ତାତିଲେ ଦର୍ଶକ, ଯାତ୍ରା ପେଣ୍ଡାଲ ଉପରକୁ ଫିଙ୍ଗିଲେ ଚେୟାର

ଭଦ୍ରକ ୨୭।୧୦ : ଟିକେଟ ପାଇଁ ହଙ୍ଗାମା । ଚେୟାର ଫିଙ୍ଗିଲେ ଦର୍ଶକ । ଶେଷ ବାଧ୍ୟ ହୋଇ କିଛି ଘଣ୍ଟା ପାଇଁ ବନ୍ଦ ରହିଲା ଯାତ୍ରା ପରିବେଶଷ । ଯାହାଫଳରେ ଯାତ୍ରା ଦେଖିବାକୁ ଆସିଥିବା ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା । 

ଭଦ୍ରକ ଜିଲ୍ଲାରେ କାଳୀପୂଜା ଅବସରରେ ୬ଟି ଅପେରା ନାଟକ ପରିବେଷଣ କରୁଛନ୍ତି । ସମସ୍ତ ପାର୍ଟି ପ୍ରାୟ ଭଲ ବ୍ୟବସାୟ କରୁଛନ୍ତି । ତେବେ ଚରମ୍ପାରେ ଯାତ୍ରା ଇନ୍ଦ୍ରଭୁବନ ପକ୍ଷରୁ ଯାତ୍ରା ପରିବେଷଣ ହେଉଥିଲା । ଏହି ସମୟରେ ହଠାତ୍‌ ଦେଖିବାକୁ ମିଳିଲା ଅଭାବନୀୟ ଘଟଣା । ନାଟକ ନଅଙ୍କ ଦୁର୍ଭିକ୍ଷ ପରିବେଷଣ ବେଳେ ଟିକେଟ ନମିଳିବାରୁ ହଙ୍ଗାମା କରିଥିଲେ ଦର୍ଶକ । ଏପିରିକି ଯେଉଁ ଦର୍ଶକ ଟିକେଟ ପାଇନଥିବାରୁ , ସେମାନେ ଜୋର ଜବରଦସ୍ତ ଯାତ୍ରା ଆଖଡ଼ା ମଧ୍ୟ ପ୍ରବେଶ କରିଥିଲେ । ଆଉ ସେଠାରେ ପଡ଼ିଥିବା ଚେୟାରକୁ ଯାତ୍ରା ପେଣ୍ଡାଲ ଉପରକୁ ଫିଙ୍ଗିଥିଲେ । ଯାହାଫଳରେ କିଛି ସମୟ ପାଇଁ ଯାତ୍ରା ପରିବେଷଣ ବନ୍ଦ ହୋଇଥିଲା । ଏହାପରେ ଯାତ୍ରା କମିଟି ଓ ଯାତ୍ରା ପାର୍ଟିର ସଦସ୍ୟ ଲୋକଙ୍କୁ ବୁଝାସୁଝା କରିବା ପରେ ସ୍ଥିତି ଶାନ୍ତ ପଡିଥିଲା । ଆଉ ପୁଣି ଥରେ ଆରମ୍ଭ ହୋଇଥିଲା ଯାତ୍ରା ପରିବେଷଣ ।