ଭୁବନେଶ୍ୱର: ରିଲାଏନ୍ସ ଜିଓ ପକ୍ଷରୁ ରାଜ୍ୟବ୍ୟାପୀ ପ୍ରଭାବଶାଳୀ ସଚେତନତା ଅଭିଯାନ ସହିତ ଜାତୀୟ ସଡ଼କ ସୁରକ୍ଷା ମାସ ପାଳନ କରାଯାଇଛି । ଏହି ପଦକ୍ଷେପ ସଡ଼କରେ ନିଜର ତଥା ଅନ୍ୟମାନଙ୍କ ନିମନ୍ତେ ଯତ୍ନ ଏବଂ ଦାୟିତ୍ୱ ଉପରେ ଗୁରୁତ୍ୱାରୋପ କରିଛି। ଏକ ମାସ ବ୍ୟାପୀ ଏହି ସଚେତନତା ଅଭିଯାନକୁ ମାସର ପ୍ରାରମ୍ଭରେ ରିଲାଏନ୍ସ ଜିଓ ଇନଫୋକମ୍ ଲିମିଟେଡର ଓଡିଶା ମୁଖ୍ୟ ଶ୍ରୀ ପ୍ରଦୀପ ରାଉତ ଶୁଭାରମ୍ଭ କରି ସଡକ ସୁରକ୍ଷା ଏବଂ ସୁରକ୍ଷିତ ଢଙ୍ଗରେ ଗାଡ଼ିଚାଳନା ଗୁରୁତ୍ୱ ଉପରେ ଆଲୋକପାତ କରିଥିଲେ।
ଜିଓ କର୍ମଚାରୀ, ସେମାନଙ୍କ ପରିବାର ଏବଂ ସମାଜର ବିଭିନ୍ନ ବର୍ଗ ମଧ୍ୟରେ ସଡ଼କ ସୁରକ୍ଷା ଅଭ୍ୟାସକୁ ପ୍ରୋତ୍ସାହିତ କରିବା ଏହି ମାସବ୍ୟାପୀ ସଡ଼କ ସୁରକ୍ଷା ସଚେତନତା ଅଭିଯାନର ମୁଖ୍ୟ ଉଦ୍ଦେଶ୍ୟ ରହିଥିଲା। ଏହି ଅଭିଯାନରେ ଆଇଏସଆଇ ୪୧୫୧ ପ୍ରମାଣିତ ପୂର୍ଣ୍ଣ-ମୁଖ ହେଲମେଟ୍ ବ୍ୟବହାରକୁ ଉତ୍ସାହିତ କରିବା, ସିଟ୍ ବେଲ୍ଟର ନିରନ୍ତର ବ୍ୟବହାର ପାଇଁ ପରାମର୍ଶ ଦେବା, ଟ୍ରାଫିକ୍ ନିୟମ ଏବଂ ନିୟମାବଳୀ ପାଳନକୁ ଦୃଢ଼ କରିବା, କୌଣସି ସମୟରେ ମଦ୍ୟପାନ କରି ଗାଡ଼ି ନଚଲାଇବା, ଗତି ସୀମା ପାଳନ କରିବା, ଅନ୍ୟମନସ୍କତାକୁ ଏଡାଇବା, ଖରାପ ପାଗରେ ସତର୍କ ରହିବା ଏବଂ ନିୟମିତ ଭାବରେ ନିଜର ଯାନବାହନ ଯାଞ୍ଚ କରିବା ଭଳି ସଡ଼କ ସୁରକ୍ଷା ପ୍ରମୁଖ ନିୟମଗୁଡିକ ଉପରେ ସ୍ୱତନ୍ତ୍ର ଧ୍ୟାନ ଦିଆଯାଇଥିଲା।
ଏହି ପଦକ୍ଷେପର ଏକ ଅଂଶ ଭାବରେ, ଜିଓ କର୍ମଚାରୀମାନଙ୍କ ଦ୍ୱାରା ଭୁବନେଶ୍ୱର, କଟକ, ବ୍ରହ୍ମପୁର, ରାୟଗଡା, ଭବାନୀପାଟଣା, କେଉଁଝର, ଅନୁଗୁଳ / ନାଲକୋ, ସମ୍ବଲପୁର, ରାଉରକେଲା, ବାରିପଦା ଏବଂ ଭଦ୍ରକ ଆଦି ସହରରେ ସଚେତନତା ରୋଡ୍ ଶୋ ଆୟୋଜନ କରାଯିବା ସହ କୁଇଜ୍ ପ୍ରତିଯୋଗିତା, ସଡ଼କ ସୁରକ୍ଷା ପ୍ରତିଜ୍ଞା, ପୋଷ୍ଟର ଏବଂ ସ୍ଲୋଗାନ ପ୍ରତିଯୋଗିତା ଭଳି ବିବିଧ କାର୍ଯ୍ୟକ୍ରମମାନ ଆୟୋଜନ କରାଯାଇଥିଲା। ଅଂଶଗ୍ରହଣକାରୀମାନଙ୍କୁ ଅର୍ଥପୂର୍ଣ୍ଣ ଉପାୟରେ ସଚେତନ ଏବଂ ସାମିଲ କରିବା ପାଇଁ ପରିକଳ୍ପନା କରାଯାଇଥିବା ବିବିଧ କାର୍ଯ୍ୟକ୍ରମ ଉତ୍ସାହଜନକ ଅଂଶଗ୍ରହଣ ହାସଲ କରିଥିଲା। ଏହି ଅଭିଯାନ ମାଧ୍ୟମରେ, ଜିଓ 'ସୁରକ୍ଷିତ ରାସ୍ତା' ବିଚାରଧାରାକୁ ପ୍ରୋତ୍ସାହିତ କରିବା ସହିତ ଏହାର କର୍ମଚାରୀ, ସେମାନଙ୍କ ପରିବାର ଏବଂ ବ୍ୟାପକ ସମାଜର ମଙ୍ଗଳ ସୁନିଶ୍ଚିତ କରିବା ପାଇଁ ଏହାର ପ୍ରତିବଦ୍ଧତାକୁ ଦୋହରାଇଛି।
