‘ହତ୍ୟାକାରୀ ଫାସିବାଦୀ ୟୁନୁସ…’, ବାଂଲାଦେଶ ଛାଡ଼ିବା ପରେ ପୂର୍ବତନ ପିଏମ୍ ଶେଖ ହସିନାଙ୍କ ସାର୍ବଜାନୀନ ଭାଷଣ

ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ୨୦୨୪ରେ ବାଂଲାଦେଶ ଛାଡ଼ିବା ପରେ ପ୍ରଥମ ଥର ଭାରତରେ କୌଣସି ସାର୍ବଜାନୀନ କାର୍ଯ୍ୟକ୍ରମକୁ ସମ୍ୱୋଧନ କରିଛନ୍ତି । ହସିନା ଏହି ଭାଷଣରେ ବାଂଲାଦେଶର ଅନ୍ତରୀଣ ସରକାରର ମୁଖିଆ ମହମ୍ମଦ ୟୁନୁସଙ୍କ ଉପରେ ଜୋରଦାର ବର୍ଷିଛନ୍ତି । ସେ ୟୁନୁସଙ୍କୁ ହତ୍ୟାକାରୀ ଫାସିବାଦୀ, "ସୁଧକାରୀ", "ମନି ଲଣ୍ଡରର" ଏବଂ "କ୍ଷମତା -ଲୋଭି ବିଶ୍ୱାସଘାତକ" ବୋଲି କହିଥିଲେ । ଶେଖ ହସିନା କହିଛନ୍ତି ଯେ ୟୁନୁସ୍ ବାଂଲାଦେଶକୁ ଆତଙ୍କ, ଅରାଜକତା ଏବଂ ଗଣତନ୍ତ୍ରର ପତନର ପର୍ଯ୍ୟାୟକୁ ଠେଲି ଦେଇଛନ୍ତି।

ଦିଲ୍ଲୀର ବିଦେଶୀ ପ୍ରତିନିଧି କ୍ଲବରେ ଶେଖ୍ ହସିନା ଏକ ଅଡିଓ ବାର୍ତ୍ତା ମାଧ୍ୟମରେ ଜନସାଧାରଣଙ୍କୁ ସମ୍ବୋଧିତ କରିଥିଲେ । "ବାଂଲାଦେଶରେ ଗଣତନ୍ତ୍ର ବଞ୍ଚାଅ" ଶୀର୍ଷକ ଏହି କାର୍ଯ୍ୟକ୍ରମରେ ଶେଖ୍ ହସିନାଙ୍କ ଆୱାମୀ ଲିଗ୍ ସରକାରର ଅନେକ ପୂର୍ବତନ ମନ୍ତ୍ରୀ ଏବଂ ବାଂଲାଦେଶୀ ପ୍ରବାସୀ ସମ୍ପ୍ରଦାୟର ସଦସ୍ୟମାନେ ଯୋଗ ଦେଇଥିଲେ ।

ଅଡିଓ ବାର୍ତ୍ତାରେ ହସିନା କହିଛନ୍ତି ଯେ ବାଂଲାଦେଶ ପୂର୍ବରୁ ଏକ ଶାନ୍ତିପୂର୍ଣ୍ଣ ଏବଂ ସମୃଦ୍ଧ ରାଷ୍ଟ୍ର ଥିଲା । କିନ୍ତୁ ଏବେ ହିଂସା, ଭୟ ଏବଂ ଧ୍ୱଂସର ସମ୍ମୁଖୀନ ହେଉଛି । ଅଗଷ୍ଟ ୨୦୨୪ରେ ବାଂଲାଦେଶରେ ହିଂସାତ୍ମକ ପ୍ରତିବାଦ ପରେ, ଆୱାମୀ ଲିଗ୍ ସରକାରକୁ କ୍ଷମତାଚ୍ୟୁତ କରାଯାଇଥିଲା । ସେବେଠାରୁ ସେ ଭାରତରେ ରହୁଛନ୍ତି । ଶେଖ ହସିନା ବାଂଲାଦେଶରେ ଚାଲିଥିବା ରାଜନୈତିକ ସଙ୍କଟକୁ ଦେଶର ସାର୍ବଭୌମତ୍ୱ ଏବଂ ସମ୍ବିଧାନ ପାଇଁ ଏକ ଅସ୍ତିତ୍ୱ ସଂଘର୍ଷ ଭାବରେ ବର୍ଣ୍ଣନା କରିଛନ୍ତି । ସେ ତାଙ୍କ ସମର୍ଥକମାନଙ୍କୁ ବିଦେଶୀ ଶକ୍ତି ନିର୍ଦ୍ଦେଶରେ ପରିଚାଳିତ ସରକାରକୁ ଉପାଡ଼ି ଦେବା ପାଇଁ ଆହ୍ୱାନ କରିଛନ୍ତି ।

ଉଗ୍ରବାଦୀ ଶକ୍ତି ଦେଶକୁ ଧ୍ୱଂସ କରିଦେଇଛି

ଶେଖ୍ ହସିନା ତାଙ୍କ ବାପା ଶେଖ୍ ମୁଜିବୁର ରହମାନଙ୍କ କଥା କହି ନିଜ ଭାଷଣ ଆରମ୍ଭ କରିଥିଲେ । ସେ କହିଥିଲେ ଯେ ବାଂଲାଦେଶ ଆଜି ଏକ ଅତଳ ଗର୍ତ୍ତର କୂଳରେ ଠିଆ ହୋଇଛି । ସେ କହିଥିଲେ ଯେ ବାଂଲାଦେଶ ଏକ ଜେଲ୍, ମୃତ୍ୟୁର ଉପତ୍ୟକାରେ ପରିଣତ ହୋଇଛି ।

ଶେଖ୍ ହସିନା କହିଛନ୍ତି, ଉଗ୍ରବାଦୀ ଶକ୍ତିମାନେ ଦେଶକୁ ଧ୍ୱଂସ କରିବାରେ ଲାଗିଛନ୍ତି । ଆୱାମୀ ଲିଗ୍ ମୁଖ୍ୟ ଶେଖ୍ ହସିନା କହିଛନ୍ତି ଯେ ବାଂଲାଦେଶରେ ଜୀବନ ଏବଂ ସମ୍ପତ୍ତିର କୌଣସି ସୁରକ୍ଷା ନାହିଁ ଏବଂ ଆଇନ ଶୃଙ୍ଖଳା ସମ୍ପୂର୍ଣ୍ଣ ଭାବରେ ଭୁଶୁଡ଼ି ପଡ଼ିଛି । ଅଗଷ୍ଟ ୨୦୨୪ରେ ଏକ ଷଡ଼ଯନ୍ତ୍ର ପରେ ଦେଶ ଆତଙ୍କର ଛାୟାରେ ବୁଡ଼ିଯାଇଛି, ଗଣତନ୍ତ୍ର କ୍ଷୁର୍ଣ୍ଣ ହେଉଛି, ସ୍ୱାଧୀନତା ଛଡ଼ାଇ ନିଆଯାଇଛି ଏବଂ ହିଂସା, ନିର୍ଯାତନା ଏବଂ ଯୌନ ନିର୍ଯାତନା ଘଟଣା ଘଟୁଛି ।