‘ଅନୁମତିର ଆବଶ୍ୟକତା ନାହିଁ’; ବିରୋଧୀଙ୍କ ଅଭିଯୋଗ ପରେ ସ୍ପଷ୍ଟ ମତ ରଖିଲେ କେନ୍ଦ୍ର ସରକାର

ନୂଆଦିଲ୍ଲୀ: ରୁଷରୁ ତେଲ କିଣିବା ପାଇଁ ଆମେରିକା ଭାରତକୁ ୩୦ ଦିନର ଛାଡ ଘୋଷଣା କରିଥିଲା । ତେବେ ଭାରତକୁ ଆମେରିକାର ଅନୁମତି କାହିଁକି ଦରକାର ପଡ଼ିଲା ବୋଲି ବିରୋଧୀ କେନ୍ଦ୍ରର ମୋଦୀ ସରକାରଙ୍କୁ ପ୍ରଶ୍ନ କରିଥିଲେ । ଆମ ପ୍ରସଙ୍ଗରେ ଆମେରିକା କିଏ ବୋଲି ଜବାବ ମାଗିଥିଲେ ବିରୋଧୀ । ଆଉ ଏବେ ଏ ସମ୍ପର୍କରେ କେନ୍ଦ୍ର ସରକାର ସ୍ପଷ୍ଟ ମତ ରଖିଛନ୍ତି । ମୋଦୀ ସରକାର କହିଛନ୍ତି ଯେ, ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ଭାରତ ଯେକୌଣସି ଦେଶରୁ ତେଲ କିଣିବ। ସରକାର କହିଛନ୍ତି ଯେ, ଇରାନ -ଆମେରିକା ଇସ୍ରାଏଲ ବିବାଦ ଯୋଗୁଁ ହର୍ମୁଜ୍ ପ୍ରଣାଳୀକୁ ନେଇ ସୃଷ୍ଟି ହୋଇଥିବା ଉତ୍ତେଜନାକୁ ଦୃଷ୍ଟିରେ ରଖି, ଭାରତ ଯେଉଁ ଦେଶଠାରୁ ସର୍ବୋତ୍ତମ ମୂଲ୍ୟ ପାଇବ ସେଠାରୁ ଅଶୋଧିତ ତେଲ କିଣିବା ଜାରି ରଖିବ।

#HormuzRoute पर बढ़ते तनाव के बावजूद भारत की ऊर्जा आपूर्ति सुरक्षित और स्थिर है।

भारत ने अपने कच्चे तेल के स्रोत 27 से बढ़ाकर 40 देशों तक विविधीकृत किए हैं, जिससे आपूर्ति के कई वैकल्पिक मार्ग सुनिश्चित हुए हैं।

राष्ट्रीय हित में भारत वहीं से तेल खरीदता है जहाँ सबसे प्रतिस्पर्धी… pic.twitter.com/N9Dmy05puz

— पीआईबी हिंदी (@PIBHindi) March 7, 2026

କେନ୍ଦ୍ର ସରକାର କହିଛନ୍ତି, ‘ହର୍ମୁଜ୍ ପ୍ରଣାଳୀରେ ବଢ଼ୁଥିବା ଉତ୍ତେଜନା ସତ୍ତ୍ୱେ, ଭାରତର ଶକ୍ତି ଯୋଗାଣ ସୁରକ୍ଷିତ ଏବଂ ସ୍ଥିର ରହିଛି। ଭାରତ ଅଶୋଧିତ ତୈଳ ୨୭ ରୁ ୪୦ ଦେଶ ଠାରୁ କ୍ରୟ କରିବା ଲାଗି ନିଜର ନେଟଓ୍ବାର୍କ ବୃଦ୍ଧି କରିଛି । ବହୁବିଧ ବିକଳ୍ପ ଯୋଗାଣ ମାର୍ଗ ସୁନିଶ୍ଚିତ କରିଛି। ଜାତୀୟ ସ୍ୱାର୍ଥରେ, ଭାରତ ସର୍ବାଧିକ ପ୍ରତିଯୋଗିତାମୂଳକ ଏବଂ ସୁଲଭ ମୂଲ୍ୟରେ ତୈଳ କ୍ରୟ କରେ। ନିରବଚ୍ଛିନ୍ନ ଯୋଗାଣ ସୁନିଶ୍ଚିତ କରାଯାଉଛି ।’ ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ଯୋଗୁଁ ଆମେରିକା ଦ୍ୱାରା ଦିଆଯାଇଥିବା ଅସ୍ଥାୟୀ ଛାଡ଼ ସତ୍ତ୍ୱେ ଭାରତ ଶନିବାର (ମାର୍ଚ୍ଚ ୭, ୨୦୨୬) ନିଶ୍ଚିତ କରିଛି ଯେ, ରୁଷରୁ ତେଲ ଆମଦାନି ଜାରି ରହିବ। କେନ୍ଦ୍ର ସରକାର କହିଛନ୍ତି ଯେ, ତୈଳ କ୍ରୟ ପାଇଁ ନୂଆଦିଲ୍ଲୀକୁ କୌଣସି ଦେଶର ଅନୁମତି ଆବଶ୍ୟକ ନାହିଁ।

ସରକାର କହିଛନ୍ତି, ‘ଭାରତ କେବେବି ରୁଷୀୟ ତେଲ କିଣିବା ପାଇଁ କୌଣସି ଦେଶର ଅନୁମତି ଉପରେ ନିର୍ଭର କରିନାହିଁ। ଭାରତ ରୁଷୀୟ ତେଲ ଆମଦାନୀ ଜାରି ରଖିବ ଏବଂ ରୁଷ ଭାରତର ସବୁଠାରୁ ବଡ଼ ଅଶୋଧିତ ତୈଳ ଯୋଗାଣକାରୀ ଦେଶ ରହିବ । ରୁଷ-ୟୁକ୍ରେନ ଯୁଦ୍ଧର ତିନି ବର୍ଷ ମଧ୍ୟରେ, ଆମେରିକା ଏବଂ ୟୁରୋପୀୟ ସଂଘର ଆପତ୍ତି ସତ୍ତ୍ୱେ ଭାରତ ରୁଷୀୟ ତେଲ କିଣିବା ଜାରି ରଖିଥିଲା। ରିହାତି ମୂଲ୍ୟ ଏବଂ ରିଫାଇନାରୀ ଚାହିଦା ଯୋଗୁଁ ୨୦୨୨ ପରେ ଆମଦାନୀ ବୃଦ୍ଧି ପାଇଥିଲା।’

ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ବିଶ୍ୱ ଶକ୍ତି ପ୍ରବାହ ଏବଂ ଜାହାଜ ଚଳାଚଳ ମାର୍ଗକୁ ବାଧାପ୍ରାପ୍ତ କରିଛି । ଫଳରେ ତୈଳ ମୂଲ୍ୟ ବୃଦ୍ଧି ପାଇଛି। ଗୁରୁବାର ଆମେରିକା ଭାରତକୁ ରୁଷୀୟ ତୈଳ ବିକ୍ରୟ କରିବାକୁ ଅନୁମତି ଦେବା ପାଇଁ ରୁଷ ଉପରେ ଅସ୍ଥାୟୀ ଭାବରେ କଟକଣା ଛାଡ଼ କରିଥିଲା। ଏ ସମ୍ପର୍କରେ, କେନ୍ଦ୍ର ସରକାର କହିଛନ୍ତି, ‘ରୁଷ ସହିତ ବାଣିଜ୍ୟ ଅବିରତ ଜାରି ରହିଛି। ଏହି ଛାଡ଼ ହେଉଛି ରୁଷ ସହିତ ଆମର ବାଣିଜ୍ୟକୁ ଦୁର୍ବଳ କରିବାର ଏକ ପ୍ରୟାସ। ଭାରତ ବିଶ୍ୱକୁ ରିଫାଇନଡ୍ ଉତ୍ପାଦର ଏକ ପ୍ରମୁଖ ରପ୍ତାନିକାରୀ, ଏବଂ ଏହି ପରିସ୍ଥିତି ଏହାର ଶକ୍ତି ସୁରକ୍ଷାକୁ ଦୁର୍ବଳ ନୁହେଁ, ମଜଭୁତ କରେ ।’