ଲକ୍ଷ୍ନୌ: ଲଗାତାର ପାଞ୍ଚ ପରାଜୟ ପରେ ଶେଷରେ ବିଜୟର ସ୍ଵାଦ ଚାଖିଲା ଚେନ୍ନାଇ ସୁପର କିଙ୍ଗ୍ସ। ବୋଲରଙ୍କ ମାପଚୁପ ବୋଲିଂ ପରେ ଦୁବେ ଓ ଧୋନୀଙ୍କ ବିସ୍ଫୋରକ ବ୍ୟାଟିଂ ବଳରେ ଚେନ୍ନାଇ ୫ ଓ୍ଵିକେଟ୍ରେ ଲକ୍ଷ୍ନୌକୁ ତାରି ଘରେ ହରାଇଛି। ପ୍ରଥମେ ବ୍ୟାଟିଂ କରି ଲକ୍ଷ୍ନୌ ୭ ଓ୍ଵିକେଟ୍ ହରାଇ ୧୬୬ ରନ କରିଥିଲା। ଦଳ ପକ୍ଷରୁ ଅଧିନାୟକ ଋଷଭ ପନ୍ତ ୬୩ ରନ ଓ ମିଚେଲ୍ ମାର୍ଶ ୩୦ ରନ କରିଥିଲେ। ଜବାବରେ ଚେନ୍ନାଇ ୧୯.୩ ଓଭରରେ ୫ ଓ୍ଵିକେଟ୍ ହରାଇ ମ୍ୟାଚ୍ ଜିତି ନେଇଛି। ଶିବମ ଦୁବେ ଅପରାଜିତ ୪୩ ରନ ଓ ଧୋନୀ ୧୧ ବଲରୁ ୨୬ ରନ କରି ଦଳକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ଚେନ୍ନାଇ ନିଜର ସପ୍ତମ ମ୍ୟାଚ୍ରୁ ଦ୍ଵିତୀୟ ବିଜୟ ହାସଲ କରିଛି। ଅନ୍ୟପଟେ ଲକ୍ଷ୍ନୌ ସପ୍ତମ ମ୍ୟାଚ୍ରୁ ତୃତୀୟ ପରାଜୟ ଭୋଗିଛି।
୧୬୭ ରନର ବିଜୟ ଲକ୍ଷ୍ୟକୁ ପିଛା କରିଥିବା ଚେନ୍ନାଇ ସୁପର କିଙ୍ଗ୍ସର ଦୁଇ ଓପନର ଶେଖ ରଶିଦ ଓ ରଚିନ ରବୀନ୍ଦ୍ର ୫୨ ରନ ଯୋଡ଼ିଥିଲେ। ପ୍ରଥମ ଥର ସୁଯୋଗ ପାଇଥିବା ଶେଖ ରଶିଦ ୨୭ ରନ କରି ଆଉଟ୍ ହୋଇଥିଲେ। କ୍ରିଜରେ ଜମିଥିବା ରଚିନ ୨୨ ବଲରୁ ୫ ଚୌକା ସହ ୩୭ ରନର ଇନିଂସ ଖେଳିଥିଲେ। ରାହୁଲ ତ୍ରିପାଠୀ(୯) ନିରାଶ କରିଥିଲେ। ରବୀନ୍ଦ୍ର ଜାଡ଼େଜା (୭ ରନ) କ୍ରିଜରେ ଅଧିକ ସମୟ ତିଷ୍ଠି ପାରି ନ ଥିଲେ।
ସହଜରେ ବିଜୟ ଆଡ଼କୁ ଅଗ୍ରସର ହେଉଥିବା ଚେନ୍ନାଇ ୯୬ ରନରେ ୪ ଓ୍ଵିକେଟ୍ ହରାଇ ଚାପଗ୍ରସ୍ତ ହୋଇଥିଲା। ବିଜୟ ଶଙ୍କର(୯ ରନ) କିଛି ଖାସ୍ କରି ପାରି ନ ଥିଲେ। ତେବେ ଶିବମ ଦୁବେ ଓ ଏମଏସ ଧୋନୀ ନିଜର ଖ୍ୟାତି ଅନୁସାରେ ବ୍ୟାଟିଂ କରି ଦଳକୁ ମ୍ୟାଚ୍ ଜିତାଇଛନ୍ତି। ଦୁହେଁ ଅବିଭାଜିତ ଓ୍ଵିକେଟ୍ରେ ୫୭ ରନ ଯୋଡ଼ିଥିଲେ। ଦୁବେ ୩୭ ବଲ୍ରୁ ୩ ଚୌକା ଓ ୨ ଛକା ସହ ୪୩ ରନରେ ଅପରାଜିତ ଥିଲେ। ଧୋନୀ ମାତ୍ର ୧୧ ବଲରୁ ୪ ଚୌକା ଓ ୧ ଛକା ସହ ଦ୍ରୁତ ୨୬ ରନ କରି ଦଳକୁ ଜିତାଇଛନ୍ତି। ଲକ୍ଷ୍ନୌ ପକ୍ଷରୁ ରବି ବିଷ୍ଣୋଇ ୧୮ ରନ ଦେଇ ୨ଟି ଓ୍ଵିକେଟ୍ ଅକ୍ତିକାର କରିଥିଲେ।
