ରାସ୍ତାରେ ଚାଲୁଥିବା ପଥଚାରୀ ଏବେ ଓଭରବ୍ରିଜ୍‌ରେ ଚାଲିବେ, ଜନଗହଳି ଅଞ୍ଚଳରେ ନିର୍ମାଣ ହେବ ସ୍କାଏଓ୍ବାକ୍

ଭୁବନେଶ୍ବର ୧୯।୨: ଭୁବନେଶ୍ୱରରେ ନିର୍ମାଣ ହେବ ସ୍କାଏଓ୍ବାକ୍ । ପଳାଶୁଣୀରୁ ରସୁଲଗଡ଼ ପାଇଁ ସ୍କାଏଓ୍ବାକ୍ ନିର୍ମାଣ କରିବା ପାଇଁ ଏନଏଚଏଆଇ ନିଷ୍ପତି ନେଇଛି । ଏ ନେଇ ୨୦କୋଟି ଟଙ୍କା ବ୍ୟୟବରାଦ କରାଯାଇଛି । ଆସନ୍ତା ଦେଢ଼ ବର୍ଷ ଭିତରେ ଏହି କାମ ସରିବ । କେବଳ ଭୁବନେଶ୍ୱର ନୁହେଁ ଖୋର୍ଦ୍ଧା ଓ କଟକର ଜନଗହଳି ଅଞ୍ଚଳରେ ମଧ୍ୟ ନିର୍ମାଣ ହେବ ସ୍କାଏଓ୍ବାକ୍ ।

ଏ ଖବର ବି ପଢ଼ନ୍ତୁ:- ଲଙ୍କାଗୁଣ୍ଡ କାହାଣୀ ମିଛ ! ନିଜେ ନେଇ ପଳାଇଥିଲା ୨ ଲକ୍ଷ, ଗୋଟିଏ ଭୁଲ ପାଇଁ ଧରିଦେଲା ପୋଲିସ

ରାସ୍ତାରେ ଚାଲୁଥିବା ପଥଚାରୀ ଏବେ ଓଭରବ୍ରିଜରେ ଚାଲିବେ । କାରଣ ତାଙ୍କ ପାଇଁ ନିର୍ମାଣ ହେବ ସ୍କାଏଓ୍ବାକ୍ । ଭୁବନେଶ୍ୱରର ପଳାଶୁଣୀରୁ ରସୁଲଗଡ଼ ପର୍ଯ୍ୟନ୍ତ ୫ଶହ ମିଟର ଦୂରତାକୁ ନେଇ ଏକ ସ୍କାଏଓ୍ବାକ୍ ନିର୍ମାଣ କରିବା ପାଇଁ  ଏନଏଚଏଆଇ ନିଷ୍ପତି ନେଇଛି । ଏ ନେଇ ୨୦ କୋଟି ଟଙ୍କା ବ୍ୟୟବରାଦ କରାଯାଇଛି । ଆସନ୍ତା ୩ ମାସ ମଧ୍ୟରେ ପ୍ରସ୍ତୁତ ହେବ ଡିପିଆର ଓ ପରେ ଟେଣ୍ଡର ଡକାଯିବ । ତେବେ ପଳାଶୁଣୀରୁ ରସୁଲଗଡ଼ ଜନଗହଳି ଅଞ୍ଚଳରେ ଥିବାବେଳେ ଅନେକ ପଥଚାରି ରାସ୍ତାକଡ଼ରେ ଯାଉଛନ୍ତି । ଅନେକ ସମୟରେ ଦୁର୍ଘଟଣା ମଧ୍ୟ ହେଉଛି । ତେବେ ପଥଚାରୀଙ୍କ ସୁରକ୍ଷା ପାଇଁ ସ୍କାଏଓ୍ବାକ୍ ନିର୍ମାଣ ହେବ । ଏହାଛଡ଼ା ପଳାଶୁଣୀରେ ଯାନବାହାନକୁ ନେଇ ଅଧିକ ଗହଳି ହେଉଥିବାରୁ ଏଠାରେ ଆଉ ଏକ ବ୍ରିଜ ନିର୍ମାଣ କରିବାକୁ ମଧ୍ୟ ନିଷ୍ପତି ହୋଇଛି । ୨୫ କୋଟି ଟଙ୍କା ବ୍ୟୟବରାଦରେ ୪ ଲେନ୍ ରାସ୍ତାକୁ ୬ ଲେନ୍ କରାଯିବ ବୋଲି ଏନଏଚଏଆଇ କର୍ତ୍ତୃପକ୍ଷ ସୂଚନା ଦେଇଛନ୍ତି । ତେବେ ଏନଏଚଏଆଇର ଏହି ନିଷ୍ପତିକୁ ସ୍ୱାଗତ କରିଛନ୍ତି ଲୋକେ । ପୂର୍ବରୁ ଏଠାରେ ଥିବା ଫୁଟ୍‌ ଓଭରବ୍ରିଜକୁ ବହୁଳ ମାତ୍ରରେ ଲୋକେ ବ୍ୟବହାର କରୁଥିବା ବେଳେ ସ୍କାଏଓ୍ବାକ୍ କିପରି ହେବ ଏହାକୁ ଦେଖିବାକୁ ମଧ୍ୟ ଇଚ୍ଛୁକ ଅଛନ୍ତି ରାଜଧାନୀ ବାସିନ୍ଦା ।

ଏ ଖବର ବି ପଢ଼ନ୍ତୁ:- ​​​​​​​ପଳାଶୁଣୀରୁ ହଂସପାଳ ମଧ୍ୟରେ ଦୂର ହେବ ଟ୍ରାଫିକ୍ ଯନ୍ତ୍ରଣା, ୪ ଲେନ୍ ବିଶିଷ୍ଟ ଏନଏଚ-୧୬କୁ ୬ ଲେନ୍ କରାଯିବ

ପଳାଶୁଣୀରେ ଦିନ ଓ ରାତି ସବୁ ସମୟରେ ଗହଳି ରହୁଛି । ତେବେ ପିକ୍ ସମୟରେ ପଥଚାରୀ ଓ ଗାଡି ଚାଳକ ଏକାଠି ଯାତାୟତ କରୁଥିବାରୁ ଦୁର୍ଘଟଣା ବୃଦ୍ଧି ପାଉଛି । ତେଣୁ ପଥଚାରୀଙ୍କ ସୁରକ୍ଷା ପାଇଁ ଏଭଳି ନିଷ୍ପତି ନିଆଯାଇଥିବା ଏନଏଚଏଆଇ କର୍ତ୍ତୃପକ୍ଷ କହିଛନ୍ତି । ତେବେ ଓଡ଼ିଶାରେ ପ୍ରଥମ ଥର ପାଇଁ ସ୍କାଏଓ୍ବାକ୍ ନିର୍ମାଣ ହେବ । ଏହିପରି ବ୍ରିଜ୍ ଦିଲ୍ଲୀ, ନୋଏଡ଼ା ଭଳି ଅଞ୍ଚଳରେ ଥିବାବେଳେ ବର୍ତ୍ତମାନ ଓଡ଼ିଶାରେ ମଧ୍ୟ ସ୍କାଏଓ୍ବାକ୍ ନିର୍ମାଣ ହେବ । କେବଳ ଭୁବନେଶ୍ୱର ନୁହେଁ ପ୍ରଥମ ପର୍ଯ୍ୟାୟରେ ଖୋର୍ଦ୍ଧାରୁ କଟକ ମଙ୍ଗୁଳି ପର୍ଯ୍ୟନ୍ତ ବିଭିନ୍ନ ସ୍ଥାନରେ ସ୍କାଏଓ୍ବାକ୍ କରିବା ପାଇଁ NHAI ନିଷ୍ପତି ନେଇଛି । ଏହି ୬୦ କିଲୋମିଟର ରାସ୍ତାରେ ୪ରୁ ୫ଟି ସ୍କାଏଓ୍ବାକ୍ କରିବା ପାଇଁ ନିଷ୍ପତ୍ତି ହୋଇଥିବା ଏନଏଚଏଆଇ ଆଞ୍ଚଳିକ ଅଧିକାରୀ ସୂଚନା ଦେଇଛନ୍ତି । ଏମିତି ଜନଗହଳି ଅଞ୍ଚଳକୁ ଚିହ୍ନଟ କରାଯାଇ ସ୍କାଏଓ୍ବାକ୍ ନିର୍ମାଣ କରାଯିବ ବୋଲି ସେ କହିଛନ୍ତି ।