ ମ୍ୟାଚ୍ରେ ୨.୫ରୁ ୩ ଲକ୍ଷ ଟଙ୍କା ପାଇବେ ।

ବିସିସିଆଇର ରଣନୀତି

ବିସିସିଆଇ ଅଧିକାରୀଙ୍କ ମତରେ ଏହି ସଂଶୋଧିତ ଦରମା ମହିଳା କ୍ରିକେଟର ଏବଂ ଘରୋଇ ମ୍ୟାଚ୍ ଅଧିକାରୀମାନଙ୍କୁ ଆର୍ଥିକ ସୁରକ୍ଷା ଏବଂ ପ୍ରୋତ୍ସାହନ ପ୍ରଦାନ କରିବ । ଏହାଦ୍ୱାରା ଦେଶର ଘରୋଇ କ୍ରିକେଟ୍ ଆହୁରି ମଜଭୁତ ହେବ ।