ନୂଆଦିଲ୍ଲୀ: ସାମ୍ନାକୁ ଆସିଲା ଚୀନର ଦୋମୁହାଁ ନୀତି । ଶାନ୍ତି କଥା କହୁଥିବା ବେଜିଂ ଆତଙ୍କୀସ୍ତାନକୁ ସମର୍ଥନ ଜଣାଇଛି । ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବଢ଼ୁଥିବା ବେଳେ ପାକ୍ ସମର୍ଥନରେ ଆଗେଇ ଆସିଛି ଚୀନ୍ । ସୋମବାର ଚାଇନା ରାଷ୍ଟ୍ରଦୂତ ଜିୟାଙ୍ଗ ଝାଇଡୋଙ୍ଗ ପାକିସ୍ତାନ ରାଷ୍ଟ୍ରପତି ଆସିଫ୍ ଅଲ୍ଲୀ ଜରଦାରୀଙ୍କ ସହିତ ଭେଟ କରିଛନ୍ତି । ଏହି ସାକ୍ଷାତକାରରେ ସେ କହିଛନ୍ତି, ଦକ୍ଷିଣ ଏସିଆରେ ଶାନ୍ତି ଓ ସ୍ଥିରତା ସୁନିଶ୍ଚିତ କରିବା ପାଇଁ ଚୀନ୍ ସବୁବେଳେ ପାକିସ୍ତାନକୁ ସମର୍ଥନ କରିବ । ପହଲଗାମ୍ ଆତଙ୍କବାଦୀ ହମଲାକୁ ନେଇ ଦୁଇ ଦେଶ ମଧ୍ୟରେ ତିକ୍ତତା ଚରମସୀମାରେ ପହଞ୍ଚିଥିବା ବେଳେ ଚୀନ୍ ଚାଲାକି କରିଛି । ରେଡିଓ ପାକିସ୍ତାନର ରିପୋର୍ଟ ଅନୁଯାୟୀ, ଏହି ଭେଟଘାଟରେ ଭାରତ-ପାକିସ୍ତାନ ମଧ୍ୟରେ ଚାଲୁଥିବା ତିକ୍ତତା ସହିତ ବିଭିନ୍ନ ମୁଦ୍ଦା ଉପରେ ଆଲୋଚନା ହୋଇଛି ।...
ଭାରତର ଆକ୍ସନକୁ ନେଇ ପାକସ୍ତାନ ଚିନ୍ତିତ:
ବୈଠକରେ ପାକିସ୍ତାନ ରାଷ୍ଟ୍ରପତି ଜରଦାରୀ ପହଲଗାମରେ ହୋଇଥିବା ଭୀଷଣ ଆତଙ୍କବାଦୀ ହମଲା ପରେ ଭାରତ ନେଇଥିବା ବିଭିନ୍ନ ପଦକ୍ଷେପକୁ ନେଇ ଚିନ୍ତାବ୍ୟକ୍ତ କରିଛନ୍ତି । ଭାରତର ଏଭଳି କଠୋର ପଦକ୍ଷେପ ଶାନ୍ତି ଓ ସ୍ଥିରତା ପାଇଁ ବିପଦ ବୋଲି ପାକ୍ ରାଷ୍ଟ୍ରପତି କହି ଚୀନ୍ ରାଷ୍ଟ୍ରଦୂତ ସାମ୍ନାରେ କୁମ୍ଭୀର କାନ୍ଦଣା କନ୍ଦିଛନ୍ତି । ପହଲଗାମ୍ ଆକ୍ରମଣରେ ୨୬ଜଣ ପର୍ଯ୍ୟଟକ ପ୍ରାଣ ହରାଇଛନ୍ତି । ସେହିପରି ୧୭ଜଣ ଗୁରୁତର ଭାବେ ଆହତ ହୋଇଛନ୍ତି । ଏହି ଘଟଣା ପରେ ଭାରତ ଓ ପାକିସ୍ତାନ ମଧ୍ୟରେ ସମ୍ଭାବ୍ୟ ଯୁଦ୍ଧ ଆଶଙ୍କା କରାଯାଉଛି ।
ପାକିସ୍ତାନକୁ ଚୀନର ସହଯୋଗର ଭରସା:
ରେଡିଓ ପାକିସ୍ତାନ ଅନୁଯାୟୀ, ସୋମବାର ଚୀନ୍ ରାଷ୍ଟ୍ରଦୂତ ଜିୟାଙ୍ଗ ଝାଇଡୋଙ୍ଗ ପାକିସ୍ତାନ ରାଷ୍ଟ୍ରପତି ଆସିଫ୍ ଅଲ୍ଲୀ ଜରଦାରୀଙ୍କ ସହିତ ଭେଟ୍ କରିଛନ୍ତି । ଏହି ବୈଠକରେ ଚୀନ୍ ରାଷ୍ଟ୍ରଦୂତ, ଚୀନ୍ ଓ ପାକିସ୍ତାନ ମଧ୍ୟରେ ଦୀର୍ଘକାଳୀନ ବିଶ୍ୱାସ ଓ ବନ୍ଧୁତାକୁ 'ଲୁହା ପରି ଦୃଢ଼' ବୋଲି ବର୍ଣ୍ଣନା କରିଥିଲେ । ପ୍ରତ୍ୟେକ କଠିନ ସମୟରେ ଦୁଇ ପରସ୍ପର ସହିତ ଛିଡ଼ା ହୋଇଛନ୍ତି ବୋଲି କହିଥିଲେ। ଏହା ପୂର୍ବରୁ ଗୁରୁବାର ଦିନ ଚୀନ୍ ରାଷ୍ଟ୍ରଦୂତ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ସାକ୍ଷାତ କରିଥିଲେ । ଏଥିରେ ଶହବାଜ ସରକାରଙ୍କ ପହଲଗାମ ଆକ୍ରମଣର ନିରପେକ୍ଷ ତଦନ୍ତ ପାଇଁ ଦେଇଥିବା ପ୍ରସ୍ତାବକୁ ସମର୍ଥନ କରିଛି ଚୀନ୍ ।
କଠୋର ଓ ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ଭାରତ:
ଭାରତ ସରକାର ପାକିସ୍ତାନକୁ ଚାରିପଟୁ ଘେରିବାକୁ ପ୍ରସ୍ତୁତ ହୋଇଛନ୍ତି । ପ୍ରଥମେ ସିନ୍ଧୁ ଜଳ ସନ୍ଧି ସ୍ଥଗିତ ହୋଇଛି । ପାକିସ୍ତାନ ସହ ସମସ୍ତ କାରବାର ବନ୍ଦ ହୋଇଛି । ପାକିସ୍ତାନରୁ ଆମଦାନୀ ହେଉଥିବା ସାମଗ୍ରୀ ଉପରେ ରୋକ୍ ଲାଗିଛି । ଭାରତୀୟ ବନ୍ଦରରେ ପାକିସ୍ତାନୀ ଜାହାଜ ପ୍ରବେଶ ବନ୍ଦ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ଭାରତ, ଆତଙ୍କବାଦ ଓ ସେମାନଙ୍କୁ ସମର୍ଥନ ଦେଉଥିବା ଲୋକଙ୍କୁ କଠୋର ଏବଂ ନିର୍ଣ୍ଣାଯକ ଶାସ୍ତି ଦିଆଯିବ ।
