ନୂଆଦିଲ୍ଲୀ: ଆମେରିକା ଓ ଚୀନ ମଧ୍ୟରେ ବାଣିଜ୍ୟ ଯୁଦ୍ଧ ତୀବ୍ର ହେବାରେ ଲାଗିଛି । ଆମେରିକୀୟ ବିମାନ ନିର୍ମାତା କମ୍ପାନି ବୋଇଂଠାରୁ ବିମାନ ଡେଲିଭରି ଉପରେ ରୋକ୍ ଲଗାଇଛି । ଚୀନ ନିଜ କମ୍ପାନିଗୁଡ଼ିକୁ ନିର୍ଦ୍ଦେଶ ଦେଇ ବୋଇଂଠାରୁ କୌଣସି ନୂଆ ବିମାନ ନକିଣିବା ପାଇଁ କହିଛି । ଏପରି ବିମାନର ସ୍ପେୟାର ପାର୍ଟ୍ସ ମଧ୍ୟ କିଣିବେ ନାହିଁ । ରାଷ୍ଟ୍ରପତି ଟ୍ରମ୍ପଙ୍କ ଦ୍ୱାରା ଚୀନ ଉପରେ ଟାରିଫ୍ ୧୪୫ ପ୍ରତିଶତ କରାଯିବା ପରେ ବେଜିଂ ଏହି ନିଷ୍ପତ୍ତି ନେଇଛି ।
ଟ୍ରମ୍ପଙ୍କ ପଦକ୍ଷେପ ପରେ ଚୀନ ମଧ୍ୟ ଆମେରିକୀୟ ଉତ୍ପାଦ ଉପରେ ୧୨୫ ଟାରିଫ୍ ଲଗାଇଥିଲା । ନୂତନ ଶୁଳ୍କ ଯୋଗୁ ଆମେରିକାରୁ ଆମଦାନୀ ହେଉଥିବା ବିମାନ ଓ ଏୟାର ସ୍ପେୟାର ପାର୍ଟ୍ସର ଦ୍ୱିଗୁଣା ମହଙ୍ଗା ହୋଇଛି । ଫଳରେ ବୋଇଂ ବିମାନ କିଣିବା ଚୀନ ବିମାନ କମ୍ପାନିଗୁଡିକ ପାଇଁ ବଡ଼ ଆର୍ଥିକ କ୍ଷତି ପହଞ୍ଚାଇବ । ବ୍ଲୁମବର୍ଗର ରିପୋର୍ଟ ଅନୁସାରେ, ଯେଉଁ କମ୍ପାନିଗୁଡ଼ିକ ବୋଇଂ ବିମାନକୁ ଲିଜରେ ନେଇଛନ୍ତି, ସେମାନଙ୍କୁ ସହଯୋଗ କରିବା ପାଇଁ ଚୀନ ରଣନୀତି କରୁଛି ।
ଉଭୟ ଦେଶ ମଧ୍ୟରେ ଜାରି ବାଣିଜ୍ୟିକ ଯୁଦ୍ଧ ବୋଇଂ ପାଇଁ ବଡ଼ ଆହ୍ୱାନ ପାଲଟିଛି । ଉଲ୍ଲେଖଯୋଗ୍ୟ ଯେ ବିଶ୍ୱ ବିମାନ ବଜାରରେ ଚୀନର ଏକ ବଡ଼ ସେୟାର ରହିଛି । ଏକ ଅନୁମାନ ଅନୁସାରେ ଆଗାମୀ ୨୦ ବର୍ଷରେ ଚୀନ ବୈଶ୍ୱିକ ବିମାନ ଚାହିଦାର ୨୦ ପ୍ରତିଶତ ଅଂଶ ଉପରେ କବଜା କରିବ । ୨୦୧୮ରେ ବୋଇଂ ଦ୍ୱାରା ବିକ୍ରି କରାଯାଇଥିବା ମୋଟ ବିମାନର ପ୍ରାୟ ୨୫ ପ୍ରତିଶଚ ଚୀନକୁ ପଠାଯାଇଥିଲା ।
