ନୂଆଦିଲ୍ଲୀ: ଦିଲ୍ଲୀରୁ ଗୋଆ ଅଭିମୁଖେ ଯାତ୍ରା କରୁଥିବା ଇଣ୍ଡିଗୋ ବିମାନ ମୁମ୍ବାଇରେ ଜରୁରୀକାଳୀନ ଅବତରଣ କରିଛି । ଏହି ବିମାନର ଅବତରଣ ସମୟ ରାତି ୯.୪୨ ମିନିଟ୍ ଥିଲା । ଏହାର ଗୋଟିଏ ଇଞ୍ଜିନ୍ ଖରାପ ହେବାରୁ ପାଇଲଟ୍ ରାତି ୯.୨୫ ମିନିଟରେ ଆଲାର୍ମ ବଜାଇଥିଲେ । ଏହାପରେ ବିମାନକୁ ସୁରକ୍ଷିତ ଭାବରେ ମୁମ୍ବାଇ ବିମାନବନ୍ଦରରେ ଅବତରଣ କରାଯାଇଥିଲା । ଫ୍ଲାଇଟ୍ ଟ୍ରାକର୍ସରୁ ଜଣାପଡ଼ିଛି ଯେ ଇଣ୍ଡିଗୋ ଏକ ବିମାନ ରାତି ପ୍ରାୟ ୮ଟାରେ ଦିଲ୍ଲୀରୁ ଉଡାଣ ଭରିଥିଲା । ତେବେ ଏଥିରେ ପ୍ରାୟ ଅଧ ଘଣ୍ଟା ବିଳମ୍ବ ହୋଇଥିଲା ଏବଂ ଏହାକୁ ମୁମ୍ବାଇକୁ ସ୍ଥାନାନ୍ତରିତ କରାଯାଇଥିଲା । ରାତି ପ୍ରାୟ ୯.୫୨ ମିନିଟରେ ଛତ୍ରପତି ଶିବାଜୀ ମହାରାଜ ଆନ୍ତର୍ଜାତୀୟ ବିମାନବନ୍ଦରରେ ଅବତରଣ କରିଥିଲା ।
ଏୟାରବସ୍ A320neoରେ ଯାତ୍ରା କରୁଥିବା ଯାତ୍ରୀଙ୍କ ସଂଖ୍ୟା ଜଣା ପଡ଼ିନାହିଁ । ମିଡିଆ ରିପୋର୍ଟ ଅନୁସାରେ, ଦିଲ୍ଲୀ-ଗୋଆ ରୁଟରେ ଚଳାଚଳ କରୁଥିବା ଇଣ୍ଡିଗୋ ବିମାନ 6E-6271କୁ ଗୋଟିଏ ଇଞ୍ଜିନରେ ତ୍ରୁଟି ଯୋଗୁଁ ମୁମ୍ବାଇକୁ ସ୍ଥାନାନ୍ତର କରାଯିବା ପରେ ଏହାକୁ ସମ୍ପୂର୍ଣ୍ଣ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି ।
ଇଣ୍ଡିଗୋର ଜଣେ ମୁଖପାତ୍ର କହିଛନ୍ତି ଯେ ଦିଲ୍ଲୀରୁ ଗୋଆର ମନୋହର ଅନ୍ତର୍ଜାତୀୟ ବିମାନବନ୍ଦରକୁ ଉଡ଼ାଣ ଭରିବା ସମୟରେ ବିମାନ ନମ୍ବର 6E 6271 ରେ ଯାନ୍ତ୍ରିକ ତ୍ରୁଟି ଦେଖାଯାଇଥିଲା । ପ୍ରବକ୍ତା କହିଛନ୍ତି, "ପ୍ରକ୍ରିୟା ପାଳନ କରି ବିମାନକୁ ଅନ୍ୟତ୍ର ସ୍ଥାନାନ୍ତରିତ କରାଯାଇ ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରାଯାଇଥିଲା।" ଅଧିକାରୀ ଜଣକ ଆହୁରି କହିଛନ୍ତି ଯେ ବିମାନ ପୁନର୍ବାର କାର୍ଯ୍ୟ ଆରମ୍ଭ କରିବା ପୂର୍ବରୁ ଆବଶ୍ୟକୀୟ ଯାଞ୍ଚ ଏବଂ ରକ୍ଷଣାବେକ୍ଷଣ କରାଯିବ । ତେବେ ଯାତ୍ରୀଙ୍କ ଅବଶିଷ୍ଟ ଯାତ୍ରା ପାଇଁ ଏକ ବିକଳ୍ପ ବିମାନ ବ୍ୟବସ୍ଥା କରାଯାଇଛି । ଇଣ୍ଡିଗୋର ଜଣେ ମୁଖପାତ୍ର କହିଛନ୍ତି, "ଏହି ପରିସ୍ଥିତି ଯୋଗୁଁ ଆମର ଗ୍ରାହକମାନଙ୍କୁ ହୋଇଥିବା ଅସୁବିଧା ପାଇଁ ଆମେ ଦୁଃଖିତ । ଇଣ୍ଡିଗୋରେ, ଗ୍ରାହକ, କର୍ମଚାରୀ ଏବଂ ବିମାନର ସୁରକ୍ଷା ସବୁଠୁ ଗୁରୁତ୍ୱପୂର୍ଣ୍ଣ।"
