ନୂଆଦିଲ୍ଲୀ ୧୦/୦୪: ୧୨୮ ବର୍ଷ ପରେ ଅଲିମ୍ପିକ୍ସରେ କମ୍ବ୍ୟାକ କରିବ କ୍ରିକେଟ । ଐତିହାସିକ ପ୍ରତ୍ୟାବର୍ତ୍ତନ କରିବାକୁ ଯାଉଛି ଏହି ଜେଣ୍ଟେଲମ୍ୟାନ୍ ଖେଳ । ୨୦୨୮ ଲସ୍ ଆଞ୍ଜେଲସ୍ ଅଲିମ୍ପିକ୍ ଗେମ୍ସରେ କ୍ରିକେଟ୍ ଖେଳକୁ ସାମିଲ କରାଯିବ। ୧୯୦୦ ପ୍ୟାରିସ୍ ଅଲିମ୍ପିକ୍ସ ପରେ ଏହା ପ୍ରଥମ ଥର ହେବ ଯେ କ୍ରିକେଟକୁ ଅଲିମ୍ପିକ୍ସରେ ସାମିଲ କରାଯିବ । ତା’ପରେ ଏଠାରେ କେବଳ ଗୋଟିଏ ମ୍ୟାଚ୍ ଖେଳାଯାଇଥିଲା ।
ଅନ୍ତର୍ଜାତୀୟ ଅଲିମ୍ପିକ୍ କମିଟି (IOC) ନିଶ୍ଚିତ କରିଛି ଯେ ୧୨୮ ବର୍ଷ ପରେ ପ୍ରଥମ ଥର ପାଇଁ କ୍ରିକେଟ୍ ଅଲିମ୍ପିକ୍ ଗେମ୍ସକୁ ଫେରିବ, ଯେଉଁଥିରେ ଉଭୟ ପୁରୁଷ ଏବଂ ମହିଳା ବର୍ଗରେ ଛଅଟି ଦଳ ଅଂଶଗ୍ରହଣ କରିବେ । ଏହି ଇଭେଣ୍ଟରେ ମୋଟ ୯୦ ଜଣ ଖେଳାଳି ଅଂଶଗ୍ରହଣ କରିବେ।
ଲସ୍ ଆଞ୍ଜେଲସ୍ ଅଲିମ୍ପିକ୍ସରେ ସାମିଲ ହେବାକୁ ଥିବା ପାଞ୍ଚଟି ନୂତନ ଖେଳ ମଧ୍ୟରୁ କ୍ରିକେଟ୍ ଗୋଟିଏ । ଏଥିରେ ସ୍କ୍ୱାସ୍, ଫ୍ଲାଗ୍ ଫୁଟବଲ୍, ବେସବଲ୍/ସଫ୍ଟବଲ୍ ଏବଂ ଲାକ୍ରୋସ୍ ମଧ୍ୟ ଅନ୍ତର୍ଭୁକ୍ତ। ଅଲିମ୍ପିକ୍ସରେ କ୍ରିକେଟ୍ ପାଇଁ ଯୋଗ୍ୟତା ମାନଦଣ୍ଡ ଏପର୍ଯ୍ୟନ୍ତ ଚୂଡ଼ାନ୍ତ ହୋଇନାହିଁ ।
ଟେଷ୍ଟ ଏବଂ ODI ଫର୍ମାଟ ପରି ନୁହେଁ, T20 ଆନ୍ତର୍ଜାତୀୟ କ୍ରିକେଟ ପ୍ରାୟ ୧୦୦ଟି ଦେଶ ଦ୍ୱାରା ଖେଳାଯାଏ । ଯାହା ଯୋଗ୍ୟତା ପ୍ରକ୍ରିୟାକୁ ବହୁତ ଚ୍ୟାଲେଞ୍ଜିଂ କରିଥାଏ । ବିଶେଷ କଥା ହେଉଛି ଆୟୋଜକ ଭାବେ, ଆମେରିକା ଟୁର୍ଣ୍ଣାମେଣ୍ଟରେ ସିଧାସଳଖ ଏଣ୍ଟ୍ରି କରିବ
ଲସ୍ ଆଞ୍ଜେଲସ୍ ଅଲିମ୍ପିକ୍ସର ଇଭେଣ୍ଟ କାର୍ଯ୍ୟକ୍ରମକୁ IOC କାର୍ଯ୍ୟନିର୍ବାହୀ ବୋର୍ଡ ଦ୍ୱାରା ଅନୁମୋଦନ କରାଯାଇଛି । ୨୦୨୮ ଅଲିମ୍ପିକ୍ସରେ ମୋଟ ୩୫୧ ପଦକ ଇଭେଣ୍ଟ ହେବ । ଯାହା ପ୍ୟାରିସ୍ ଅଲିମ୍ପିକ୍ସ ଅପେକ୍ଷା ୨୨ ଅଧିକ। ଆଇଓସି ଘୋଷଣା କରିଛି ଯେ କୋର୍ ଆଥଲେଟ୍ କୋଟା ୧୦,୫୦୦ ରହିବ, ଏବଂ ପାଞ୍ଚଟି ନୂତନ କ୍ରୀଡ଼ା ପାଇଁ ୬୯୮ ଅତିରିକ୍ତ ଆଥଲେଟ୍ ଆବଣ୍ଟିତ ହେବେ।
