ଚୌଦ୍ବାର: ସାରା ଓଡ଼ିଶାରେ ଟିପିସିଓଡିଏଲ ବିଜୁଳି ଦାୟିତ୍ୱ ନେଲାପରେ ଲୋକମାନଙ୍କ ଠାରୁ ମନ ଇଛା ବହୁ ଚଢ଼ା ରେଟ୍ରେ ଟଙ୍କା ଆଦାୟ କରୁଥିବା ଅଭିଯୋଗ ହୋଇଥିବା ଦୃଷ୍ଟାନ୍ତ ରହିଛି। ଏମିତିକି ଅନେକ ସ୍ଥାନରେ ଥିବା ଟ୍ରାନ୍ସଫର୍ମର ମୁକୁଳା ଅବସ୍ଥାରେ ପଡ଼ିରହିଥିବା ନେଇ ମଧ୍ୟ ଅଭିଯୋଗ ହୋଇଛି l ଏଭଳି ଏକ ମୁକୁଳା ଟ୍ରାନ୍ସଫର୍ମର ସଂସ୍ପର୍ଶରେ ଆସି ପ୍ରାଣ ହରାଇଥିଲେ ଆଗ୍ରାହାଟ ସ୍ଥିତ ସୁକୁଆଖାଇ ବସ୍ତିର ଜଣେ ଶ୍ରମିକ। ଘଟଣାକୁ ପ୍ରାୟ ଏକ ବର୍ଷ ବିତି ଯାଇଥିଲେବି କ୍ଷତିପୂରଣ ନମିଳିବାରୁ ବାଧ୍ୟ ହୋଇ ଟପିସିଓଡିଏଲ ଅଫିସ ଘେରାଉ କରିଛନ୍ତି ପରିବାରଲୋକେ।
ସୂଚନା ଅନୁଯାୟୀ, ଆଗ୍ରାହାଟ ସ୍ଥିତ ସୁକୁଆଖାଇ ବସ୍ତିର ଜଣେ ଶ୍ରମିକ ତାଙ୍କ ପୁଅକୁ ଧରି ଟ୍ରାନ୍ସଫର୍ମର ନିକଟରେ ଚାଲିି ଚାଲି ଯାଉଥିବାବେଳେ, ଟ୍ରାନ୍ସଫର୍ମରରୁ ପାଖରେ ଛିଡ଼ି ପଡ଼ିଥିବା ଏକ ବିଦ୍ୟୁତ ତାର ପ୍ରଥମେ ଶ୍ରମିକଙ୍କ ପୁଅ ସଂସ୍ପର୍ଶରେ ଆସିଥିଲେ। ଆଉ ପୁଅକୁ ବଞ୍ଚାଇବାକୁ ଯାଇ ତାର ବାପା ବିଦ୍ୟୁତ ଆଘାତରେ ମୃତ୍ୟୁ ବରଣ କରିଥିଲେ l ଆଉ ଶ୍ରମିକଙ୍କ ମୃତ୍ୟୁ ପରେ ଶବକୁ ରାସ୍ତା ଉପରେ ରଖି ଆନ୍ଦୋଳନ କରିଥିଲେ ଗ୍ରାମବାସୀ। ପରେ ସ୍ଥାନୀୟ ସରପଞ୍ଚ, ପୌର ଉପାଧକ୍ଷଙ୍କ ସମେତ ଟିପିସିଓଡିଏଲ ଏସଡିଓ ପରିବାରକୁ ବୁଝାସୁଝା କରି ତାଙ୍କୁ କ୍ଷତିପୂରଣ ଦିଆଯିବ ବୋଲି ପ୍ରତିଶୃତି ଦେବା ପରେ ଶବ ଦାହ ହୋଇଥିଲା l
ତେବେ ଘଟଣାକୁ ବର୍ଷେ ବିତି ଯାଇଥିଲେ ସୁଦ୍ଧା କୌଣସି ସୁଫଳ ନମିଳିବାରୁ ମୃତକଙ୍କ ପତ୍ନୀ ତୁଳସୀ ଶିଙ୍କୁ ଏବଂ ପରିବାରଲୋକେ ଶୁକ୍ରବାର ଚୌଦ୍ୱାର ଟିପିସିଓଡିଏଲ ଅଫିସ ଘେରାଉ କରିଥିଲେ l ଘଟଣା ସ୍ଥଳରେ ଚୌଦ୍ୱାର ପୁଲିସ ପହଞ୍ଚି ସେମାନଙ୍କୁ ବୁଝାସୁଝା କଲା ପରେ ତଥା ଏସଡିଓ ୧୫ ଦିଦ ମଧ୍ୟରେ କ୍ଷତି ପୂରଣ ମିଳିବା ସହ ନିଯୁକ୍ତି ଦେବା ପାଇଁ ପୁଣି ପ୍ରତିଶୃତି ଦେଇଥିଲେ l ଅନ୍ୟ ପକ୍ଷରେ ପୌରଉପାଧ୍ୟକ୍ଷ ଶୁଭେନ୍ଦୁ ସାମଲ ଘଟଣା ସ୍ଥଳରେ ପହଂଚି ଆନ୍ଦୋଳନରତ ମହିଳା ଓ ଯୁବକମାନଙ୍କୁ ସାଙ୍ଗରେ ନେଇ ଶୀଘ୍ର ନ୍ୟାୟ ଦେବା ପାଇଁ ଟିପିସିଓଡିଏଲ ଅଧିକାରୀଙ୍କ ପାଖ ନେଇଯାଇଥିଲେ l ନିର୍ବାଚନ ପ୍ରକ୍ରିୟା ଚାଲୁଥିବାରୁ ଘଟଣା ଟିକୁ ରଫାଦଫା କରିବା ପାଇଁ ଉଦ୍ୟମ ଚାଲିଛି ବୋଲି ବୁଦ୍ଧିଜୀବି ମହଲରେ ଆଲୋଚନା ଜୋର ଧରିଛି l
