ନୂଆଦିଲ୍ଲୀ ୭।୬: କଂଗ୍ରେସ କହିଛି ଯେ ଆସାମରେ ନିର୍ବଚନମଣ୍ଡଳି ପୁନଃ ସୀମା ନିର୍ଦ୍ଧାରଣ ସତ୍ତ୍ୱେ ଆମର ୩ ସାଂସଦ କାୟମ ରଖିଛୁ। ଅନ୍ୟପଟେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ନିଷ୍କାସନ ପାଇଁ ଏବେ ଅବଗଣନା ଆରମ୍ଭ ହୋଇଯାଇଛି। କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି ଯେ ରାଜ୍ୟରେ କଂଗ୍ରେସକୁ ଦବାଇବା ପାଇଁ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ତାଙ୍କର ସର୍ବୋତମ ଉଦ୍ୟମ କରିଥିଲେ। ଏହା ସତ୍ତ୍ୱେ ରାଜ୍ୟରେ କଂଗ୍ରେସକୁ ୩୭.୪୮ ପ୍ରତିଶତ ଭୋଟ ମିଳିଛି, ଯାହା ଏହାର ପିଛିଲା ଭୋଟ ସେୟାରର ପାଖାପାଖି ଦୁଇ ଗୁଣା ଓ ବିଜେପିର ୩୭.୪୩ ପ୍ରତିଶତକୁ ପାର କରିଯାଇଛି।
ରମେଶ କହିଛନ୍ତି ଯେ ଆସାମରେ ନିର୍ବାଚନମଣ୍ଡଳୀ ପୁନଃ ସୀମା ନିର୍ଦ୍ଧାରଣ ସତ୍ତ୍ୱେ କଂଗ୍ରେସ୍ ନିଜର ୩ ଏମପି ଆସନ କାୟମ ରଖିପାରିଛି। କଂଗ୍ରେସ ନେତା ପ୍ରଦ୍ୟୁତ ବୋରଦୋଲଇଙ୍କ ୨ଲକ୍ଷ ଭୋଟ ବୃଦ୍ଧି ହୋଇଥିବା ବେଳେ ଗୌରବ ଗୋଗଇଙ୍କୁ ହରାଇବା ପାଇଁ ଆସାମ ମୁଖ୍ୟମନ୍ତ୍ରୀଙ୍କ ଦ୍ୱାରା ୨୫ସାର୍ବଜନିକ ସଭା କରାଯିବା ସତ୍ତ୍ୱେ ସେ ୧ ଲକ୍ଷ ଭୋଟ ଅନ୍ତରରେ ବିଜୟୀ ହୋଇଛନ୍ତି। ସେ କହିଛନ୍ତି ଯେ ବଦରୁଦ୍ଦିନ ଅଜମଲଙ୍କୁ ଜିତାଇବା ପାଇଁ ବିଜେପିର ପ୍ରୟାସ ସତ୍ତ୍ୱେ ରକିବୁଲ ହୁସୈନ ଐତିହାସିକ ଅନ୍ତରରେ ଧୁବରୀ ଲୋକସଭା ଆସନରୁ ବିଜୟୀ ହୋଇଛନ୍ତି।
ଏଆଇୟୁଡିଏଫ ସୁପ୍ରିମୋ ଓ ତିନିଥରର ସାଂସଦ ବଦରୁଦ୍ଦିନ ଅଜମଲଙ୍କୁ କଂଗ୍ରେସ ବିଧାୟକ ରକିବୁଲ ହୁସୈନ ୧୦,୧୨,୪୭୬ ଭୋଟର ରେକର୍ଡ ଅନ୍ତରରେ ହରାଇଛନ୍ତି। ରମେଶ କହିଛନ୍ତି ଯେ ମୁଖ୍ୟମନ୍ତ୍ରୀ ଜୀ ଏବେ ଯିବାର ସମୟ ଆସିଗଲା। ହିମନ୍ତ ବିଶ୍ୱଶର୍ମାଙ୍କ ପ୍ରସ୍ଥାନର ଅବଗଣନା ଆରମ୍ଭ ହୋଇଯାଇଛି। ଆସାମରେ କଂଗ୍ରେସ ୧୪ରୁ ୩ ଆସନ ଜିତିଛି। ବାକି ଆସନରୁ ବିଜେପିକୁ ୯ଟି ମିଳିଥିବା ବେଳେ ଆଞ୍ଚଳିକ ଦଳଙ୍କୁ ୨ଟି ଆସନ ମିଳିଛି।
