Iran War: ଇରାନ୍ ଯୁଦ୍ଧକୁ ନେଇ ଆମେରିକା କନଫ୍ୟୁଜ୍ ! ବାରମ୍ବାର ମନ୍ତବ୍ୟ ବଦଳାଉଛନ୍ତି ଟ୍ରମ୍ପ

ନୂଆଦିଲ୍ଲୀ: ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧକୁ ୧୧ ଦିନ ବିତିଗଲାଣି। ଉଭୟ ପାର୍ଶ୍ୱରୁ ଭୟଙ୍କର ଆକ୍ରମଣ ଜାରି ରହିଛି। ଇରାନ ମଧ୍ୟ ପଡ଼ୋଶୀ ଦେଶଗୁଡ଼ିକରେ ଥିବା ଆମେରିକୀୟ ଘାଟି ଉପରେ ଆକ୍ରମଣ କରିବାକୁ ପଛାଉ ନାହିଁ। ହର୍ମୁଜ୍ ପ୍ରଣାଳୀ ଦେଇ ଉପସାଗରୀୟ ଦେଶଗୁଡ଼ିକରୁ ତେଲ ଏବଂ ଗ୍ୟାସ ଯୋଗାଣ ବାଧାପ୍ରାପ୍ତ ହୋଇଛି । ଫଳରେ ଅନେକ ଦେଶରେ ତୈଳ ସଙ୍କଟ ବୃଦ୍ଧି ପାଇଛି । ତେବେ ଯୁଦ୍ଧକୁ ନେଇ ଅନିଶ୍ଚିତତା ବଢ଼ିଛି ।

ଟ୍ରମ୍ପ କହିଥିଲେ ଆକ୍ରମଣ ତୀବ୍ର ହେବ
ଇରାନ୍ ଯୁଦ୍ଧ ଶୀଘ୍ର ଶେଷ ହେବ ବୋଲି କହିଥିଲେ ଟ୍ରମ୍ପ । କିନ୍ତୁ ତାପରେ ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଲେଖିଛନ୍ତି ଯେ, ଯଦି ଇରାନ ହର୍ମୁଜ୍ ପ୍ରଣାଳୀ ଦେଇ ତେଲ ଯୋଗାଣକୁ ବନ୍ଦ କରିବାକୁ ଚେଷ୍ଟା କରେ, ତେବେ ତେହେରାନ ୨୦ ଗୁଣ ଅଧିକ ଭୟଙ୍କର ଆକ୍ରମଣର ସମ୍ମୁଖୀନ ହେବ। ମୃତ୍ୟୁ, ଅଗ୍ନି ଏବଂ ବିନାଶ ଭଳି ଶବ୍ଦ ବ୍ୟବହାର କରିଥିଲେ ଟ୍ରମ୍ପ । ସେ ଘୋଷଣା କରିଥିଲେ ଯେ, ଇରାନ ଏପରି ପଙ୍ଗୁ ହୋଇଯିବ ଯେ ଏହାକୁ ପୁନରୁଦ୍ଧାର କରିବା କଷ୍ଟକର ହେବ। ଏଭଳି ପରିସ୍ଥିତି କେବେ ସୃଷ୍ଟି ନ ହେଉ ବୋଲି ମଧ୍ୟ ଟ୍ରମ୍ପ ପ୍ରାର୍ଥନା କରିଛନ୍ତି ।

ଅଧିକ ପଢ଼ନ୍ତୁ: ବିଶ୍ବବ୍ୟାପୀ ଶକ୍ତି ସଂକଟ ସୃଷ୍ଟି କରିଛି ଇରାନ୍, ଯୁଦ୍ଧ ଲଢ଼ିପାରିବ ତ ଟ୍ରମ୍ପଙ୍କ ଆମେରିକା ?

‘ଯୁଦ୍ଧ ଶୀଘ୍ର ଶେଷ ହେବ’
ଗୋଟିଏ ଦିନ ପୂର୍ବରୁ ମିଆମିରେ ଏକ ସାମ୍ବାଦିକ ସମ୍ମିଳନୀ ସମୟରେ ଟ୍ରମ୍ପ କହିଥିଲେ ଯେ, ଇରାନ ବିରୁଦ୍ଧରେ ଚାଲିଥିବା ସାମରିକ ଅଭିଯାନ କିଛି ଦିନ ମଧ୍ୟରେ ଶେଷ ହୋଇପାରେ। ଟ୍ରମ୍ପ କହିଥିଲେ, ‘ଏହି ଯୁଦ୍ଧରେ ଆମେ ଲାଭ ପାଉଛୁ। ଆମେ ଇରାନର ସାମରିକ ଶକ୍ତିକୁ ସମ୍ପୂର୍ଣ୍ଣ ଦୁର୍ବଳ କରିଦେଇଛୁ। ଆମେ ଏହାର ନୌସେନାର ମେରୁଦଣ୍ଡ ଭାଙ୍ଗି ଦେଇଛୁ। ଆମେ ୫୦ ରୁ ଅଧିକ ଇରାନୀ ନୌସେନା ଜାହାଜକୁ ନଷ୍ଟ କରିଦେଇଛୁ। ଇରାନର କ୍ଷେପଣାସ୍ତ୍ର କ୍ଷମତା ୧୦ ପ୍ରତିଶତକୁ ହ୍ରାସ ପାଇଛି। ସେମାନେ ଡ୍ରୋନ କେଉଁଠାରେ ତିଆରି କରନ୍ତି ଆମେ ଜାଣିଛୁ । ସେହି ଡ୍ରୋନ କାରଖାନାଗୁଡ଼ିକ ଉପରେ ଗୋଟିଏ ପରେ ଗୋଟିଏ ଡ୍ରୋନ ଆକ୍ରମଣ କରାଯାଉଛି। ଏପର୍ଯ୍ୟନ୍ତ, ଏହି ମିଶନ ସମୟରେ ୫୦୦୦ ରୁ ଅଧିକ ଲକ୍ଷ୍ୟସ୍ଥଳ ଉପରେ ଆକ୍ରମଣ କରାଯାଇଛି, ଯେଉଁଥିରେ ଅନେକ ବଡ଼ ସାମରିକ ଘାଟି ମଧ୍ୟ ଅନ୍ତର୍ଭୁକ୍ତ।’

ଚେତାବନୀ ଦେଇଥିଲେ ଟ୍ରମ୍ପ
ଟ୍ରମ୍ପ ଇରାନ ବିରୁଦ୍ଧରେ ଏକ ବଡ଼ ଆକ୍ରମଣ ନେଇ ଚେତାବନୀ ଦେଇଥିଲେ। ସେ ଚେତାବନୀ ଦେଇଥିଲେ ଯେ, ଯୁଦ୍ଧରେ ଅଧିକ ଇରାନ ଅଧିକାରୀଙ୍କୁ ଟାର୍ଗେଟ କରାଯିବ। ସେ ଏହା ମଧ୍ୟ କହିଥିଲେ ଯେ, ଇରାନର ଖରାପ ବ୍ୟବହାର ଯୋଗୁଁ ପୂର୍ବରୁ ଟାର୍ଗେଟ କରାଯାଇ ନଥିବା ଅଞ୍ଚଳରେ ଆକ୍ରମଣ କରାଯିବ । ପୂର୍ବରୁ ଟ୍ରମ୍ପ ଏକ ସୋସିଆଲ ମିଡିଆ ପୋଷ୍ଟରେ କହିଥିଲେ ଯେ, ଯେପର୍ଯ୍ୟନ୍ତ ଇରାନ ନିଃସର୍ତ୍ତ ଆତ୍ମସମର୍ପଣ କରିବ ନାହିଁ, ସେପର୍ଯ୍ୟନ୍ତ ତାଙ୍କ ସହିତ କୌଣସି ଚୁକ୍ତି ହେବ ନାହିଁ।

ବୟାନ ବଦଳାଉଛନ୍ତି ଟ୍ରମ୍ପ
ଇରାନ ଯୁଦ୍ଧ ସଂପର୍କରେ ଆମେରିକା ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦ୍ୱନ୍ଦ୍ୱରେ ଅଛନ୍ତି କି ? ଏହି ପ୍ରଶ୍ନ ଉଠୁଛି, କାରଣ ଟ୍ରମ୍ପ ପ୍ରତିଦିନ ନୂଆ ବୟାନ ଜାରି କରୁଛନ୍ତି। କେତେବେଳେ କହୁଛନ୍ତି ଯେ, ଇରାନ ଯୁଦ୍ଧ ଶେଷ ହେବାକୁ ଯାଉଛି। କେତେବେଳେ ଇସାରା କରୁଛନ୍ତି ଯେ, ଯୁଦ୍ଧ ଦୀର୍ଘ ଦିନ ଚାଲିପାରେ । ଏବେ ପୁଣି ଟ୍ରମ୍ପ ନିଜ ମନ୍ତବ୍ୟର ପୁନରାବୃତ୍ତି କରିଛନ୍ତି । ସେ କହିଛନ୍ତି, ଯୁଦ୍ଧ ଖୁବଶୀଘ୍ର ଶେଷ ହେବ, ବହୁତ ଶୀଘ୍ର । ସେପଟେ ଇରାନ ପ୍ରତିକ୍ରିୟା ଦେଇଛି ଯେ, ଯୁଦ୍ଧ କେବେ ଶେଷ ହେବ ତାହା ଆମେ ନିଷ୍ପତ୍ତି ନେବୁ, ଆମେରିକା ନୁହେଁ।

‘ଯୁଦ୍ଧ କେବେ ଶେଷ ହେବ, ଆମେ ନିଷ୍ପତ୍ତି ନେବୁ’
ଯୁଦ୍ଧ ଶୀଘ୍ର ଶେଷ କରିବେ ବୋଲି ଟ୍ରମ୍ପ ଧମକ ଦେଇଛନ୍ତି । କିନ୍ତୁ ଇରାନ୍ ଟ୍ରମ୍ପଙ୍କ ଧମକକୁ ବେଖାତିର କରିଛି । ଯୁଦ୍ଧ କେବେ ଶେଷ ହେବ, ସେନେଇ ଇରାନ ନିଷ୍ପତ୍ତି ନେବ ବୋଲି ଆଇଆରଜିସି କହିଛି । ଆଞ୍ଚଳିକ ଶାନ୍ତି ଏବଂ ସ୍ଥିରତା ଆମ ହାତରେ ଅଛି ବୋଲି ତେହେରାନ କହିଛି । IRGC ଜେନେରାଲ ଅଲି ମହମ୍ମଦ ନୈନି କହିଛନ୍ତି ଯେ, ଯେପର୍ଯ୍ୟନ୍ତ ଯୁଦ୍ଧ ଜାରି ରହିବ, ଇରାନ ସେନା ଆମେରିକା ଏବଂ ଇସ୍ରାଏଲୀ ସହଯୋଗୀମାନଙ୍କୁ ହର୍ମୁଜ୍ ପ୍ରଣାଳୀ ଦେଇ ଗୋଟିଏ ଲିଟର ତେଲ ବି ରପ୍ତାନୀ କରିବାକୁ ଦେବ ନାହିଁ। ଇରାନ ଏବେ ବିଶ୍ୱ ତୈଳ ମୂଲ୍ୟ ନିୟନ୍ତ୍ରଣ କରୁଛି। ଆମେରିକା ପରାଜୟ ଘୋଷଣା ନ କରିବା ପର୍ଯ୍ୟନ୍ତ ଇରାନ ଲଢ଼େଇ ଜାରି ରଖିବ।