‘ହିନ୍ଦୁ ବୋଲି ପ୍ରମାଣ ଦିଅ’: ସିଏମ ଯୋଗୀଙ୍କୁ ଆହ୍ବାନ କଲେ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ

ଲକ୍ଷ୍ନୌ: ପ୍ରୟାଗରାଜ ମାଘ ମେଳା ଛାଡିବା ପରେ ଶଙ୍କରାଚାର୍ଯ୍ୟ ଅଭିମୁକ୍ତେଶ୍ୱରାନନ୍ଦ ସରକାରଙ୍କୁ ଟାର୍ଗେଟ କରିଛନ୍ତି । ସେ ଶୁକ୍ରବାର ବାରାଣସୀରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, ‘ମୋତେ ଶଙ୍କରାଚାର୍ଯ୍ୟ ହେବାର ପ୍ରମାଣ ମଗାଯାଇଥିଲା । ମୁଁ ତାହା ପ୍ରଦାନ କରିଥିଲି। ମୋର ପ୍ରମାଣ ପ୍ରକୃତ ଥିଲା, ତେଣୁ ସେମାନଙ୍କୁ ଏହାକୁ ଗ୍ରହଣ କରିବାକୁ ପଡିଲା। ପ୍ରମାଣ ଦାବି କରିବାର ସମୟ ଶେଷ ହୋଇଯାଇଛି । ଏବେ ମୁଖ୍ୟମନ୍ତ୍ରୀ ହିନ୍ଦୁ ବୋଲି ପ୍ରମାଣ ଦେବା ଉଚିତ।’

ସେ କହିଛନ୍ତି, ‘ଆମେ ଆପଣଙ୍କୁ ୪୦ ଦିନ ସମୟ ଦେଉଛୁ। ଏହି ସମୟ ମଧ୍ୟରେ, ଆପଣ ଜଣେ ଗୋ ଭକ୍ତ ବୋଲି ପ୍ରମାଣ ଦିଅନ୍ତୁ। ଯଦି ପ୍ରମାଶ ଦେଇପାରିବେ ନାହିଁ, ତେବେ ଆପଣ ଜଣେ ନକଲି ହିନ୍ଦୁ, କପଟୀ, ଠକ ବୋଲି ବିବେଚିତ ହେବେ। କେବଳ ପ୍ରଦର୍ଶନ ପାଇଁ ଗେରୁଆ ପୋଷାକ ପିନ୍ଧିଛନ୍ତି।’

ସେ ଅଭିଯୋଗ କରିଛନ୍ତି, ମୁଖ୍ୟମନ୍ତ୍ରୀ ଯୋଗୀ ଏବଂ ଜଗଦଗୁରୁ ରାମଭଦ୍ରାଚାର୍ଯ୍ୟ ଗୋହତ୍ୟା ଉପରେ ନିଷେଧ ଦାବି କରୁଥିବା ଲୋକଙ୍କୁ ଆକ୍ରମଣ କରୁଛନ୍ତି। ଯଦି ଆପଣ ପ୍ରକୃତରେ ହିନ୍ଦୁ, ତେବେ ଗୋ-ମାତାଙ୍କୁ ରାଜ୍ୟ ମାତା ଘୋଷଣା କରନ୍ତୁ। ଉତ୍ତର ପ୍ରଦେଶରୁ ଗୋମାଂସ ରପ୍ତାନି ବନ୍ଦ କରନ୍ତୁ, ନଚେତ୍ ଆପଣଙ୍କୁ ଅଣହିନ୍ଦୁ ଘୋଷଣା କରାଯିବ।

ଶଙ୍କରାଚାର୍ଯ୍ୟଙ୍କ ଦ୍ୱାରା କୁହାଯାଇଥିବା ଗୁରୁତ୍ୱପୂର୍ଣ୍ଣ କଥା:

୧- ପ୍ରକୃତ ହିନ୍ଦୁ କିଏ ତାହା ନିର୍ଣ୍ଣୟ କରିବା ପାଇଁ ଲକ୍ଷ୍ନୌରେ ସନ୍ଥମାନେ ଏକାଠି ହେବେ -

ଶଙ୍କରାଚାର୍ଯ୍ୟ କହିଛନ୍ତି, ‘ସମସ୍ତ ସନ୍ଥ, ମହନ୍ତ ଏବଂ ଆଚାର୍ଯ୍ୟମାନେ ମାର୍ଚ୍ଚ ୧୦-୧୧ ତାରିଖରେ ଲକ୍ଷ୍ନୌରେ ଏକତ୍ରିତ ହେବା ଉଚିତ। ସେଠାରେ ନିଷ୍ପତ୍ତି ନିଆଯିବ ଯେ, କିଏ ହିନ୍ଦୁ, କିଏ ହିନ୍ଦୁ ହୃଦୟର ସମ୍ରାଟ, ଏବଂ କାହାକୁ ନକଲି ହିନ୍ଦୁ ଘୋଷଣା କରାଯିବ।’

୨- ଏବେ ଆମେ ନକଲି ହିନ୍ଦୁମାନଙ୍କ ପର୍ଦ୍ଦାଫାସ କରିବୁ

ଅଭିମୁକ୍ତେଶ୍ୱରାନନ୍ଦ କହିଛନ୍ତି, ‘ଏବେ ନକଲି ହିନ୍ଦୁମାନଙ୍କ ପର୍ଦାଫାସ କରିବାକୁ ପଡିବ। ସମସ୍ତ ହିନ୍ଦୁ ଏକ ବଡ଼ ପ୍ରତାରଣାର ଶିକାର ହେଉଛନ୍ତି। ଏହି ପ୍ରତାରଣା ଜଣେ ବ୍ୟକ୍ତି ଦ୍ୱାରା କରାଯାଉଛି ଯିଏ ନିଜକୁ ଜଣେ ସାଧୁ, ଯୋଗୀ, ସନ୍ଥ ଏବଂ ଗେରୁଆ ପୋଷାକ ପିନ୍ଧିଥିବା ବ୍ୟକ୍ତି ବୋଲି କହୁଛନ୍ତି।’

୩- ମେଳା ଛାଡିବା ସମୟରେ ପ୍ରଶାସନ ଲାଞ୍ଚ ଯାଚୁଥିଲା

ମାଘ ମେଳା ଛାଡିବା ପରେ ଶଙ୍କରାଚାର୍ଯ୍ୟ କହିଛନ୍ତି, ‘କ୍ଷମା ମାଗିବାର ଏକ ଉପାୟ ଅଛି । ତୁମକୁ କ୍ଷମା ଭିକ୍ଷା କରିବାକୁ ପଡିବ। ପ୍ରଶାସନ ଆମକୁ ପ୍ରଲୋଭିତ କରୁଥିଲା, କହୁଥିଲା, ଯଦି ଆପଣ ଏପରି ସ୍ନାନ କରିବ, ତେବେ ଆମେ ଆପଣଙ୍କ ଉପରେ ଫୁଲ ବର୍ଷା କରିବୁ। ସେମାନେ ଆଗାମୀ ବର୍ଷ ପାଇଁ ଚାରି ଶଙ୍କରାଚାର୍ଯ୍ୟଙ୍କ ପାଇଁ ଏକ ପ୍ରୋଟୋକଲ ପ୍ରସ୍ତୁତ କରିବେ । କିନ୍ତୁ ମୁଁ ମନା କରିଦେଲି । ମୁଁ କହିଲି, ତୁମେମାନେ ଯେଉଁ ସନ୍ୟାସୀଙ୍କୁ ବାଡ଼ିରେ ପିଟିଛ, ସେମାନଙ୍କୁ କ୍ଷମା ମାଗ। ଯଦି ସେମାନେ କ୍ଷମା କରନ୍ତି, ତେବେ ଠିକ୍ ଅଛି। କିନ୍ତୁ ପ୍ରଶାସନ ଏଥିପାଇଁ ଆଗକୁ ଆସିଲା ନାହିଁ।’

୪- ଇତିହାସରେ ପ୍ରଥମ ଥର ପାଇଁ ଶଙ୍କରାଚାର୍ଯ୍ୟଙ୍କଠାରୁ ପ୍ରମାଣ ମାଗାଯାଇଛି

ଅଭିମୁକ୍ତେଶ୍ୱରାନନ୍ଦ କହିଛନ୍ତି, ‘ଆଗାମୀ ବର୍ଷ, ମାଘ ମେଳା ସମୟରେ ଆମେ ମୌନୀ ଅମାବାସ୍ୟାରେ ସଙ୍ଗମରେ ସ୍ନାନ କରିବୁ। ଇତିହାସରେ ପ୍ରଥମ ଥର ପାଇଁ, ଜଣେ ଶାସକ ଶଙ୍କରାଚାର୍ଯ୍ୟଙ୍କଠାରୁ ପ୍ରମାଣ ମାଗିଛନ୍ତି। ଆପଣଙ୍କ ଅଞ୍ଚଳର ଗୋମାଂସ ସାରା ବିଶ୍ୱରେ ବିକ୍ରି ହେଉଛି। ଆମକୁ ଦେଖାଅ ଯେ, ଏହାକୁ ୪୦ ଦିନ ମଧ୍ୟରେ ବନ୍ଦ କରିପାରିବ । ତା'ପରେ ଆମେ ବିଶ୍ୱାସ କରିବୁ ତୁମେ ହିନ୍ଦୁ। ଯଦି ଏଭଳି ନକରିପାର, ତେବେ ଆମେ ଲକ୍ଷ୍ନୌ ଆସିବୁ। ସନ୍ଥ ଏବଂ ମହନ୍ତମାନଙ୍କ ସହିତ ଆପଣଙ୍କୁ ନିନ୍ଦା କରିବୁ।’