ନୂଆଦିଲ୍ଲୀ ୨୫।୦୫: ବଢିଲା ବୈଜ୍ଞାନିକଙ୍କ ଚିନ୍ତା । ମହାକାଶରେ ମିଳିଲା ବ୍ୟାକ୍ଟେରିଆର ସନ୍ଧାନ । ମହାକାଶଚାରୀଙ୍କ ପାଇଁ ସୃଷ୍ଟି କରିପାରେ ବିପଦ । ବାସ୍ତବରେ ଏହି ବ୍ୟାକ୍ଟେରିଆ ଚୀନର ଟିନାଗଙ୍ଗ ସ୍ପେସ୍ ଷ୍ଟେସନରେ ମିଳିଛି । ଏହାର ନାଁ ନୋଭୋହରବାସିଲୁମ୍ ଟିଆଙ୍ଗୋନଜେନ୍ସିସ୍ ବା N. ଟିଆଙ୍ଗୋନଜେନ୍ସିସ୍ । ଜାଣି ଆଶ୍ଚର୍ଯ୍ୟ ହେବେ ଏହି ବ୍ୟାକ୍ଟେରିଆ ପୃଥିବୀରେ ଦେଖିବାକୁ ମିଳିନଥାନ୍ତି । ଏମାନେ ଏତେ ସ୍ୱତନ୍ତ୍ର ଯେ ଏହା କଠିନ ପରିସ୍ଥିତିରେ ମଧ୍ୟ ବଞ୍ଚି ରହିପାରେ। ଏହି ବ୍ୟାକ୍ଟେରିଆ ଜିଲାଟିନକୁ ଭାଙ୍ଗି ସେଥିରୁ ନାଇଟ୍ରୋଜେନ୍ ଏବଂ କାର୍ବନ ନେଇଥାଏ।
ଏହି କାରଣରୁ ଏହା ନିଜ ଚାରିପାଖରେ ଏକ ଦୃଢ଼ ସୁରକ୍ଷା କବଚ ସୃଷ୍ଟି କରେ । ଏହା ବିକିରଣ ଏବଂ ଅକ୍ସିଡେଟିଭ ଚାପ ଭଳି ମହାକାଶର କଠୋର ପରିବେଶରେ ମଧ୍ୟ ବଞ୍ଚି ରହିଥାଏ । ତେବେ ଏହା ଏତେ ଶକ୍ତିଶାଳୀ କିପରି ହେଲା ତାହା ବୈଜ୍ଞାନିକମାନଙ୍କୁ କରିଛି ଆଶ୍ଚର୍ଯ୍ୟ । ସବୁଠାରୁ ବଡ ପ୍ରଶ୍ନ ଏହି ବ୍ୟାକ୍ଟେରିଆ ମହାକାଶ ଷ୍ଟେସନରେ କିପରି ପହଞ୍ଚିଲା ? ଏହା କ’ଣ ପୃଥିବୀରୁ ଏକ ବୀଜାଣୁ ଭାବରେ ଯାଇଥିଲା, ନା ଏହା ମହାକାଶରେ ଜନ୍ମ ହୋଇଛି ?
ବାସ୍ତବରେ ଏହା ୨୦୨୩ ମସିହାରେ ଶେନଝାଓ-୧୫ମିଶନ ସମୟରେ ନିଆଯାଇଥିବା ନମୁନାରୁ ମିଳିଥିଲା। ଯାହା ଏବେ ବି ଏକ ବଡ଼ ରହସ୍ୟ ହୋଇ ରହିଛି। ଏହି ବ୍ୟାକ୍ଟେରିଆର ପୃଥିବୀରେ ଏକ ସମ୍ପର୍କୀୟ ମଧ୍ୟ ଅଛି । ଯାହାକୁ ନିଆଲିଆ ସର୍କୁଲାନ୍ସ କୁହାଯାଏ। ଏହା ମାଟି, ନର୍ଦ୍ଦମା ଏବଂ ଖାଦ୍ୟରେ ମିଳିଥାଏ । ଏହି ବ୍ୟାକ୍ଟେରିଆ ଠାରୁ ସେପ୍ସିସ୍ ଭଳି ରୋଗ ବ୍ୟାପିପାରେ । କିନ୍ତୁ ମହାକାଶରେ ବ୍ୟାକ୍ଟେରିଆ କେବଳ ଜିଲାଟିନ୍ ଖାଇ ବଞ୍ଚି ରହନ୍ତି । ଏହି ପାର୍ଥକ୍ୟ ଏହାକୁ କରିଥାଏ ଅଧିକ ବିପଦପୂର୍ଣ୍ଣ ।
ଏହି ବ୍ୟାକ୍ଟେରିଆ ମହାକାଶ ଯାତ୍ରୀଙ୍କ ପାଇଁ ହୋଇପାରେ ବଡ ବିପଦ । ବୈଜ୍ଞାନିକମାନେ ଭୟ କରୁଛନ୍ତି ଯେ ଏହି ଜୀବାଣୁ ମହାକାଶଚାରୀଙ୍କ ସ୍ୱାସ୍ଥ୍ୟ ପାଇଁ ସମସ୍ୟା ସୃଷ୍ଟି କରିପାରେ । ପୃଥିବୀରେ ଏହାର ସମ୍ପର୍କୀୟ ଦୁର୍ବଳ ପ୍ରତିରକ୍ଷା ପ୍ରଣାଳୀ ଥିବା ଲୋକଙ୍କୁ ଅସୁସ୍ଥ କରିଥାଏ । ଏହା ଏପର୍ଯ୍ୟନ୍ତ ସ୍ପଷ୍ଟ ନୁହେଁ ଯେ N. ଟିଆଙ୍ଗୋନଜେନ୍ସିସ୍ ମଣିଷକୁ କ୍ଷତି ପହଞ୍ଚାଇବ କି ନାହିଁ। କିନ୍ତୁ ଏହାର ଶକ୍ତି ଚିନ୍ତା ବଢାଉଛି ।
ମହାକାଶରେ ବିକିରଣ, ଅମ୍ଳଜାନର ଅଭାବ ଏବଂ କଷ୍ଟକର ପରିସ୍ଥିତି ରହିଥାଏ। ତଥାପି, ଏହି ବ୍ୟାକ୍ଟେରିଆ ସେଠାରେ ବଢ଼ୁଛି । କାରଣ ଏହା ବୀଜାଣୁ ଗଠନ କରି ନିଜକୁ ସୁରକ୍ଷା ଦିଏ। ଏହି ବୀଜାଣୁଗୁଡ଼ିକ ଏତେ ଶକ୍ତିଶାଳୀ ଯେ ସେମାନେ କଷ୍ଟକର ପରିସ୍ଥିତିରେ ମଧ୍ୟ ବଞ୍ଚି ରହିପାରନ୍ତି । ବୈଜ୍ଞାନିକମାନେ ଏହାର ଶକ୍ତିକୁ ବୁଝିବାକୁ ଚେଷ୍ଟା କରୁଛନ୍ତି। ଟିଆଙ୍ଗୋଙ୍ଗ ସ୍ପେସ୍ ଷ୍ଟେସନରେ ବାୟୁ ଏବଂ ପୃଷ୍ଠକୁ ସଫା କରିବା ପାଇଁ ସ୍ୱତନ୍ତ୍ର ବ୍ୟବସ୍ଥା ଅଛି। ମହାକାଶଚାରୀମାନେ ନିୟମିତ ଭାବରେ ପୃଷ୍ଠ ସଫା କରନ୍ତି ଏବଂ ବ୍ୟାକ୍ଟେରିଆ ନିରୀକ୍ଷଣ କରନ୍ତି ।
କିନ୍ତୁ ବ୍ୟାକ୍ଟେରିଆକୁ ସମ୍ପୂର୍ଣ୍ଣ ଭାବରେ ବନ୍ଦ କରିବା କଷ୍ଟକର । ଏହି ସନ୍ଧାନ ଦର୍ଶାଉଛି କି ମହାକାଶରେ ମଧ୍ୟ ରୋଗ ବ୍ୟାପିପାରେ। ତେବେ ଏହା ପ୍ରଥମ ଥର ନୁହେଁ ଯେ ମହାକାଶରେ ନୂଆ ବ୍ୟାକ୍ଟେରିଆ ମିଳିଛି । ୨୦୧୮ରେ ନାସା ଆନ୍ତର୍ଜାତୀୟ ମହାକାଶକେନ୍ଦ୍ରର ଶୌଚାଳୟରେ ୪ଟି ନୂଆ ବ୍ୟାକ୍ଟେରିଆର ସନ୍ଧାନ ଲଗାଇଥିଲେ । ଏହି ବ୍ୟାକ୍ଟେରିଆଗୁଡ଼ିକ ମଧ୍ୟ ମହାକାଶ ସହିତ ଖାପ ଖୁଆଇ ନେଇଥିଲେ । ନାସାର କ୍ଲିନ୍ ରୁମରେ ୨୬ଟି ଅଜଣା ବ୍ୟାକ୍ଟେରିଆ ମଧ୍ୟ ମିଳିଛି ।
ବର୍ତ୍ତମାନ ବୈଜ୍ଞାନିକମାନେ ଚିନ୍ତାରେ ପଡିଛନ୍ତି କି ଏହି ବ୍ୟାକ୍ଟେରିଆ ଯଦି ପୃଥିବୀକୁ ଆସିଯାଏ ତେବେ କଣ ହେବ ? ଏହାର ସମ୍ପର୍କୀୟମାନେ ସେପ୍ସିସ୍ ଭଳି ରୋଗ ପୂର୍ବରୁ ବ୍ୟାପି ସାରିଛନ୍ତି । ଯଦି ସ୍ପେସ୍ ବ୍ୟାକ୍ଟେରିଆ ଅଧିକ ଶକ୍ତିଶାଳୀ ହୋଇଯାଆନ୍ତି, ତେବେ ଏହା ଏକ ବଡ଼ ସମସ୍ୟା ହୋଇପାରେ । ବୈଜ୍ଞାନିକମାନେ ଏହା ଉପରେ ଆହୁରି ଗବେଷଣା କରୁଛନ୍ତି ।
ଟିନାଗଙ୍ଗ ଏବଂ ଅନ୍ୟାନ୍ୟ ମହାକାଶ ସଂସ୍ଥା ଚନ୍ଦ୍ର ଏବଂ ମଙ୍ଗଳ ଗ୍ରହରେ ଘାଟି ନିର୍ମାଣ କରିବାକୁ ପ୍ରସ୍ତୁତି କରୁଛନ୍ତି । ଏପରିସ୍ଥିତିରେ ବ୍ୟାକ୍ଟେରିଆର ଏକ ନୂଆ ଚ୍ୟାଲେଞ୍ଜ ଆଣିଛି । ବୈଜ୍ଞାନିକମାନଙ୍କୁ ବୁଝିବାକୁ ପଡିବ ଯେ ମହାକାଶରେ ଏହି ବ୍ୟକ୍ଟେରିଆ କିପରି ବୃଦ୍ଧି ପାଏ। ଏଥିପାଇଁ ମହାକାଶଚାରୀ ଏବଂ ପୃଥିବୀକୁ ସୁରକ୍ଷା ଦେବା ପାଇଁ ନୂଆ ଉପାୟ ଖୋଜିବାକୁ ପଡିବ।
