‘ଆତଙ୍କ’ର ଫ୍ୟାକ୍ଟ୍ରି ଅଲ୍ ଫଲାହର ମାଲିକ ଗିରଫ, ମନି ଲଣ୍ଡରିଂ ମାମଲାରେ ଜାଭେଦ ଅହମ୍ମଦ ସିଦ୍ଦିକୀକୁ ବାନ୍ଧିଲା ଇଡି

ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ ମଙ୍ଗଳବାର ମନି ଲଣ୍ଡରିଂ ମାମଲାରେ ଅଲ୍ ଫଲାହ ଗ୍ରୁପର ଅଧ୍ୟକ୍ଷ ଜାଭେଦ ଅହମ୍ମଦ ସିଦ୍ଦିକୀକୁ ଗିରଫ କରିଛି । ଅଲ୍ ଫଲାହ ସହିତ ଜଡିତ ବିଭିନ୍ନ ଠିକଣାରେ ଚଢଉ ଓ  ବିସ୍ତୃତ ତଦନ୍ତ ସମୟରେ ଉଦ୍ଧାର ହୋଇଥିବା ପ୍ରମାଣ ଆଧାରରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ଏହା ପୂର୍ବରୁ ଆଜି ସକାଳେ ହିଁ ତାଙ୍କ ଘର ଚଢଉ ହୋଇଥିଲା । ମନି ଲଣ୍ଡରିଂର ଏହି ଟଙ୍କା ଆତଙ୍କୀ ଗତିବିଧି ଓ ଲାଲକିଲ୍ଲାରେ ବିସ୍ଫୋରଣ କରିଥିବା ଆତଙ୍କବାଦୀଙ୍କ ପାଇଁ ବ୍ୟବହାର କରାଯାଇଥିବା ସନ୍ଦେହ କରୁଛି ।

ଆର୍ଥିକ ଅପରାଧରେ ଜୱାଦ ଅହମ୍ମଦ ସିଦ୍ଦିକୀର ଗିରଫଦାରୀ ଯଥେଷ୍ଟ ପ୍ରମାଣ ମିଳିବା ପରେ ହୋଇଛି । ତଦନ୍ତରେ କୋଟି କୋଟି ଟଙ୍କାର ଅପରାଧିକ ଆୟ ପର୍ଦ୍ଦାଫାସ ହୋଇଛି । ଟଙ୍କାକୁ ଟ୍ରଷ୍ଟଗୁଡ଼ିକ ପରିବାର ମାଲିକାନା ସଂସ୍ଥାଗୁଡ଼ିକୁ ପଠାଇଥିଲେ । ଇଡି ୪.୮ ନିୟୁତ ଟଙ୍କାରୁ ଅଧିକ ନଗଦ ଏବଂ ଡିଜିଟାଲ୍ ପ୍ରମାଣ ଜବତ କରିଛି ।

ଦିଲ୍ଲୀ ପୋଲିସ କ୍ରାଇମବ୍ରାଞ୍ଚର ଦୁଇଟି ଏଫଆଇଆର ଆଧାରରେ ଇଡି ଅଲ୍ ଫଲାହ ଗ୍ରୁପ୍ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିଛି । ଏଫ୍‌ଆଇଆର୍‌ରେ ଅଭିଯୋଗ କରାଯାଇଛି ଯେ ଫରିଦାବାଦ ସ୍ଥିତ ଅଲ୍ ଫଲାହ ବିଶ୍ୱବିଦ୍ୟାଳୟ NAAC ଦ୍ୱାରା ସ୍ୱୀକୃତିପ୍ରାପ୍ତ ହେବାର ମିଥ୍ୟା ଦାବି କରିଥିଲା, ଯାହା ଦ୍ୱାରା ଛାତ୍ର, ଅଭିଭାବକ ଓ ଅନ୍ୟାନ୍ୟ ଅଂଶୀଦାରମାନଙ୍କୁ ଭ୍ରମିତ କରିଥିଲା ଏବଂ ଏହା ଦ୍ୱାରା ଅଯଥା ଲାଭ କରିଥିଲା ।

ଏଫଆଇଆରରେ ଏହା ମଧ୍ୟ କୁହାଯାଇଛି ଯେ ବିଶ୍ୱବିଦ୍ୟାଳୟ ୟୁଜିସି ଆଇନ ୧୯୫୬ର ଧାରା ୧୨(b) ଅନୁଯାୟୀ ସ୍ୱୀକୃତିପ୍ରାପ୍ତ ବୋଲି ମିଛ ଦାବି କରିଥିଲା । ୟୁଜିସି ସ୍ପଷ୍ଟ କରିଛି ଯେ ଅଲ୍ ଫଲାହ ବିଶ୍ୱବିଦ୍ୟାଳୟ କେବଳ ଧାରା ୨(f) ଅନୁଯାୟୀ ଏକ ରାଜ୍ୟ ଘରୋଇ ବିଶ୍ୱବିଦ୍ୟାଳୟ ଭାବରେ ସ୍ୱୀକୃତିପ୍ରାପ୍ତ । ବିଶ୍ୱବିଦ୍ୟାଳୟ କେବେବି ଧାରା ୧୨(b) ପାଇଁ ଆବେଦନ କରି ନାହିଁ କିମ୍ବା ଏହି ବ୍ୟବସ୍ଥା ଅନୁଯାୟୀ ଅନୁଦାନ ପାଇବାକୁ ଯୋଗ୍ୟ ନୁହେଁ ।

ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ ଏହି ମିଛ ଦାବିଗୁଡ଼ିକ କେବଳ ଛାତ୍ର ଏବଂ ଅଭିଭାବକଙ୍କୁ ବିଭ୍ରାନ୍ତ କରିନାହିଁ, ବରଂ ଆର୍ଥିକ ଅନିୟମିତତା ଏବଂ କଥିତ ଟଙ୍କା ହେରଫେରର ସମ୍ଭାବନା ମଧ୍ୟ ବୃଦ୍ଧି କରିଛି । ଇଡି ଏବେ ବିଶ୍ୱବିଦ୍ୟାଳୟ ଏବଂ ଏହାର ସହଯୋଗୀ ପ୍ରତିଷ୍ଠାନଗୁଡ଼ିକର ଆର୍ଥିକ କାର୍ଯ୍ୟକଳାପର ପୁଙ୍ଖାନୁପୁଙ୍ଖ ତଦନ୍ତ କରୁଛି ।