ଦୁବାଇ: ସୁପର ସନଡେ’ ହେବ ସୁପର ଫାଇଟ୍ । ଚାମ୍ପିଅନ୍ ହେବାକୁ ଚାମ୍ପିଅନ୍ସଙ୍କ ଟକ୍କର । ଫାଇନାଲ୍ ଫାଇଟ୍ରେ ଦୁଲୁକିବ ଦୁବାଇ । ଟିମ୍ ଇଣ୍ଡିଆ ପାଇଁ ତିନି ଟେନସନ । କେନ୍, ସାଣ୍ଟନର ଓ ରଚିନ ଚିନ୍ତା । ରବିବାର ଖେଳାଯିବ ଆଇସିସି ଚାମ୍ପିଅନ୍ସ ଟ୍ରଫି ନବମ ସଂସ୍କରଣର ଫାଇନାଲ ଫାଇଟ୍ । ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ମୁହାଁମୁହିଁ ହେବେ ଭାରତ ଓ ନ୍ୟୁଜିଲାଣ୍ଡ । ୨୫ ବର୍ଷ ପରେ ଟାଇଟଲ ପାଇଁ ଦୁଇ ଦଳ ଖେଳିବେ ନିର୍ଣ୍ଣାୟକ ମୁକାବିଲା । ଫାଇନାଲ୍ ଜିତି ତୃତୀୟ ଥର ପାଇଁ ଟିମ୍ ଇଣ୍ଡିଆ ଚାମ୍ପିଅନ୍ ହେବା ଲକ୍ଷ୍ୟରେ ରହିଥିବା ବେଳେ ବ୍ଲାକ୍ ଆର୍ମି କ୍ବିଓ୍ବି ମଧ୍ୟ ଟ୍ରଫି ହାତେଇବାକୁ ସଂର୍ଘଷ କରିବ ।
ଫାଇନାଲ୍ ଫାଇଟରେ ଟିମ୍ ଇଣ୍ଡିଆର ବଳ ବିରାଟ, ବରୁଣ ଓ ଗିଲ୍ । ମାତ୍ର ବିପକ୍ଷରୁ ଟେନସନ ଦେବେ କେନ୍, ସାଣ୍ଟନର ଓ ରଚିନ । ମ୍ୟାଚ୍ ପୂର୍ବରୁ ତୃଟି ସୁଧାରିବା ଉପରେ ଗୁରୁତ୍ବ ଦେଇଛନ୍ତି ଉଭୟ ଦଳ । ଲିଗ୍ ଓ ନକଆଉଟ୍ ପର୍ଯ୍ୟାୟରେ ସମସ୍ତ ଟିମକୁ ମାତ୍ ଦେଇ ଅପରାଜେୟ ରୋହିତ୍ ସେନା ରହିଛି । ବ୍ୟାଟିଂ, ବୋଲିଂ ଓ ଫିଲ୍ଡିଂରେ ଭାରତୀୟ ଦଳର ଜବରଦସ୍ତ କ୍ରେଜ୍ ରହିଛି । ରୋହିତ୍ ଓ ଗିଲ୍ ଦ୍ରୁତ ଷ୍ଟାର୍ଟ ଦେଉଥିବା ବେଳେ ମିଡିଲ୍ ଓଭରରେ ଟିମ୍ ପାଇଁ ବ୍ୟାକ୍ ବୋନ୍ ସାଜିଛନ୍ତି କୋହଲି, ଆୟର, ଅକ୍ଷର ଓ ରାହୁଲ । ହାର୍ଡ ହିଟିଂ ହାର୍ଦ୍ଦିକ୍ ପାଣ୍ଡ୍ୟାଙ୍କ ଫିନିସିଂ ଟଚ୍ ଟ୍ରଫି ଜିତିବାରେ ସହାୟକ ହେବ । ସେପଟେ ମହମ୍ମଦ ଶାମିଙ୍କ ସିମ୍ ବୋଲିଂ ସାଙ୍ଗକୁ ଭାରତୀୟ ଦଳର ସ୍ପିନ୍ ଆଟାକ୍ କ୍ବିଓ୍ବି ବ୍ୟାଟରଙ୍କୁ ଚେକ୍ ଦେବ ।
ଟାଇଟଲ୍ ଟକ୍କରରେ ଟିମ୍ ଇଣ୍ଡିଆକୁ ଟେନସନ୍ ଦେବେ କେନ୍, ସାଣ୍ଟନର ଓ ରଚିନ । ପାକିସ୍ତାନରୁ ଦୁବାଇ ଓ ଦୁବାଇରୁ ପାକିସ୍ତାନ ଯାତ୍ରା ସତ୍ତ୍ବେ ଚାମ୍ପିଅନ୍ ହେବାକୁ ସବୁ କ୍ଲାନ୍ତକୁ ପଛରେ ପକାଇ ଦେଇଛି ନ୍ୟୁଜିଲାଣ୍ଡ୍ । କେନ୍ ୱିଲିୟମସନ ଓ ରଚୀନ ରବିନ୍ଦ୍ରଙ୍କ ଦମଦାର ବ୍ୟାଟିଂ ରୋହିତ୍ ସେନାର ଚିନ୍ତା ବଢ଼ାଇ ଦେଇଛି । ସେହିପରି ଅଧିନାୟକ ମିଚେଲ୍ ସାଣ୍ଟନରଙ୍କ ଯାଦୁଗରୀ ସ୍ପିନ୍ ଚାମ୍ପିଅନ୍ସ ଟ୍ରଫି ଜିତିବାକୁ ଯଥେଷ୍ଟ ବୋଲି କ୍ରିକେଟ୍ ବିଶେଷଜ୍ଞ ମତ ପୋଷଣ କରିଛନ୍ତି । ଚଳିତ ଆଇସିସି ଟର୍ଣ୍ଣାମେଣ୍ଟରେ ଟିମ୍ ଇଣ୍ଡିଆ ଲିଗ୍ ପର୍ଯ୍ୟାୟରେ କ୍ବିଓ୍ବି ଦଳକୁ ପରାସ୍ତ କରିଥିଲେ ମଧ୍ୟ ଫାଇନାଲ୍ ମୁକାବିଲା ହରାଇବା ଏତେ ସହଜ ହେବ ନାହିଁ ।
୨୫ ବର୍ଷ ପରାଜୟର ବଦ୍ଲା ନେବା ଲକ୍ଷ୍ୟରେ ରହିଛି ଟିମ୍ ଇଣ୍ଡିଆ । ୨୦୦୦ ମସିହା ଚାମ୍ପିଅନ୍ସ ଟ୍ରଫି ଫାଇନାଲ୍ରେ ଭାରତକୁ ଚେକ୍ ଦେଇଥିଲା ନ୍ୟୁଜିଲାଣ୍ଡ । ସେତେବେଳେ ଏହି ଟୁର୍ଣ୍ଣାମେଣ୍ଟର ନାଁ ଥିଲା ଆଇସିସି ନକ୍ ଆଉଟ୍ । ଏହାପରେ ଭାରତ ୨୦୦୨ ଓ ୨୦୧୩ରେ ୨ଥର ଚାମ୍ପିଅନ୍ ହୋଇଛି । ମାତ୍ର କ୍ବିଓ୍ବି ବିପକ୍ଷ ପରାଜୟକୁ ଭୁଲି ନାହିଁ । ୨୫ ବର୍ଷ ପରେ ପ୍ରତିଶୋଧ ନେବାର ସମୟ ଆସିଛି । ଅନ୍ତର୍ଜାତିକ ଦିନିକିଆରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ମୋଟ୍ ୧୧୯ଟି ମ୍ୟାଚ୍ ଖେଳାଯାଇଛି । ଏଥିରେ ଟିମ୍ ଇଣ୍ଡିଆ ୬୧ଟି ମ୍ୟାଚ ଜିତିଥିବା ବେଳେ ନ୍ୟୁଜିଲାଣ୍ଡକୁ ୫୦ ମ୍ୟାଚରେ ବିଜୟ ମିଳିଛି । ତେଣୁ ସନଡେ’ ଫାଇଟରେ ଦୁଇ ଶକ୍ତିଶାଳୀ ଟିମ୍ ମଧ୍ୟରେ ସଂଘର୍ଷ ଦେଖିବାକୁ ମିଳିବ ବୋଲି ଆଶା କରାଯାଉଛି ...
