ଗ୍ରେଟ୍ ନିକୋବର ପ୍ରକଳ୍ପକୁ ଏନଜିଟିର ମଞ୍ଜୁରୀ; ଭାରତ ପାଇଁ କାହିଁକି ଗୁରୁତ୍ୱପୂର୍ଣ୍ଣ ?

ନୂଆଦିଲ୍ଲୀ: ନ୍ୟାସନାଲ୍ ଗ୍ରୀନ୍ ଟ୍ରିବ୍ୟୁନାଲ୍ (ଏନଜିଟି) ଗ୍ରେଟ୍ ନିକୋବର ଦ୍ୱୀପ ଉପରେ ପ୍ରସ୍ତାବିତ ଅନ୍ତର୍ଜାତୀୟ କଣ୍ଟେନର ଟ୍ରାନ୍ସଶିପମେଣ୍ଟ ଟର୍ମିଲାନ ସହିତ ଏକ ପ୍ରମୁଖ ଭିତ୍ତିଭୂମି ପରିଯୋଜନାକୁ ମଞ୍ଜୁରୀ ଦେଇଛନ୍ତି । ୯୦୦୦୦ ହଜାର କୋଟି ଟଙ୍କାର ଏହି ପ୍ରସ୍ତାବିତ ପ୍ରକଳ୍ପ ଭାରତ ପାଇଁ ରଣନୀତି ଓ ପ୍ରତିରକ୍ଷା ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ । ଟ୍ରିବ୍ୟୁନାଲ କହିଛନ୍ତି ଯେ ପରିବେଶ ମଞ୍ଜୁରୀରେ ପର୍ଯ୍ୟାପ୍ତ ସୁରକ୍ଷା ଉପାୟକୁ ସାମିଲ କରାଯାଇଛି ଓ ହସ୍ତକ୍ଷେପର ଆବଶ୍ୟକତା ନାହିଁ । ଏନଜିଟି ଅଧ୍ୟକ୍ଷ ଜଷ୍ଟିସ୍ ପ୍ରକାଶ ଶ୍ରୀବାସ୍ତବଙ୍କ ଅଧ୍ୟକ୍ଷତାରେ କୋଲକାତା ସ୍ଥିତ ପୂର୍ବ ଜୋନାଲ ଖଣ୍ଡପୀଠ ଏହି ଆଦେଶ ପାରିତ କରିଛନ୍ତି ।

କେଉଁ ପରିଯୋଜନାକୁ ମିଳିଛି ମଞ୍ଜୁରୀ ?

ଅନ୍ତର୍ଜାତୀୟ କଣ୍ଟେନର ଟ୍ରାନ୍ସଶିପମେଣ୍ଟ ଟର୍ମିଲାନ

ଟାଉନଶିପ ଓ ଆଞ୍ଚଳିକ ବିକାଶ

୪୫୦ ଏମଭିଏ ଗ୍ୟାସ୍ ଓ ସୌର ଆଧାରିତ ପାୱାର ପ୍ଲାଣ୍ଟ

ପରିବେଶ ମଞ୍ଜୁରୀକୁ ପୂର୍ବରୁ ବି ଚ୍ୟାଲେଞ୍ଜ ଦିଆଯାଇଥିଲା, ଯେଉଁଥିରେ ଆଇଲାଣ୍ଡ କୋଷ୍ଟାଲ୍ ରେଗୁଲେସନ ଜୋନ୍ (ICRZ) ନିୟମ ଉଲ୍ଲଂଘନ ହେଉଥିବା ଅଭିଯୋଗ ହୋଇଥିଲା ।

ଏନଜିଟି କହିଛନ୍ତି ଯେ ପୂର୍ବ ଶୁଣାଣିରେ ବି ପରିବେଶ ମଞ୍ଜୁରୀରେ ହସ୍ତକ୍ଷେପ କରିବାକୁ ମନା କରାଯାଇଥିଲା ଓ ଯେଉଁ ପ୍ରସଙ୍ଗଗୁଡ଼ିକୁ ଚିହ୍ନଟ କରାଯାଇଥିଲା, ସେଗୁଡ଼ିକୁ ଉଚ୍ଚସ୍ତରୀୟ କମିଟି ଯାଞ୍ଚ କରିଛି । ଖଣ୍ଡପୀଠଙ୍କ ମତରେ ଏହି ପରିଯୋଜନା ରାଷ୍ଟ୍ରୀୟ ଓ ସାମରିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଅଟେ, କିନ୍ତୁ ପରିବେଶ ସୁରକ୍ଷା ସହ କୌଣସ ସାଲିସ୍ ନହେବା ଦରକାର । ଗ୍ରେଟ୍ ନିକୋବରରେ ପ୍ରସ୍ତାବିତ ଏହି ପରିଯୋଜନା ଭାରତର ସାମୁଦ୍ରିକ ଓ ରଣନୀତିକ କ୍ଷମତାକୁ ମଜଭୁତ କରିବା ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଅଟେ ।

ପରିବେଶ ମଞ୍ଜୁରୀରେ ବିଶେଷ ଭାବେ ନିମ୍ନରେ ଦିଆଯାଇଥିବା ଉପାୟକୁ ସାମିଲ କରାଯାଇଛି:

ଲ୍ୟାଦରବ୍ୟାକ୍ ସାମୁଦ୍ରିକ କଇଁଚ୍ଛ

ନିକୋବର ମେଗାପୋଡ୍ ପକ୍ଷୀ

ଲୁଣି ପାଣି କୁମ୍ଭୀର

ନିକୋବର କଙ୍କଡ଼ା

ହେନ୍ତାଳ ବନ ପୁନଃସ୍ଥାପନ ଓ କୋରାଲ ଟ୍ରାନ୍ସଲୋକେସନ

ଶୋସ୍ପେନ ଓ ନିକୋବାର ଜନଜାତିଙ୍କ ହିତର ରକ୍ଷା

ଟ୍ରିବ୍ୟୁନାଲ୍ ଏହା ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ସମୁଦ୍ର କୂଳରେ କୌଣସି କ୍ଷୟ କିମ୍ବା ପରିବର୍ତ୍ତନ ହେବ ନାହିଁ । ଦ୍ୱୀପର ବେଳାଭୂମିକୁ ସୁରକ୍ଷିତ ରଖିବା, କାରଣ ଏଗୁଡ଼ିକ କଇଁଛ ଏବଂ ପକ୍ଷୀମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ବାସ ସ୍ଥାନ ।

ରଣନୈତିକ ଗୁରୁତ୍ୱ ଏବଂ ଏକ ସନ୍ତୁଳିତ ଆଭିମୁଖ୍ୟ

ଏନଜିଟି ଆଦେଶରେ କୁହାଯାଇଛି ଯେ ପ୍ରକଳ୍ପର ରଣନୈତିକ ଗୁରୁତ୍ୱକୁ ଅସ୍ୱୀକାର କରାଯାଇପାରିବ ନାହିଁ । ଏହା ବ୍ୟତୀତ, ICRZ ବିଜ୍ଞପ୍ତିର ସର୍ତ୍ତାବଳୀକୁ ଅଣଦେଖା କରାଯାଇପାରିବ ନାହିଁ । ତେଣୁ, ବିକାଶ ଏବଂ ପରିବେଶ ସୁରକ୍ଷା ମଧ୍ୟରେ ଏକ ସନ୍ତୁଳିତ ଆଭିମୁଖ୍ୟ ଜରୁରୀ ।

ଭାରତ ପାଇଁ ଗ୍ରେଟ୍ ନିକୋବର ପ୍ରକଳ୍ପର ଗୁରୁତ୍ୱ କ’ଣ ?

ଗ୍ରେଟ୍ ନିକୋବର ମେଗା ପ୍ରୋଜେକ୍ଟକୁ ଭାରତର ଦୀର୍ଘକାଳୀନ ରଣନୀତି ଏବଂ ଆର୍ଥିକ ସ୍ୱାର୍ଥ ପାଇଁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ଗ୍ରେଟ୍ ନିକୋବର ଦ୍ୱୀପ ଭାରତ ମହାସାଗର କ୍ଷେତ୍ରରେ ଭାରତର ରଣନୈତିକ ସ୍ଥିତିକୁ ସୁଦୃଢ଼ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିପାରିବ । ଏହି ଦ୍ୱୀପ ବିଶ୍ୱର ସବୁଠାରୁ ବ୍ୟସ୍ତବହୁଳ ସାମୁଦ୍ରିକ ବାଣିଜ୍ୟିକ ମାର୍ଗ ମଧ୍ୟରୁ ଗୋଟିଏ, ମଲାକା ଷ୍ଟ୍ରେଟ୍ ନିକଟରେ ଅବସ୍ଥିତ । ଏହି ଭୌଗୋଳିକ ସ୍ଥିତି ଭାରତକୁ ଅନ୍ତର୍ଜାତୀୟ ସାମୁଦ୍ରିକ ବାଣିଜ୍ୟ ଏବଂ ବିଶ୍ୱ ଯୋଗାଣ ଶୃଙ୍ଖଳରେ ଅଧିକ ପ୍ରଭାବଶାଳୀ ଭୂମିକା ଗ୍ରହଣ କରିବାକୁ ଦେବ ।

ଏହି ପ୍ରକଳ୍ପ ପ୍ରତିରକ୍ଷା ଦୃଷ୍ଟିକୋଣରୁ ମଧ୍ୟ ଗୁରୁତ୍ୱପୂର୍ଣ୍ଣ । ଏଠାରେ ଭିତ୍ତିଭୂମିର ବିକାଶ ଭାରତର ସାମରିକ କ୍ଷମତାକୁ ସୁଦୃଢ଼ କରିବ ଏବଂ ଭାରତ ମହାସାଗର କ୍ଷେତ୍ରରେ କାର୍ଯ୍ୟକଳାପର ପ୍ରଭାବଶାଳୀ ତଦାରଖକୁ ସକ୍ଷମ କରିବ । ବିଶେଷକରି, ଏହି କ୍ଷେତ୍ରରେ ବଢ଼ୁଥିବା ରଣନୈତିକ କାର୍ଯ୍ୟକଳାପକୁ ଦୃଷ୍ଟିରେ ରଖି, ଏହି ସ୍ଥାନ ଭାରତକୁ ସାମୁଦ୍ରିକ ସୁରକ୍ଷାରେ ଏକ ଅତିରିକ୍ତ ସୁବିଧା ପ୍ରଦାନ କରିପାରିବ । ମୋଟ ଉପରେ, ଏହି ପ୍ରକଳ୍ପ ଭାରତର ସାମୁଦ୍ରିକ ଶକ୍ତି, ଅର୍ଥନୈତିକ ସମ୍ଭାବନା ଏବଂ ଜାତୀୟ ସୁରକ୍ଷାକୁ ନୂତନ ଶକ୍ତି ପ୍ରଦାନ କରିବାର ସମ୍ଭାବନା ରଖିଛି ।