ନୂଆଦିଲ୍ଲୀ: ଦିଲ୍ଲୀ ରାୟ, କାହାର ହେବ ବିଧାନସଭା ବିଜୟ ? କ୍ଷମତା ସିଂହାସନରେ ବସିବ କିଏ ? ଦିଲ୍ଲୀ ବିଧାନସଭା ନିର୍ବାଚନ ଭୋଟ୍ କାଉଣ୍ଟିଂ ଆରମ୍ଭ ହୋଇଛି । ଶୁକ୍ରବାର ସକାଳ ୮ଟାରୁ ବିଭିନ୍ନ ଗଣତି କେନ୍ଦ୍ରରେ ମତଗଣନା ହୋଇଛି । ପ୍ରଥମେ ପୋଷ୍ଟାଲ୍ ବାଲାଟ୍ ଏବଂ ପରେ ଇଭିଏମ୍ ଗଣତି ଜାରି ରହିଛି । ସକାଳ ୯ଟା ପରେ ଭୋଟ୍ ଗଣତି ପ୍ରାରମ୍ଭିକ ଟ୍ରେଣ୍ଡ୍ ସାମ୍ନାକୁ ଆସିବ । କାଉଣ୍ଟିଂକୁ ନଜରରେ ରଖି ଦିଲ୍ଲୀର ୧୧ଟି ଜିଲ୍ଲାର ୧୯ଟି ମତଗଣନା କେନ୍ଦ୍ରରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । ଏପଟେ ରେଜଲ୍ଟ ପୂର୍ବରୁ ୭୦ ବିଧାନସଭା ଆସନରେ ୬୯୯ ପ୍ରାର୍ଥୀ ଛାତି ଧଡ଼ଧଡ଼ ହେଲାଣି । ଫେବ୍ରୁଆରୀ ୫ ତାରିଖରେ ଗୋଟିଏ ପର୍ଯ୍ୟାୟରେ ଦିଲ୍ଲୀ ବିଧାନସଭା ନିର୍ବାଚନ ହୋଇଥିଲା । ମୁଖ୍ୟ ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ରାଜଧାନୀରେ ମୋଟ୍ ୬୦.୫୪ ପ୍ରତିଶତ ଭୋଟିଂ ହୋଇଥିଲା ।
କିଏ ପିନ୍ଧିବ ଦିଲ୍ଲୀରେ ବିଜୟ ମୁକୁଟ । ବିଜେପି ନା ପୁଣି ରିପିଟ୍ କରି ଆପ୍ । ୨୦୧୩ରେ ନିର୍ବାଚନ ରାଜନୀତିରେ ଏଣ୍ଟ୍ରି କରିଥିଲା ଆମ୍ ଆଦମୀ ପାର୍ଟି । ୨୦୧୫ ଦିଲ୍ଲୀ ନିର୍ବାଚନ ଫଳାଫଳକୁ ନେଇ ଅଧିକାଂଶ ଏକଜିଟ୍ ପୋଲ୍ ସର୍ଭେ ଭୁଲ୍ ପ୍ରମାଣିତ ହୋଇଥିଲା । ୬୭ଟି ସିଟ୍ ଜିତି ଚମକାଇ ଦେଇଥିଲା ଆପ୍ । ତେବେ ୨୦୨୦ରେ ଆପ୍ ପୁଣି କ୍ଷମତାକୁ ଫେରିବା ନେଇ ଏକଜିଟ୍ ପୋଲରେ ଆକଳନ କରାଯାଇଥିଲା । ଆଉ ଆକଳନ ସତ ବି ହୋଇଥିଲା । ହେଲେ ୨୦୨୫ରେ ଦିଲ୍ଲୀ ବିଧାନସଭାର ଅଧିକାଂଶ ସିଟ୍ରେ ବିଜେପି ଓ ଆପ୍ ମଧ୍ୟରେ ସିଧାସଳଖ ଫାଇଟ୍ ହେଉଛି । ତେଣୁ ଏକଜିଟ୍ ପୋଲ ସର୍ଭେ ଆକଳନ ଓ ନିର୍ବାଚନ ଫଳାଫଳ ଅଲଗା ହୋଇପାରେ ବୋଲି କୁହାଯାଉଛି । କାରଣ ଦିଲ୍ଲୀରେ କିଛି ବି ହୋଇପାରେ ।
ତେବେ ଏଥର ୨୭ ବର୍ଷର ବନବାସ ଶେଷ କରି ଦିଲ୍ଲୀ ଜିତିବା ପାଇଁ ଜୋରଦାର ଉଦ୍ୟମ କରିଛି ବିଜେପି । ନିର୍ବାଚନର ଠିକ୍ ୪୮ ଘଣ୍ଟା ପୂର୍ବରୁ ଆପ୍ ଛାଡି ବିଜେପିରେ ମିଶିଥିଲେ ୮ ବିଧାୟକ । ଯାହା ଦଳକୁ ଦେଇଥିଲା ବୁଷ୍ଟ । ୧୯୯୭ ମସିହାରେ କ୍ଷମତାରୁ ଯିବା ପରେ ବିଜେପି ଆଉ ଦିଲ୍ଲୀ ସିଂହାସନରେ ବସିନାହିଁ । ୨୦୧୪, ୨୦୧୯, ୨୦୨୪ ଲୋକସଭା ନିର୍ବାଚନରେ ୭ରୁ ୭ ଲୋକସଭା ଆସନ ଜିତିଥିଲେ ବି ବିଧାନସଭାରେ ନିରାଶ ହୋଇଥିଲା ବିଜେପି । ଏଥର କିନ୍ତୁ ଏହି ଟ୍ରେଣ୍ଡ୍ ବଦଳିବ ବୋଲି ଦଳର ନେତା ଆରମ୍ଭରୁ ଦମ୍ଭୋକ୍ତି ଦେଖାଇଛନ୍ତି ।
