ଭାରତକୁ ନେଇ ଆସିଲା ଏକ ବଡ଼ ଖୁସି ଖବର, ୱାର୍ଲଡ ବ୍ୟାଙ୍କ FSA ରିପୋର୍ଟକୁ ନେଇ ସାରା ବିଶ୍ୱ ଆଶ୍ଚର୍ଯ୍ୟ

ନୂଆଦିଲ୍ଲୀ ୮।୧୧:  ଭାରତର ଅର୍ଥ ବ୍ୟବସ୍ଥା ଆଜି ଏକ ନୂଆ ମୋଡ଼ରେ ଛିଡା ହୋଇଛି, ଏହି ଠାରୁ ଦେଶର ଆଗାମୀ ଲକ୍ଷ୍ୟ ବୈଶ୍ୱିକ ମଞ୍ଚରେ ଏକ ଆର୍ଥିକ ମହାଶକ୍ତିରେ ପରିଣତା ହେବା। ନିକଟରେ ୱାର୍ଲଡବ୍ୟାଙ୍କର ଫାଇନାନ୍ସ ସେକ୍ଟର ଆସେସମେଣ୍ଟ (ଏଫଏସଏ) ରିପୋର୍ଟ ଏହି ଦିଗରେ ଭାରତର ପ୍ରଗତିକୁ ଉଚ୍ଚ ପ୍ରଶଂସା କରିଛି। କୁହାଯାଇଛି ଯଦି ଏବେକା ବେଗ ଜାରି ରହେ ଓ ସଂସ୍କାରକୁ ଆହୁରି ଗତି ଦିଆଯାଏ ତେବେ ୨୦୪୭ ସୁଦ୍ଧା ଭାରତ ୩୦ ଟ୍ରିଲିୟନ ଡଲାରର ଅର୍ଥ ବ୍ୟବସ୍ଥାରେ ପରିଣତ ହୋଇ ପାରିବ।  

ରିପୋର୍ଟରେ ଭାରତର ଡିଜିଟାଲ ଚମତ୍କାରର ପ୍ରଶଂସା
ରିପୋର୍ଟରେ ଭାରତର ୱାର୍ଲଡ କ୍ଲାସ୍ ଡିଜିଟାଲ ପବ୍ଲିକ୍ ଇନଫ୍ରାଷ୍ଟ୍ରକ୍ଚର କୁ ଏକ ବଡ଼ ଉପଲବ୍ଧି ବୋଲି କୁହାଯାଇଛି। ଆଧାର, ୟୁପିଆଇ ଓ ଜନଧନ ଯୋଜନା କାର୍ଯ୍ୟକ୍ରମ ଦେଶର ଆର୍ଥିକ ସମାବେଶନକୁ ଗତି ଦେଇଛି। ଏହି ସବୁ ଉଦ୍ୟମ ଯୋଗୁ ଏବେ ସହରରୁ ଗାଁ ବ୍ୟାଙ୍କିଙ୍ଗ ସେବାର ପହଞ୍ଚ ସୁଗମ ହୋଇଛି। ଉଲ୍ଲେଖଯୋଗ୍ୟ ଯେ ମହିଳାଙ୍କ ନିମନ୍ତେ ଆର୍ଥିକ ସେବା ପହଞ୍ଚ ବଢାଇବା ଉପରେ ରିପୋର୍ଟରେ ଗୁରୁତ୍ୱ ଦିଆଯାଇଛି। ୱାର୍ଲଡ ବ୍ୟାଙ୍କ ଅନୁସାରେ ଯଦି ମହିଳା ଆର୍ଥିକ ନେଣଦେଣରେ ସକ୍ରିୟ ରୂପେ ସାମିଲ ହୁଅନ୍ତି ତେବେ ଭାରତର ଆର୍ଥିକ ଶକ୍ତି ଆହୁରି ମଜଭୁତ ହେବ।

ଦୃଢ କ୍ୟାପିଟାଲ ମାର୍କେଟ୍
ରିପୋର୍ଟ ଅନୁସାରେ ୨୦୧୭ ମସିହା ପରେ ଭାରତର କ୍ୟାପିଟାଲ ମାର୍କେଟ୍ (ପୁଞ୍ଜିବଜାର) ଅଧିକ ସଶକ୍ତ ହୋଇଛି। ଇକ୍ୱିଟି, ସରକାରୀ ବଣ୍ଡ ଓ କର୍ପୋରେଟ ବଣ୍ଡ ମିସାଇ ଭାରତର କ୍ୟାପିଟାଲ ମାର୍କେଟ ଜିଡିପିର ୧୭୫%କୁ ପହଞ୍ଚିଛି। ଏହା ପୂର୍ବରୁ ମାତ୍ର ୧୪୪% ଥିଲା। ଏହି ଅଭିବୃଦ୍ଧି ପଛରେ ନିବେଶକଙ୍କ ବର୍ଦ୍ଧିତ ଆସ୍ଥା, ପାରଦର୍ଶୀ ବଜାର ବ୍ୟବସ୍ଥା ଓ ବୈଷୟିକ ଇନଫ୍ରାଷ୍ଟ୍ରକ୍ଚରର ବଡ ଯୋଗଦାନ ରହିଛି।

ଆର୍ଥିକ ସୁଧାରର ବେଗ ବଢିଛି
ୱାର୍ଲଡବ୍ୟାଙ୍କ ଏହା ବି ସ୍ପଷ୍ଟ କରିଛି ଯେ ଭାରତକୁ ଆଗାମୀ ୨ ଦଶକରେ ଆର୍ଥିକ ରୂପେ ଶୀର୍ଷ ଦେଶଙ୍କ ମଧ୍ୟରେ ସାମିଲ ହେବା ଲାଗି ନିଜ ଫାଇନାନ୍ସିଆଲ ସେକ୍ଟରରେ ଆହୁରି ସୁଧାର କରିବାକୁ ପଡିବ। ଘରୋଇ ପୁଞ୍ଜି ସଂଗ୍ରହର ନୂଆ ରାସ୍ତା ଖୋଲିବା, ଏମଏସଏମଇକୁ ଶସ୍ତା ପୁଞ୍ଜି ଉପଲବ୍ଧ କରିବା ଓ ଇନୋଭେସନ ଆଧାରିତ ଉତ୍ପାଦ ବିକଶିତ କରିବା ଆବଶ୍ୟକତା ଥିବା କୁହାଯାଇଛି।

ଭାରତର ନୀତି ଓ ବୈଶ୍ୱିକ ବିଶ୍ୱାସ
ଭାରତ ସରକାର ଏହି ରିପୋର୍ଟକୁ ସ୍ୱାଗତ କରି କହିଛନ୍ତି ଯେ ଆଇଏମଏଫ ଏବଂ ୱାର୍ଲଡବ୍ୟାଙ୍କ  ଯୁଗ୍ମ ଟିମ ଦ୍ୱାରା କରାଯାଇଥିବା ଏହି ମୂଲ୍ୟାୟନ ଭାରତର ମଜଭୁତ ଆର୍ଥିକ ନୀତିକୁ ପ୍ରମାଣିତ କରୁଛି। ମହାମାରୀ ଓ ବୈଶ୍ୱିକ ଆର୍ଥିକ ଅସ୍ଥିରତା କାଳରେ ଭାରତର ଆର୍ଥିକ ତନ୍ତ୍ର ନା କେବଳ ସ୍ଥିର ରହିଛି ବରଂ ଅଧିକ ବିବିଧ  ହୋଇ ପାରିଛି।