Budget 2025: ପ୍ରତିରକ୍ଷା କ୍ଷେତ୍ରକୁ ମିଳିଲା ୬.୮୧ ଲକ୍ଷ କୋଟି ଟଙ୍କାର ବଜେଟ୍, ଗତ ବର୍ଷ ତୁଳନାରେ କିଛି ଅଧିକ

Published By : Prameya-News7 Bureau | February 01, 2025 IST

News7

ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ ମୋଦୀ ସରକାରଙ୍କ ତୃତୀୟ କାର୍ଯ୍ୟକାଳର ପ୍ରଥମ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିଛନ୍ତି। ବଜେଟ୍ ୨୦୨୫ରେ ପ୍ରତିରକ୍ଷା କ୍ଷେତ୍ର ପାଇଁ ୬.୮୧ ଲକ୍ଷ କୋଟି ଟଙ୍କା ଆବଣ୍ଟିତ କରାଯାଇଛି। ଏହା ଗତ ପ୍ରତିରକ୍ଷା ବଜେଟ୍ ତୁଳନାରେ ସାମାନ୍ୟ ଅଧକ ରହିଛି। ଶନିବାର ସଂସଦରେ ବଜେଟ୍ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରମଣ ପ୍ରତିରକ୍ଷା ପାଇଁ ୬,୮୧,୨୧୦ କୋଟି ଟଙ୍କା ଆବଣ୍ଟିତ କରିଛନ୍ତି। ଗତ ବଜେଟ୍‌ରେ ଏହି ପରିମାଣ ୬,୨୧, ୯୪୦ କୋଟି ଟଙ୍କା ଥିଲା।

ବଜେଟ୍‌ରେ ମୋଟ୍ ପ୍ରତିରକ୍ଷା ପୁଞ୍ଜିଗତ ବ୍ୟୟ ୧,୯୨,୩୮୭  କୋଟି ଟଙ୍କା ନିର୍ଦ୍ଧାରିତ କରାଯାଇଛି। ଏଥିରେ ରାଜସ୍ଵ ବ୍ୟୟ ୪,୮୮,୮୨୨ କୋଟି ଟଙ୍କା  ରଖାଯାଇଛି, ଯେଉଁଥିରେ ସେନା, କର୍ମଚାରୀଙ୍କ ପେନସନ ପାଇଁ ୧,୬୦,୭୯୫ କୋଟି ଟଙ୍କା ବ୍ୟୟବରାଦ କରାଯାଇଛି। ପୁଞ୍ଜିଗତ ବ୍ୟୟବରାଦ ଆଧାରରେ ବିମାନ ଓ ଏୟରୋ ଇଞ୍ଜିନ ପାଇଁ ୪୮,୬୧୪ କୋଟି ଟଙ୍କା ଆବଣ୍ଟିତ କରାଯାଇଥିବା ବେଳେ ନୌସେନା ଜାହାଜ ପାଇଁ ୨୪,୩୯୦ କୋଟି ଟଙ୍କା ବ୍ୟୟବରାଦ କରାଯାଇଛି। ଅନ୍ୟ ପ୍ରତିରକ୍ଷା ଉପକରଣ ପାଇଁ ୬୩,୦୯୯ କୋଟି ଟଙ୍କା ଅଟକଳ କରାଯାଇଛି।

ସ୍ଵାଧୀନତା ପରେ ପ୍ରତିରକ୍ଷା କ୍ଷେତ୍ରରେ କେତେ ବଢିଛି ଖର୍ଚ୍ଚ ?

ଦେଶ ସ୍ଵାଧୀନତା ପରେ ପ୍ରଥମ ବଜେଟ୍ ୧୯୪୭ ନଭେମ୍ବର ୨୬ ତାରିଖରେ ଆରକେ ଶନମୁଘନ ଉପସ୍ଥାପନ କରିଥିଲେ। ସେହି ସମୟରେ ବଜେଟ୍‌ର ମୋଟ୍ ଆକାର ଅନୁମାନ ୧୯୭.୩୯ କୋଟି ଟଙ୍କା ଥିଲା। ଏହି  ବଜେଟ୍‌ରେ ସର୍ବାଧିକ ଅର୍ଥ ପ୍ରତିରକ୍ଷା କ୍ଷେତ୍ରକୁ ଆବଣ୍ଟିତ କରାଯାଇଥିଲା। ସ୍ଵାଧୀନ ଭାରତର ପ୍ରଥମ ବଜେଟ୍‌ରେ ୯୨.୭୪ କୋଟି ଟଙ୍କା ଅର୍ଥାତ ୪୬ ପ୍ରତିଶତ ପ୍ରତିରକ୍ଷା ଉପରେ ଖର୍ଚ୍ଚ କରାଯାଇଥିଲା। ସମୟକ୍ରମେ ବଜେଟ୍‌ର ଆକାର ବଢିବାରେ ଲାଗିଥିଲା। ଆଉ ସେହି ଅନୁସାରେ ପ୍ରତିରକ୍ଷା କ୍ଷେତ୍ରକୁ ଅଧିକ ଅନୁଦାନ ରାଶି ବଢିବାରେ ଲାଗିଥିଲା। ମୋଦୀ ସରକାର କ୍ଷମତାକୁ ଅସିବା ପୂର୍ବରୁ ଅର୍ଥାତ ୨୦୧୩-୧୪ରେ ପ୍ରତିରକ୍ଷା କ୍ଷେତ୍ରରେ ୨,୦୩,୬୭୨ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଥିଲା। ମୋଦୀ ସରକାରରେ ପ୍ରତିରକ୍ଷା ବଜେଟ୍‌ର ଆକାର ଦୁଇ ଗୁଣ ବଢି ସାରିଛି। 

 

  • Union Budget
  • News7 Is Now On WhatsApp Join And Get Latest News Updates Delivered To You Via WhatsApp

    Copyright © 2024 - Summa Real Media Private Limited. All Rights Reserved.