ଭଦ୍ରକ: ଭଦ୍ରକ ହଳଦୀଡିହ ଠାରେ ଘଟିଥିବା ଭୟଙ୍କର ବାଣ ବିସ୍ପୋରଣ ଘଟଣା। କଟକ ଏସସିବିରେ ଚିକିତ୍ସିତ ଅବସ୍ଥାରେ ୨ ଗୁରୁତରଙ୍କ ମୃତ୍ୟୁ ଘଟିଛି। ମୃତକ ହେଉଛନ୍ତି ନାବାଳକ ସେଖ ମୁସରଫ ଏବଂ ଜଣେ ମହିଳା ହେଲେ ରାଇତୁନ ବିବି। ମଙ୍ଗଳବାର ଏହି ଦୁଇ ମୃତକଙ୍କ ସମେତ ଅନ୍ୟ ତିନି ଜଣକୁ ଗୁରୁତର ଅବସ୍ଥାରେ ଏସସିବିକୁ ସ୍ଥାନାନ୍ତର କରାଯାଇଥିଲା।
ସୂଚନାଥାଉକି, ମଙ୍ଗଳବାର ହଳଦୀଡିହ ନିକଟରେ ଥିବା ଏକ ବେଆଇନ ବାଣ ଗୋଦାମରେ ଭୟଙ୍କର ବିସ୍ଫୋରଣ ହୋଇଥିଲା। ବିସ୍ଫୋରଣ ଫଳରେ ଗୋଦାମରେ କାମ କରୁଥିବା ୫ ଜଣ ଗୁରୁତର ହୋଇପଡ଼ିଥିଲେ।ଗୁରୁତରଙ୍କୁ ଚିକିତ୍ସା ପାଇଁ ପ୍ରଥମେ ଭଦ୍ରକ ମେଡିକାଲ ଓ ପରେ କଟକ ଏସସିବିକୁ ସ୍ଥାନାନ୍ତର କରାଯାଇଥିଲା। ବିସ୍ଫୋରଣ ପଛର ପ୍ରକୃତ କାରଣ ଜଣାପଡ଼ିନଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ତେବେ ପ୍ରାଥମିକ ତଦନ୍ତରୁ ଗୋଦାମରେ ବେଆଇନ ଭାବରେ ବାଣ ଗଚ୍ଛିତ ରହିଥିବା ଜଣାପଡ଼ିଥିଲା।
ସେପଟେ ଉଭୟ ଆହତ ଓ ମୃତକଙ୍କ ପରିବାରବର୍ଗକୁ ଏସସିବିରେ ଭେଟିଛନ୍ତି ପୂର୍ବତନ ବିଧାୟକ ପ୍ରଫୁଲ୍ଲ ସାମଲ। ଏହି ବାଣ କାରଖାନାରେ ନିୟୋଜିତ ସମସ୍ତ ଶ୍ରମିକ ଗରିବ ଶ୍ରେଣୀର ଲୋକ ତେଣୁ ତାଙ୍କୁ ତୁରନ୍ତ କ୍ଷତି ପୂରଣ ଦେବା ସହ ଆହତଙ୍କ ଚିକିତ୍ସା ଖର୍ଚ୍ଚ ସରକାର ବହନ କରିବା ଦରକାର ବୋଲ କହିଛନ୍ତି ସେ।
ତେବେ କେଉଁଭଳି ପରିସ୍ଥିତିରେ ଏଭଳି କାରଖାନା ଚଳୁଛି ପ୍ରଶାସନ ତଦନ୍ତ କରି ପଦକ୍ଷେପ ନେବା ଆବଶ୍ୟକ ବୋଲି କହିଛନ୍ତି ପୂର୍ବତନ ବିଧାୟକ। ଏହି ବେଆଇନ ବାଣ କାରଖାନା କିଭଳି ଚାଲିଥିଲା ଆଉ ଯିଏ ଏଥି ପାଇଁ ଦୋଷୀଙ୍କ ବିରୋଧରେ କାର୍ଯ୍ୟନୁଷ୍ଠାନ ଗ୍ରହଣ କରାଯାଉ ବୋଲି ଦାବି କରିଛନ୍ତି ସ୍ଥାନୀୟ କାଉନସିଲର। ସେପଟେ ଏହି ଘଟଣାରେ ଦୁଃଖ ପ୍ରକାଶ କରିବା ସହ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଲେଖାଏଁ ସହାୟତା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ।
