ପରୀକ୍ଷା ନଦେଇ ଗୋଆ ଯିବାକୁ ନେଇଥିଲେ ନିଷ୍ପତ୍ତି, ଶିକ୍ଷା ବିଭାଗର ହସ୍ତକ୍ଷେପ ପରେ ଦେଲେ ମାଟ୍ରିକ୍

ସୁନ୍ଦରଗଡ଼ ୨୧।୨: ପାଠ ପଢ଼ିବି, ଭଲ ମଣିଷ ହେବି ଆଉ ଭଲ ଚାକିରି କରିବି । ପ୍ରାୟ ସବୁ ଛାତ୍ରଛାତ୍ରୀ ଏମିତି କିଛି ଭାବିଥାନ୍ତି । ହେଲେ କେତେକଙ୍କ କ୍ଷେତ୍ରରେ ଏଥିରେ ବ୍ୟତିକ୍ରମ ଦେଖାଯାଏ । ପରିବାରର ଦାରିଦ୍ର୍ୟତା ପାଇଁ ସେସବୁକୁ ପଛରେ ଛାଡିବାକୁ ହୁଏ । ଏମିତି ଜଣେ ଛାତ୍ର ଘରର ଦାରିଦ୍ର୍ୟତା ବୋଝ ପାଇଁ ଦାଦନ ଖଟିବାକୁ ବାହାରିଥିଲା ଗୋଆ । ଛାତ୍ର ଜଣଙ୍କ ଘର ସୁନ୍ଦରଗଡ଼ ସହରର ଲୁହୁରାଢ଼ିପା । ସ୍ଥାନୀୟ ଧର୍ମଶାଳା ଉଚ୍ଚ ମାଧ୍ୟମିକ ବିଦ୍ୟାଳୟରେ ପଢ଼ୁଥିଲେ ଉତ୍ତମ ରୋହିଦାସ । ସେ ଦେଇଥାନ୍ତେ ମାଟ୍ରିକ୍ ପରୀକ୍ଷା । ୧୮ ତାରିଖରେ ଶିକ୍ଷକ ଘରକୁ ଯାଇ ପ୍ରବେଶପତ୍ର ଦେଇଥିଲେ । ପରୀକ୍ଷା ଦେବା ପାଇଁ ଭବାନୀଶଙ୍କର ଉଚ୍ଚ ମାଧ୍ୟମିକ ବିଦ୍ୟାଳୟ କେନ୍ଦ୍ରରେ ସକାଳୁ ପହଞ୍ଚିବାକୁ କହିଥିଲେ । ହେଲେ ୧୯ ତାରିଖ ସକାଳେ ପରୀକ୍ଷା ନଦେଇ ଦାଦନ ଖଟିବାକୁ ଯିବାପାଇଁ ନିଷ୍ପତ୍ତି ନେଇଥିଲେ । ପରୀକ୍ଷା କେନ୍ଦ୍ରରୁ ଧର୍ମଶାଳା ବିଦ୍ୟାଳୟ କର୍ତ୍ତୃପକ୍ଷଙ୍କୁ ଉତ୍ତମ ରୋହିଦାସ ଅନୁପସ୍ଥିତ ଥିବା ସୂଚନା ଦିଆଯାଇଥିଲା । ପ୍ରଧାନଶିକ୍ଷକ ଅଶୋକ ନାଏକଙ୍କ ସମେତ ଅନ୍ୟ ଶିକ୍ଷକମାନେ ଲୁହୁରାଢିପା ଯାଇ ଛାତ୍ରଙ୍କୁ ଭେଟିବା ପରେ ପରୀକ୍ଷା ନ ଦେବାର କରୁଣ ଚିତ୍ର ପଦାକୁ ଆସିଥିଲା ।

ପରିବାରର ବୋଝ ସହ ରୋଗିଣା ମା’ର ଚିକିତ୍ସା କରିବା ପାଇଁ ଦାଦନ ଖଟିବାକୁ ଗୋଆ ବାହାରିଥିଲା ଉତ୍ତମ । ଯେଉଁ ବୟସରେ କାନ୍ଧରେ ବହିବସ୍ତାନୀ ଧରିବା କଥା ସେହି ବୟସରେ ସେ ପରିବାରର ଦାରିଦ୍ର୍ୟ ବୋଝ ଉଠାଇବାକୁ ଗୋଆ ଯିବାକୁ ଚାହୁଁଥିବା ଜାଣିବାକୁ ପାଇଥିଲେ ବିଦ୍ୟାଳୟ କର୍ତ୍ତୃପକ୍ଷ । ଏହାପରେ ଶିକ୍ଷା ବିଭାଗର ଜିଲ୍ଲା ଶିକ୍ଷା ଅଧିକାରୀଙ୍କ ସମେତ ବିଭାଗର ଅନ୍ୟ ଅଧିକାରୀଙ୍କ ଏକ ଟିମ୍ ଉତ୍ତମ ଏବଂ ତାଙ୍କ ପରିବାର ଲୋକଙ୍କୁ କାଉନସେଲିଂ କରିଥିଲା । ଶିକ୍ଷା ବିଭାଗର ଅଧିକାରୀ ମାନେ ଅନେକ ସମୟ ଧରି ବୁଝାସୁଝା କରିବା ସହ ୧୦ ହଜାର ଟଙ୍କାର ସହାୟତା ରାଶି ପ୍ରଦାନ ପାଇଁ ପ୍ରତିଶ୍ରୁତି ପରେ ଉତ୍ତମ ପରୀକ୍ଷା ଦେବା ପାଇଁ ରାଜି ହୋଇଥିଲେ । ବିଦ୍ୟାଳୟ କର୍ତ୍ତୃପକ୍ଷଙ୍କ ତରଫରୁ ଉତ୍ତମକୁ ନୂଆ ୟୁନିଫର୍ମ, ଜୋତା ଓ ଏକ ସାଇକେଲ ପ୍ରଦାନ କରାଯାଇଥିଲା । ଦ୍ବିତୀୟ ଦିନରେ ମାଟ୍ରିକ୍ ପରୀକ୍ଷା ଦେଇଥିଲେ ଉତ୍ତମ । ତେବେ ପୁଅ ମାଟ୍ରିକ ପରୀକ୍ଷା ଦେବ, ପାଠ ପଢ଼ିବ ଏଥିପାଇଁ ବେଶ ଖୁସି ଅଛନ୍ତି ମା’ ଯଶୋଦା ରୋହିଦାସ ।